ಫ್ಯಾಮಿಲಿ ಸಮೇತ ಕಾಂತಾರ ನೋಡ್ಬೇಕು ಅನ್ಕೊಂಡ್ರೆ ಟಿಕೆಟ್ ದರ ಇಷ್ಟೊಂದಾ? ಹೆಚ್ಚು ದುಡ್ಡಿದ್ರೆ ನೋಡಿ ಎಂದ ಪ್ರೇಕ್ಷಕ!

ಬುಕಿಂಗ್ ಓಪನ್ ಆಗಿದೆ ಸಾಮರ್ಥ್ಯವಿರುವವರು ಟಿಕೆಟ್ ಖರೀದಿಸಿ!

ಅಭಿಲಾಷ್ ದೇವಾಡಿಗ ಎಂಬ ಸಿನಿ ಪ್ರೇಮಿ ಟ್ವಿಟರ್ ಖಾತೆಯಲ್ಲಿ ಕುಂದಾಪುರದ ಭಾರತ್ ಸಿನಿಮಾಸ್‌ನಲ್ಲಿ ಕಾಂತಾರ ಚಿತ್ರದ ಅಡ್ವಾನ್ಸ್ ಬುಕಿಂಗ್ ಓಪನ್ ಆಗಿದೆ, ಒಂದು ಟಿಕೆಟ್ ದರ 236 ರೂಪಾಯಿ ಇದ್ದು, ಇದರ ಜತೆಗೆ 40 ರೂಪಾಯಿ ಇಂಟರ್‌ನೆಟ್ ಫೀಸ್ ಕೂಡ ಇದೆ, ಇಷ್ಟು ಮೊತ್ತವನ್ನು ನೀಡುವ ಸಾಮರ್ಥ್ಯ ಹೊಂದಿರುವವರು ಬುಕ್ ಮಾಡಿಕೊಳ್ಳಿ ಎಂದು ಬರೆದುಕೊಂಡಿದ್ದಾರೆ.

ಕುಟುಂಬದವರು ಚಿತ್ರ ನೋಡ್ಬೇಕು ಆದರೆ ಟಿಕೆಟ್ ದುಬಾರಿ

ನನ್ನ ಕುಟುಂಬದವರು ಕಾಂತಾರ ನೋಡಬೇಕು ಎಂಬ ಆಸೆಯನ್ನು ಹೊಂದಿದ್ದಾರೆ, ಆದರೆ ಟಿಕೆಟ್ ದರ ತೀರ ದುಬಾರಿಯಾಯಿತು. ಇದರ ಕಡೆ ದಯವಿಟ್ಟು ಗಮನಹರಿಸಿ ಎಂದು ರಿಷಬ್ ಶೆಟ್ಟಿ ಅವರನ್ನು ಟ್ಯಾಗ್ ಮಾಡಿದ್ದಾರೆ. ಹಾಗೂ ಸಾಮನ್ಯವಾಗಿ ಈ ಚಿತ್ರಮಂದಿರದಲ್ಲಿ ಟಿಕೆಟ್ ದರ 150ರಿಂದ 180ರಷ್ಟು ಇತ್ತು ಎಂದೂ ಕೂಡ ಇಲ್ಲಿ ಉಲ್ಲೇಖಿಸಿದ್ದಾರೆ.

ಪಟ್ಟಣಗಳಲ್ಲೂ ಏಕೆ ದುಬಾರಿ ಟಿಕೆಟ್ ದರ?

ಬೆಂಗಳೂರು ಹಾಗೂ ಮೈಸೂರು ರೀತಿಯ ಬೃಹತ್ ನಗರಗಳ ಮಲ್ಟಿಪ್ಲೆಕ್ಸ್‌ಗಳಲ್ಲಿ ಟಿಕೆಟ್ ದರ ಇನ್ನೂರಕ್ಕಿಂತ ಅಧಿಕವಿದ್ದರೆ 'ಇಷ್ಟು ಕಾಸ್ಟ್ಲಿ ಆದ್ರೆ ಯಾರು ಹೋಗ್ತಾರೆ ಗುರೂ' ಎಂದು ಬೇಸರ ವ್ಯಕ್ತಪಡಿಸುವವರಿದ್ದಾರೆ, ಹಾಗಿರುವಾಗ ಕುಂದಾಪುರ ರೀತಿಯ ಪಟ್ಟಣದಲ್ಲಿ ಒಂದು ಟಿಕೆಟ್‌ಗೆ ಇನ್ನೂರಕ್ಕಿಂತ ಹೆಚ್ಚು ದರವನ್ನು ನಿಗದಿಪಡಿಸುವುದು ಎಷ್ಟು ಸರಿ ಎಂಬ ಪ್ರಶ್ನೆ ಮೂಡದೇ ಇರದು. ಇನ್ನು ಬಿಡುಗಡೆಗೆ ಇನ್ನೂ ಎರಡು ದಿನ ಬಾಕಿ ಇದ್ದು ಕುಂದಾಪುರದಲ್ಲಿ ಕಾಂತರ ಮೊದಲ ಪ್ರದರ್ಶನದ ಆರು ಟಿಕೆಟ್‌ಗಳು ಮಾತ್ರ ಸದ್ಯಕ್ಕೆ ಮಾರಾಟವಾಗಿದೆ. ಆ ಪ್ರೇಕ್ಷಕ ಹೇಳಿದಂತೆ ಸರಿಯಾದ ಟಿಕೆಟ್ ದರ ಇದ್ದಿದ್ದರೆ ಮತ್ತಷ್ಟು ಟಿಕೆಟ್‌ಗಳು ಮಾರಾಟವಾಗುತ್ತಿದ್ದವೇನೋ.