ಅಜ್ಜಿ ರಿಕ್ವೆಸ್ಟ್ ಮಾಡಿಕೊಂಡಾಗ ಅಪ್ಪನಿಗೆ ಸಿನಿಮಾ ಚಾನ್ಸ್ ಕೊಟ್ಟದ್ದು ಈ ನಟ: ರಕ್ಷಕ್ ಬುಲೆಟ್ ಪ್ರಕಾಶ್!

ಅವಕಾಶ ಕೊಟ್ಟದ್ದು ಶಿವಣ್ಣ

ಸಂದರ್ಶನದಲ್ಲಿ ಬುಲೆಟ್ ಪ್ರಕಾಶ್ ಅವರಿಗೆ ನಟನಾಗಬೇಕು ಎಂಬ ಕನಸು ಯಾವಾಗ ಬಂತು ಎಂಬ ಪ್ರಶ್ನೆ ಎದುರಾದಾಗ ಉತ್ತರಿಸಿದ ರಕ್ಷಕ್ "ಅಪ್ಪನಿಗೆ ನಟನಾಗಬೇಕು ಎಂಬ ಆಸೆಯೇನೂ ಇರಲಿಲ್ಲ. ಕಾಟನ್‌ಪೇಟೆಯಲ್ಲಿದ್ದಾಗ ಅಲ್ಲಿನ ಕಾರ್ಯಕ್ರಮವೊಂದಕ್ಕೆ ಶಿವ ರಾಜ್‌ಕುಮಾರ್ ಅವರು ಅತಿಥಿಯಾಗಿ ಬಂದಿದ್ದರು. ಈ ಸಂದರ್ಭದಲ್ಲಿ ನಮ್ಮ ಅಜ್ಜಿ ನನ್ನ ಮಗ ಕೂಡ ನೋಡೋಕೆ ಚೆನ್ನಾಗಿದ್ದಾನೆ. ಖಳ ನಾಯಕನ ಪಾತ್ರಕ್ಕೆ ತಕ್ಕನಾಗಿದ್ದಾನೆ. ಒಂದು ಅವಕಾಶ ಕೊಡಿ ಎಂದು ಮನವಿ ಮಾಡಿಕೊಂಡಿದ್ರು. ಈ ಮನವಿಗೆ ಸ್ಪಂದಿಸಿದ ಶಿವಣ್ಣ ಎಕೆ 47 ಚಿತ್ರದಲ್ಲಿ ನೆಗೆಟಿವ್ ರೋಲ್ ಕೊಡಿಸಿದ್ರು. ಇದಕ್ಕೂ ಮುನ್ನ ಚಿಕ್ಕ ವಯಸ್ಸಿನಲ್ಲಿ ಶಾಂತಿ ಕ್ರಾಂತಿ ಮಾಡಿದ್ರೂ ಸಹ ಸಿನಿ ಜರ್ನಿ ಶುರುವಾಗಿದ್ದು ಮಾತ್ರ ಎಕೆ 47ನಿಂದ" ಎಂದು ಹೇಳಿಕೆ ನೀಡಿದರು.

ರಕ್ಷಕ್ ಇಂಡಸ್ಟ್ರಿ ಆಯ್ದುಕೊಳ್ಳಲು ಕಾರಣವೇನು?

ಇನ್ನು ನೀವು ಇಂಡಸ್ಟ್ರಿಗೆ ಬರಲು ಕಾರಣವೇನು ಎಂಬ ಪ್ರಶ್ನೆಗೆ ಉತ್ತರಿಸಿದ ರಕ್ಷಕ್ "ನಾನು ಚಿಕ್ಕ ವಯಸ್ಸಿನಿಂದಲೂ ಮನೆಯಲ್ಲಿ ಚಿತ್ರಗಳ ಬಗ್ಗೆ ನಡೆಯುತ್ತಿದ್ದ ಚರ್ಚೆಗಳನ್ನೇ ನೋಡುತ್ತಾ ಬೆಳೆದವನು. ನಮ್ಮಪ್ಪ ನೀನು ಈ ತರ ಫೈಟ್ ಮಾಡಬೇಕು, ಈ ತರ ಡಾನ್ಸ್ ಮಾಡಬೇಕು ಎಂದು ಹುರುದುಂಬಿಸುತ್ತಿದ್ದರು. ಶಾಲಾ ಕಾಲೇಜಿಗೆ ರಜೆ ಹಾಕಿಸಿ ಶೂಟಿಂಗ್ ಸ್ಥಳಕ್ಕೆ ಕರೆದುಕೊಂಡು ಹೋಗುತ್ತಿದ್ರು. ಹೀಗಾಗಿ ಜೀವನ ನಡೆಸೋಕೆ ಸಿನಿಮಾವನ್ನೇ ಆಯ್ದುಕೊಂಡೆ" ಎಂದು ತಿಳಿಸಿದರು.

ಗುರು ಶಿಷ್ಯರು ಚಿತ್ರದಲ್ಲಿ ರಕ್ಷಕ್ ನಟನೆ

ಕಳೆದ ವರ್ಷ ಬಿಡುಗಡೆಗೊಂಡ ಶರಣ್ ಹಾಗೂ ನಿಶ್ವಿಕಾ ನಾಯ್ಡು ನಟನೆಯ ಮತ್ತು ಜಡೇಶ್ ಕುಮಾರ್ ಹಂಪಿ ನಿರ್ದೇಶನದ ಗುರು ಶಿಷ್ಯರು ಚಿತ್ರದಲ್ಲಿ ರಕ್ಷಕ್ ಬುಲೆಟ್ ನಟಿಸಿದ್ದರು. ಚಿತ್ರದಲ್ಲಿ ಶಾಲಾ ಮಕ್ಕಳ ಪಾತ್ರ ನಿರ್ವಹಿಸಿದ್ದ ಕಲಾವಿದರ ಮಕ್ಕಳ ಪೈಕಿ ರಕ್ಷಕ್ ಕೂಡ ಓರ್ವರಾಗಿ ಸಿನಿಮಾ ಕ್ಷೇತ್ರಕ್ಕೆ ಪದಾರ್ಪಣೆ ಮಾಡಿದ್ದರು. ಈ ಚಿತ್ರದಲ್ಲಿ ಬಾಷಾ ಎಂಬ ಪಾತ್ರವನ್ನು ರಕ್ಷಕ್ ನಿರ್ವಹಿಸಿದ್ದರು.