ಧೂಳೆಬ್ಬಿಸುತ್ತಿದೆ 'ಜಾಗ್ವರ್' ನಿಖಿಲ್ ಕುಮಾರ್ ಹೊಸ ಲುಕ್

ನಟ ನಿಖಿಲ್ ಕುಮಾರ್ 'ಜಾಗ್ವರ್' ಚಿತ್ರದ ನಂತರ 'ಕುರುಕ್ಷೇತ್ರ' ಸಿನಿಮಾವನ್ನು ಮಾಡುತ್ತಿದ್ದಾರೆ. ಕನ್ನಡ ಚಿತ್ರರಂಗದ ಬಹು ನಿರೀಕ್ಷಿತ ಸಿನಿಮಾ ಇದಾಗಿದ್ದು, ಚಿತ್ರದಲ್ಲಿ ನಿಖಿಲ್ ಅವರು 'ಅಭಿಮನ್ಯು' ಪಾತ್ರವನ್ನು ನಿರ್ವಹಿಸಲಿದ್ದಾರೆ. ಆದರೆ ಈ ಚಿತ್ರದೊಂದಿಗೆ ನಿಖಿಲ್ ಮತ್ತೊಂದು ಸಿನಿಮಾ ಕೂಡ ಸದ್ಯದಲ್ಲಿಯೇ ಶುರುವಾಗಲಿದೆ.

ನಿಖಿಲ್ ಅವರ ಹೊಸ ಸಿನಿಮಾಗೆ 'ಸಂತು ಸ್ಟ್ರೇಟ್ ಫಾರ್ವರ್ಡ್' ನಿರ್ದೇಶಕ ಮಹೇಶ್ ರಾವ್ ಆಕ್ಷನ್ ಕಟ್ ಹೇಳಲಿದ್ದಾರೆ. ಸದ್ಯ ಈ ಚಿತ್ರದ ಫೋಟೋಶೂಟ್ ನೆಡೆದಿದ್ದು, ನಿಖಿಲ್ ಕುಮಾರ್ ಅವರ ಒಂದು ಲುಕ್ ಹೊರಬಂದಿದೆ. ನಿಖಿಲ್ ಅವರ ಈ ಫೋಟೋ ನೋಡಿ ಎಲ್ಲರೂ ಸಖತ್ ಇಷ್ಟ ಪಟ್ಟಿದ್ದಾರೆ. ಸಮಾಜಿಕ ಜಾಲತಾಣದಲ್ಲಿ ನಿಖಿಲ್ ಫೋಟೋ ದೊಡ್ಡ ರೆಸ್ಪಾನ್ಸ್ ಪಡೆದುಕೊಂಡಿದೆ.

ನಿಖಿಲ್ ಅವರ ಈ ಸಿನಿಮಾ ಕುಮಾರಸ್ವಾಮಿ ಅವರ ಚೆನ್ನಾಂಬಿಕಾ ಬ್ಯಾನರ್ ನಲ್ಲಿ ನಿರ್ಮಾಣವಾಗಿದೆ. ಸದ್ಯ ಲೊಕೇಷನ್ ಹುಡುಕಾಟದಲ್ಲಿ ನಿರ್ದೇಶಕರು ಬ್ಯುಸಿ ಇದ್ದು, ಅಕ್ಟೋಬರ್ 18ಕ್ಕೆ ಸಿನಿಮಾದ ಚಿತ್ರೀಕರಣ ಶುರು ಆಗಲಿದೆ. ಕನ್ನಡ ಮತ್ತು ತೆಲುಗು ಭಾಷೆಯಲ್ಲಿ ಸಿನಿಮಾವನ್ನು ತೆರೆಗೆ ತರುವ ಯೋಜನೆ ಚಿತ್ರತಂಡದ್ದಾಗಿದೆ.