ಗಾಳಿಪಟ 2ನಿಂದ ತೆಗೆದು ಹಾಕಿದ್ದ ವಿಡಿಯೋ ಸಾಂಗ್ ಬಿಡುಗಡೆ; ಯಪ್ಪಾ ಒಳ್ಳೆ ಕೆಲಸ ಮಾಡಿದ್ರಿ ಎಂದ ಪ್ರೇಕ್ಷಕರು!

ಯುಟ್ಯೂಬ್‌ನಲ್ಲಿ ತತ್ತೇರಿಕೆ ಬಿಡುಗಡೆ

ಸಿನಿಮಾದಿಂದ ತೆಗೆದು ಹಾಕಲಾಗಿದ್ದ ತತ್ತೇರಿಕೆ ವಿಡಿಯೋ ಹಾಡನ್ನು ಇಂದು ( ಸೆಪ್ಟೆಂಬರ್ 19 ) ಆನಂದ್ ಆಡಿಯೋ ಯುಟ್ಯೂಬ್ ಚಾನೆಲ್‌ನಲ್ಲಿ ಬಿಡುಗಡೆಯಾಗಿದೆ. ಬ್ರೇಕಪ್ ಆದ ನಂತರ ಮತ್ತೆ ಶ್ವೇತಾ ಜತೆ ಸೇರಲು ದಿಗಿ ಮಾಡುವ ತುಂಟಾಟ ಹಾಗೂ ಕೀಟಲೆಯ ದೃಶ್ಯಗಳು ಈ ಹಾಡಿನಲ್ಲಿವೆ. ಈ ಹಾಡನ್ನು ಯೋಗರಾಜ್ ಭಟ್ ಗೀಚಿದ್ದರೆ, ನವೀನ್ ಸಜ್ಜು ಹಾಡಿಗೆ ದನಿ ನೀಡಿದ್ದಾರೆ.

ಈ ಹಾಡು ಇರಬೇಕಿತ್ತು

ಇನ್ನು ಈ ವಿಡಿಯೋ ಹಾಡನ್ನು ವೀಕ್ಷಿಸಿದ ವೀಕ್ಷಕರು ಇಂಥ ಒಳ್ಳೆ ಹಾಡನ್ನು ಯಾಕೆ ಸಿನಿಮಾದಿಂದ ತೆಗೆದು ಹಾಕಿದ್ರಿ ಎಂದು ಬಹುತೇಕರು ಕಾಮೆಂಟ್ ಮಾಡಿದ್ದಾರೆ. ದಿಗಂತ್ ಅವರಿಗಾಗಿ ಒಂದು ಹಾಡು ಇರುತ್ತೆ ಎಂಬ ನಿರೀಕ್ಷೆ ಇತ್ತು, ಹಾಡಿನ ಛಾಯಾಗ್ರಹಣ ಅದ್ಭುತ ಎಂಬ ಕಾಮೆಂಟ್‌ಗಳನ್ನು ಕೆಲ ವೀಕ್ಷಕರು ಮಾಡಿದ್ದಾರೆ.

ಈ ಹಾಡು ಇದ್ದಿದ್ರೆ ಜನ ಥಿಯೇಟರ್‌ನಿಂದ ಆಚೆ ಹೋಗ್ತಿದ್ರು!

ಇನ್ನು ಈ ಹಾಡು ಸಿನಿಮಾದಲ್ಲಿ ಇರಬೇಕಿತ್ತು ಎಂದು ಕೆಲವರು ಕಾಮೆಂಟ್ ಮಾಡಿದ್ದರೆ, ಇನ್ನೂ ಕೆಲವರು ಹಾಡು ಸುಮಾರಾಗಿದೆ ಚಿತ್ರದಿಂದ ತೆಗೆದು ಹಾಕಿದ್ದು ಒಳ್ಳೆಯದೇ ಆಯಿತು, ಇಲ್ಲದಿದ್ದರೆ ಚಿತ್ರಕತೆ ಮೇಲೆ ಪ್ರಭಾವ ಬೀರುತ್ತಿತ್ತು ಹಾಗೂ ಈ ಹಾಡು ಚಿತ್ರದಲ್ಲಿದ್ದಿದ್ರೆ ಜನ ಚಿತ್ರಮಂದಿರದಿಂದ ಹೊರ ಹೋಗ್ತಿದ್ರು ಹಾಡಿಗೆ ಕತ್ತರಿ ಹಾಕಿ ಒಳ್ಳೆಯ ಕೆಲಸ ಮಾಡಿದ್ರಿ ಎಂಬ ಅಭಿಪ್ರಾಯಗಳೂ ಸಹ ವ್ಯಕ್ತವಾಗಿವೆ. ಹೀಗೆ ಈ ಹಾಡು ಮಿಶ್ರ ಪ್ರತಿಕ್ರಿಯೆ ಪಡೆದುಕೊಳ್ಳುತ್ತಿದೆ.

ಇನ್ನೂ ನಿಂತಿಲ್ಲ ಗಾಳಿಪಟದ ಹಾರಾಟ

ಇನ್ನು ಗಾಳಿಪಟ 2 ಇಂದಿಗೆ ( ಸೆಪ್ಟೆಂಬರ್ 19 ) 38 ದಿನಗಳನ್ನು ಪೂರೈಸಿದ್ದು ಬೆಂಗಳೂರಿನ ಐದಾರು ಮಲ್ಟಿಪ್ಲೆಕ್ಸ್‌ಗಳು, ಮೈಸೂರಿನ ಪ್ರಭಾ ಚಿತ್ರಮಂದಿರ, ಹುಬ್ಬಳ್ಳಿ ಹಾಗೂ ತುಮಕೂರಿನ ಮಲ್ಟಿಪ್ಲೆಕ್ಸ್, ಶಿವಮೊಗ್ಗದ ಮಂಜುನಾಥ ಹಾಗೂ ಭಾರತ್ ಸಿನಿಮಾಸ್ ಮತ್ತು ರಾಜ್ಯದ ಇನ್ನಿತರ ಚಿತ್ರಮಂದಿರಗಳಲ್ಲಿ ಯಶಸ್ವಿ ಪ್ರದರ್ಶನ ಕಾಣುತ್ತಿದೆ.