ಮುಖಪುಟ

ಸಿನಿ ಸಮಾಚಾರ

'ಪೊಗರು' ಸಿನಿಮಾದ ಆಡಿಯೋ ಬಿಡುಗಡೆ ಕಾರ್ಯಕ್ರಮ ಇಂದು ದಾವಣಗೆರೆಯಲ್ಲಿ ಅದ್ಧೂರಿಯಾಗಿ ನಡೆಯಲಿದೆ. ಆದರೆ ಕಾರ್ಯಕ್ರಮಕ್ಕೂ ಮುನ್ನಾ, ಪೊಗರು ಸಿನಿಮಾದ ವಿಡಿಯೋ ಹಾಡೊಂದನ್ನು ಚಿತ್ರತಂಡ ಬಿಡುಗಡೆ ಮಾಡಿದೆ.

Recommended Video

ಈ ಹಿಂದೆ 'ಖರಾಬು ಬಾಸು ಖರಾಬು' ಹಾಡಿನ ವಿಡಿಯೋ ಬಿಡುಗಡೆ ಮಾಡಿದ್ದ ಚಿತ್ರತಂಡ ಈಗ 'ಪೊಗರು' ಸಿನಿಮಾದ 'ಪೊಗರು, ಅಣ್ಣನಿಗೆ ಪೊಗರು' ಎಂಬ ಮಾಸ್ ಹಾಡಿನ ವಿಡಿಯೋ ಬಿಡುಗಡೆ ಮಾಡಿದ್ದಾರೆ.

ಹಾಡಿನಲ್ಲಿ ರಾಕ್ಷಸಾವತಾರದಲ್ಲಿ ಕಾಣಿಸಿಕೊಂಡಿದ್ದಾರೆ ನಟ ಧ್ರುವ ಸರ್ಜಾ. ಉದ್ದನೆಯ ಕೂದಲು ಹಾರಿಸುತ್ತಾ, ಕೆದರಿದ ಗಡ್ಡ ನೇವರಿಸುತ್ತಾ, ಕಂಬದಂತಹಾ ತೋಳು ಪ್ರದರ್ಶಿಸಿ ಅದ್ಭುತವಾಗಿ ಕುಣಿದಿದ್ದಾರೆ ಧ್ರುವ ಸರ್ಜಾ.

ಹಾಡಿನ ಮೇಕಿಂಗ್ ಅದ್ಭುತವಾಗಿದೆ, ಧ್ರುವ ಸರ್ಜಾ ಅಭಿಮಾನಿಗಳಿಗಾಗಿಯೇ ಮಾಡಿದಂತಿದೆ 'ಪೊಗರು' ಹಾಡು. ಹಾಡಿನಲ್ಲಿ ಚೆನ್ನಾಗಿ ಡಾನ್ಸ್ ಮಾಡಿದ್ದಾರೆ ಧ್ರುವ ಸರ್ಜಾ. ವಿಶೇಷವೆಂದರೆ ಹಾಡಿನಲ್ಲಿ 'ಪೊಗರು' ನಿರ್ದೇಶಕ ನಂದ ಕಿಶೋರ್ ಸಹ ಡಾನ್ಸ್ ಮಾಡಿದ್ದಾರೆ. ಜೊತೆಗೆ ಡಾನ್ಸ್ ಕೊರಿಯೋಗ್ರಾಫರ್ ಮುರಳಿ ಸಹ ಹಾಡಿನಲ್ಲಿ ಕಾಣಿಸಿಕೊಂಡಿದ್ದಾರೆ.

ಫೆಬ್ರವರಿ 14 ರಂದು ಯಾವ ವಿಡಿಯೋ ಹಾಡು ಬಿಡುಗಡೆ ಮಾಡಬೇಕು ಎಂದು ಸಾಮಾಜಿಕ ಜಾಲತಾಣದಲ್ಲಿ ಪ್ರಶ್ನೆ ಮಾಡಿ ಪೋಲ್ ನೀಡಿದ್ದರು ಧ್ರುವ ಸರ್ಜಾ. ಅಂತೆಯೇ ಅಭಿಮಾಣನಿಗಳು 'ಪೊಗರು' ಹಾಡು ಬಿಡುಗಡೆ ಮಾಡುವಂತೆ ಹೆಚ್ಚು ಮತ ಹಾಕಿದ್ದ ಕಾರಣ ಇದೀಗ 'ಪೊಗರು' ಹಾಡನ್ನೇ ಬಿಡುಗಡೆ ಮಾಡಲಾಗಿದೆ.

ಈ ಹಾಡಿಗೆ ಸಂಗೀತ ಮತ್ತು ಸಾಹಿತ್ಯ ರ್ಯಾಪರ್ ಚಂದನ್ ಶೆಟ್ಟಿಯದ್ದು. ಖರಾಬು ಹಾಡಿಗೆ ಸಹ ಅವರದ್ದೇ ಸಂಗೀತ ಮತ್ತು ಸಾಹಿತ್ಯ. ಚಂದನ್ ಶೆಟ್ಟಿ, ಶಶಾಂಕ್ ಶೇಷಗಿರಿ, ಅನಿರುದ್ಧ ಶಾಸ್ತ್ರಿ ಹಾಡನ್ನು ಹಾಡಿದ್ದಾರೆ.

ಪೊಗರು ಸಿನಿಮಾವು ಫೆಬ್ರವರಿ 19 ರಂದು ರಾಜ್ಯದಾದ್ಯಂತ ಬಿಡುಗಡೆ ಆಗಲಿದೆ. ಇಂದು ದಾವಣಗೆರೆಯಲ್ಲಿ ಸಿನಿಮಾದ ಆಡಿಯೋ ಬಿಡುಗಡೆ ಕಾರ್ಯಕ್ರಮ ಬಹು ಅದ್ಧೂರಿಯಾಗಿ ನಡೆಯುತ್ತಿದೆ.