ಪ್ರಭುದೇವ ಕನ್ನಡದಲ್ಲಿ ಸಾಲು ಸಾಲು ಸಿನಿಮಾ: ತಮಿಳಿನಲ್ಲಿ ಬೇಡಿಕೆ ಕುಂದಿತಾ?

ಇಷ್ಟು ದಿನ ಕನ್ನಡದಿಂದ ದೂರ ಇದ್ದ ಪ್ರಭುದೇವ!

ಪ್ರಭುದೇವ ತಮ್ಮ ಸಿನಿಮಾ ಜರ್ನಿಯನ್ನು ಶುರು ಮಾಡಿದ್ದೆ, ತಮಿಳು ತೆಲುಗು ಸಿನಿಮಾರಂಗದಿಂದ. ಹಾಗಾಗಿ ಅವರು ಕನ್ನಡದ ಸಿನಿ ಪರದೆ ಮೇಲೆ ಕಾಣಿಸಿಕೊಳ್ಳಲು ಹೆಚ್ಚು ಕಾಲ ಬೇಕಾಯ್ತು. ಆದರೆ ಕನ್ನಡದಲ್ಲೂ ಹೆಚ್ಚು ಸಿನಿಮಾ ಮಾಡಿಲ್ಲ. ಉಪೇಂದ್ರ ಜೊತೆಗೆ 'ಹೆಚ್ 2 ಓ' ಸಿನಿಮಾದಲ್ಲಿ ವೈರಮುತ್ತು ಪಾತ್ರ ಮಾಡಿ ಎಲ್ಲರ ಮನ ಗೆದ್ದಿದ್ದರು ಪ್ರಭುದೇವ. ಇಷ್ಟು ದಿನ ಕನ್ನಡದಿಂದ ದೂರ ಇದ್ದ ಪ್ರಭುದೇವ ಈಗ ಸಾಲು, ಸಾಲು ಸಿನಿಮಾ ಮಾಡುತ್ತಾ ಇದ್ದಾರೆ.

ಪುನೀತ್ ರಾಜ್‌ಕುಮಾರ್ ಜೊತೆ ಪ್ರಭುದೇವ ಕಮ್‌ಬ್ಯಾಕ್!

ಇತ್ತೀಚೆಗೆ ಪ್ರಭುದೇವ ಕಮ್‌ಬ್ಯಾಕ್ ಮಾಡಿದ್ದು ನಟ ಪುನೀತ್ ರಾಜ್‌ಕುಮಾರ್ ಜೊತೆಗೆ. ನಟ ಕೃಷ್ಣ ಅಭಿನಯದ 'ಲಕ್ಕಿ ಮ್ಯಾನ್' ಸಿನಿಮಾದಲ್ಲಿ ಪುನೀತ್ ರಾಜ್‌ಕುಮರ್ ಅಭಿನಯಿಸಿದ್ದಾರೆ. ಇನ್ನು ಪುನೀತ್ ರಾಜ್‌ಕುಮಾರ್‌ ಜೊತೆಗೆ ಹಾಡೊಂದರಲ್ಲಿ ಪ್ರಭುದೇವ ಕಾಣಿಸಿಕೊಂಡಿದ್ದಾರೆ. ಈ ವಿಡಿಯೋ ಈ ಹಿಂದೆ ವೈರಲ್ ಆಗಿತ್ತು. ಇನ್ನು ಲಕ್ಕಿ ಮ್ಯಾನ್ ಸಿನಿಮಾದಲ್ಲಿ ಇವರ ಪಾತ್ರ ಹೇಗಿರಲಿದೆ ಎನ್ನುವ ಬಗ್ಗೆ ಕುತೂಹಲ ಮೂಡಿದೆ.

ಶಿವರಾಜ್ ಕುಮಾರ್ ಜೊತೆ ಪ್ರಭುದೇವ!

ಶಿವರಾಜ್ ಕುಮಾರ್ ಜೊತೆಗೆ ನಟ ಪ್ರಭುದೇವ ಸಿನಿಮಾ ಪ್ರಕಟವಾಗಿದೆ. ಯೋಗರಾಜ್ ಭಟ್ ನಿರ್ದೇಶನದಲ್ಲಿ ಈ ಸಿನಿಮಾ ಮೂಡಿ ಬರಲಿದೆ. ಇನ್ನು ಇತ್ತೀಚೆಗೆ ಇದರ ಬಗ್ಗೆ ನಿರ್ದೇಶಕ ಯೋಗರಾಜ್ ಭಟ್ ಅಧಿಕೃತವಾಗಿ ಪೋಸ್ಟ್ ಒಂದನ್ನು ಹಂಚಿಕೊಂಡಿದ್ದರು. ಇವರ ಕಂಬಿನೇಷನ್ ಬಗ್ಗೆಯೇ ಹೆಚ್ಚಿನ ಕುತೂಹಲ ಮೂಡಿದೆ. 1960ರಲ್ಲಿ ನಡೆಯುವ ಆ್ಯಕ್ಷನ್‌ ಡ್ರಾಮಾ ಕಥೆ ಇದಾಗಿದ್ದು, ಶಿವರಾಜ್ ಕುಮಾರ್‌ ಮತ್ತು ಪ್ರಭುದೇವ ಇಬ್ಬರೂ ವಿಭಿನ್ನವಾಗಿ ಕಾಣಿಸಿಕೊಳ್ಳಲಿದ್ದಾರೆ.

ಸಂದೇಶ್ ಬ್ಯಾನರ್‌ನಲ್ಲಿ ಪ್ರಭುದೇವ ಸಿನಿಮಾ!

ಇದರ ಜೊತೆಗೆ ಈಗ ಮತ್ತೊಂದು ಸಿನಿಮಾ ಪ್ರಕಟ ಆಗಿದೆ. ಕನ್ನಡ ನಿರ್ಮಾಪಕ ಸಂದೇಶ್ ಪ್ರಭುದೇವ ಹೊಸ ಸಿನಿಮಾಗೆ ಬಂಡವಾಳ ಹಾಕುತ್ತಿದ್ದಾರೆ. ಇದು ಪ್ಯಾನ್ ಇಂಡಿಯಾ ಸಿನಿಮಾ ಆಗಿರಲಿದೆ. ಕನ್ನಡ ಸಿನಿಮಾ ಸೇರಿದಂತೆ ತಮಿಳು, ತೆಲುಗು, ಹಿಂದಿ, ಮಲಯಾಳಂನಲ್ಲಿ ಈ ಸಿನಿಮಾ ನಿರ್ಮಾಣ ಆಗಲಿದೆ. ಈ ಮೂಲಕ ಸದ್ಯ ಒಟ್ಟು 3 ಕನ್ನಡ ಸಿನಿಮಾಗಳಲ್ಲಿ ಪ್ರಭುದೇವ ಕಾಣಿಸಿಕೊಳ್ಳುತ್ತಾ ಇದ್ದಾರೆ.