ಪ್ರಕಾಶ್ 'ಗೋಕುಲ'ದಲ್ಲಿ ವಿಜಯ ರಾಘವೇಂದ್ರ

ಪುನೀತ್ ರಾಜ್ ಕುಮಾರ್ ಮತ್ತು ನಿಖಿತಾ ಅಭಿನಯದ 'ವಂಶಿ' ಚಿತ್ರ ನಿರ್ದೇಶಿಸಿದ್ದ ಪ್ರಕಾಶ್ ಮತ್ತೆ ಹಿಂತಿರುಗಿದ್ದಾರೆ. ಕಳೆದ ವರ್ಷ ಬಿಡುಗಡೆ ಕಂಡ 'ವಂಶಿ' ಚಿತ್ರ ಪರ್ವಾಗಿಲ್ಲ ಎನ್ನಿಸಿಕೊಂಡಿತ್ತು. ಈ ಬಾರಿ ಅವರು ವಿಜಯ್ ರಾಘವೇಂದ್ರ ಅವರನ್ನು ತಮ್ಮ ಚಿತ್ರಕ್ಕೆ ನಾಯಕ ನಟನಾಗಿ ಆಯ್ಕೆ ಮಾಡಿಕೊಂಡಿದ್ದಾರೆ. ಚಿತ್ರಕ್ಕೆ 'ಗೋಕುಲ' ಎಂದು ಹೆಸರಿಡಲಾಗಿದೆ.

ವಿಜಯ್ ರಾಘವೇಂದ್ರ ಅವರೊಂದಿಗೆ ಪ್ರಕಾಶ್ ನಿರ್ದೇಶಿಸುತ್ತಿರುವ ನಾಲ್ಕನೆ ಚಿತ್ರ ಇದಾಗಲಿದೆ. ಈ ಹಿಂದೆ ಖುಷಿ, ರಿಷಿ ಮತ್ತು ಶ್ರೀ ಚಿತ್ರಗಳನ್ನು ಪ್ರಕಾಶ್ ನಿರ್ದೇಶಿಸಿದ್ದರು. ಮೊದಲ ಚಿತ್ರ 'ಖುಷಿ' ದಾಖಲೆ ನಿರ್ಮಿಸಿತ್ತು. ಎರಡನೆ ಚಿತ್ರ ರಿಷಿ ಪರ್ವಾಗಿಲ್ಲ ಎನ್ನಿಸಿಕೊಂಡಿತ್ತು. ಆದರೆ ಮೂರನೇ ಚಿತ್ರ ಶ್ರೀ ಮಾತ್ರ ಬಾಕ್ಸಾಫೀಸಲ್ಲಿ ಮಕಾಡೆ ಮಲಗಿತ್ತು.

ಈ ಚಿತ್ರದಲ್ಲಿ ಯಶ್ ವಿಶೇಷ ಪಾತ್ರದಲ್ಲಿ ಕಾಣಿಸಲಿದ್ದಾರೆ. ಪೂಜಾಗಾಂಧಿ, ನಕ್ಷತ್ರಾ ಚಿತ್ರದ ಇಬ್ಬರು ನಾಯಕಿಯರು. ಒಬ್ಬರು ಯಶ್ ಗೆ ಜೋಡಿಯಾದರೆ ಮತ್ತೊಬ್ಬರು ವಿಜಯ್ ರಾಘವೇಂದ್ರಗೆ ಜೊತೆಯಾಗಲಿದ್ದಾರೆ. ಗೋಕುಲಕ್ಕೆ ಮನೋಮೂರ್ತಿ ಅವರ ಸಂಗೀತ ಮತ್ತು ಸತ್ಯ ಹೆಗಡೆ ಅವರ ಛಾಯಾಗ್ರಹಣವಿದೆ.

(ದಟ್ಸ್ ಕನ್ನಡ ಚಿತ್ರವಾರ್ತೆ)