ಶ್ರೀದೇವಿ ಸಾವಿಗೆ 'ರಾಜಕುಮಾರ' ನಟಿ ಪ್ರಿಯಾ ಆನಂದ್ ಕಾರಣ ಎಂದು ಟ್ರೋಲ್

ಇಂಗ್ಲಿಷ್ ವಿಂಗ್ಲಿಷ್ ಚಿತ್ರದಲ್ಲಿ ನಟನೆ

ಶ್ರೀದೇವಿ ಮುಖ್ಯಭೂಮಿಕೆಯಲ್ಲಿ ನಟಿಸಿದ್ದ ಇಂಗ್ಲಿಷ್ ವಿಂಗ್ಲಿಷ್ ಚಿತ್ರದಲ್ಲಿ ಯುವ ನಟಿ ಪ್ರಿಯಾ ಆನಂದ್ ಕೂಡ ನಟಿಸಿದ್ದರು. ಸಿನಿಮಾ ಪೂರ್ತಿ ಶ್ರೀದೇವಿ ಅವರ ಜೊತೆಯಲ್ಲೇ ಇರುವಂತಹ ಪಾತ್ರ ಮಾಡಿದ್ದ ಪ್ರಿಯಾಗೆ ಇದು ಮೊದಲ ಬಾಲಿವುಡ್ ಸಿನಿಮಾ ಕೂಡ ಆಗಿತ್ತು. ಈ ಚಿತ್ರದಲ್ಲೇ ನಟಿಸಿದ್ದೇ ಈಗ ಆಕೆಯ ಮೇಲೆ ಟೀಕೆ ಕೇಳಿಬರುವಂತಾಗಿದೆ.

ಪ್ರಿಯಾ ಅವರಿಂದಲೇ ಶ್ರೀದೇವಿ ಸಾವು.!

ಪ್ರಿಯಾ ಆನಂದ್ ಅವರ ಬ್ಯಾಡ್ ಲಕ್ ಬಗ್ಗೆ ಟೀಕಿಸಿರುವ ವ್ಯಕ್ತಿಯೊಬ್ಬ ಆಕೆಯ ಬ್ಯಾಡ್ ಲಕ್ ನಿಂದಲೇ ಶ್ರೀದೇವಿ ಸತ್ತಿದ್ದು ಎಂದು ಕಟುವಾಗಿ ಟೀಕಿಸಿದ್ದಾರೆ. ಶ್ರೀದೇವಿ ಜೊತೆ ಇಂಗ್ಲಿಷ್ ವಿಂಗ್ಲಿಷ್ ಸಿನಿಮಾ ಮಾಡಿದ್ರು. ಅಲ್ಲಿ ಶ್ರೀದೇವಿ ನಿಧನವಾದರು. ಆಮೇಲೆ ಎಲ್.ಕೆ.ಜಿ ಅಂತ ಸಿನಿಮಾ ಮಾಡಿದ್ರು ಆ ಚಿತ್ರದಲ್ಲಿ ನಟಿಸಿದ್ದ ಆರ್.ಕೆ ರಿತೇಶ್ ಸಾವನ್ನಪ್ಪಿದರು. ಇದೆಲ್ಲವೂ ಪ್ರಿಯಾ ಅವರ ಐರನ್ ಲೆಗ್ ಕಾರಣ, ಆಕೆ ಜೊತೆ ಸಿನಿಮಾ ಮಾಡಿದ್ರೆ ಯಾರಾದರೂ ಸಾಯ್ತಾರೆ ಎಂದು ಬಹಳ ಕಠಿಣವಾಗಿ ಕಾಮೆಂಟ್ ಮಾಡಿದ್ದಾರೆ.

ತಿರುಗೇಟು ನೀಡಿದ ಪ್ರಿಯಾ

ಆ ವ್ಯಕ್ತಿಗೆ ಬಹಳ ಸಮಾಧಾನವಾಗಿ ಪ್ರತಿಕ್ರಿಯೆ ನೀಡಿರುವ ಪ್ರಿಯಾ ಆನಂದ್ ''ನಾನು ಇಂತಹ ವ್ಯಕ್ತಿಗಳ ಬಗ್ಗೆ ಪ್ರತಿಕ್ರಿಯೆ ನೀಡಲ್ಲ. ಆದ್ರೆ, ಇದು ಬಹಳ ಸೂಕ್ಷ್ಮವಾದ ವಿಷಯದ ಎಂಬುದು ನಿನ್ನ ಗಮನಕ್ಕೆ ಇರಲಿ. ಸೋಶಿಯಲ್ ಮೀಡಿಯಾದಲ್ಲಿ ಗಮನ ಸೆಳೆಯುವುದು ತುಂಬಾ ಸುಲಭವಾದ ಕೆಲಸ. ಆದ್ರೆ, ಇದಕ್ಕೆ ಉತ್ತರ ಕೊಡುವ ಮೂಲಕ ನಿಮ್ಮನ್ನು ಕೀಳು ಮಟ್ಟಕ್ಕೆ ತರಲು ನಾನು ಇಚ್ಛಿಸಲ್ಲ' ಎಂದು ಟ್ವೀಟ್ ಮಾಡಿದ್ದಾರೆ.

ವ್ಯಕ್ತಿ ವಿರುದ್ಧ ಆಕ್ರೋಶಗೊಂಡ ಜನರು

ನಟಿ ಪ್ರಿಯಾ ಆನಂದ್ ಅವರ ಬಗ್ಗೆ ಇಷ್ಟು ಗಂಭೀರವಾಗಿ ಟೀಕೆ ಮಾಡಿದ್ದಕ್ಕೆ ಆ ಅನಾಮಿಕ ವ್ಯಕ್ತಿಯ ವಿರುದ್ಧ ಜನಸಾಮಾನ್ಯರು ಆಕ್ರೋಶ ವ್ಯಕ್ತಪಡಿಸಿದರು. ಇಂತವರಿಗೆಲ್ಲಾ ನೀವು ಉತ್ತರ ಕೊಡಬೇಡಿ ಎಂದು ಕಿವಿಮಾತು ಹೇಳಿ ಬೆಂಬಲಕ್ಕೆ ನಿಂತರು.

ಕ್ಷಮೆ ಕೇಳಿದ ಆ ವ್ಯಕ್ತಿ

ನಂತರ ಈ ವಿಷ್ಯದ ಬಗ್ಗೆ ದೊಡ್ಡ ಮಟ್ಟದ ಚರ್ಚೆ ನಡೆದಿದೆ. ಇದನ್ನ ಗಮನಿಸಿದ ಆ ವ್ಯಕ್ತಿ ಪ್ರಿಯಾ ಆನಂದ್ ಅವರ ಕ್ಷಮೆ ಕೇಳಿದ್ದಾನೆ. ''ನಾನು ಕ್ಷಮೆ ಕೇಳುತ್ತೇನೆ, ನನ್ನ ತಪ್ಪಿನ ಅರಿವು ಆಗಿದೆ. ನಿನ್ನ ಎಲ್.ಕೆ.ಜಿ ಮತ್ತು ಇಂಗ್ಲಿಷ್ ವಿಂಗ್ಲಿಷ್ ಎರಡು ಚಿತ್ರಗಳನ್ನ ನಾನು ನೋಡಿದೆ. ಈ ಎರಡು ಚಿತ್ರಗಳಲ್ಲಿ ನೀವು ಸಾಮಾನ್ಯವಾಗಿ ಕಂಡುಬಂದ ಕಾರಣ ನನ್ನಲ್ಲಿ ಆ ಪ್ರಶ್ನೆ ಮೂಡಿತ್ತು. ಹಾಗೆ ಸುಮ್ಮನೆ ಟ್ವೀಟ್ ಮಾಡಿದೆ. ನೀವು ಟ್ವೀಟ್ ಓದಲ್ಲ ಅಂದುಕೊಂಡಿದ್ದೆ. ನಿಮ್ಮನ್ನು ನೋಯಿಸಿದಕ್ಕೆ ಕ್ಷಮೆ ಕೇಳುತ್ತೇನೆ'' ಎಂದಿದ್ದಾರೆ.