ಪುನೀತ್ ಅಜರಾಮರ: ಆರ್ದ್ರಗೊಳಿಸುತ್ತದೆ ಪಿಆರ್‌ಕೆ ಸಲ್ಲಿಸಿದ ಗೌರವ

ವರ್ಷದ ಬದಲಿಗೆ ಅನಂತದ ಚಿಹ್ನೆ

'ಪ್ರೀತಿತುಂಬಿದ ನೆನಪಲ್ಲಿ ಶ್ರೀ ಪುನೀತ್ ರಾಜ್‌ಕುಮಾರ್' ಎಂಬ ಸಾಲಿನೊಂದಿಗೆ ಪುನೀತ್ ರಾಜ್‌ಕುಮಾರ್ ಅವರ ನಗುವ ಚಿತ್ರ ಪ್ರಕಟಿಸಲಾಗಿದೆ. ಬಳಿಕ ಪುನೀತ್ ಜನನದ ವರ್ಷವಾದ 1975 ಎಂದು ಬರೆದು ಮುಂದೆ ನಿಧನದ ವರ್ಷ ಬರೆವ ಜಾಗದಲ್ಲಿ ಇನ್‌ಫಿನಿಟಿ (ಅನಂತ) ಚಿಹ್ನೆ ಬಳಸಲಾಗಿದೆ. ಆ ಮೂಲಕ ಪುನೀತ್‌ ಎಂಬ 'ಶಕ್ತಿ'ಗೆ ವ್ಯಕ್ತಿತ್ವಕ್ಕೆ ಸಾವೇ ಇಲ್ಲ ಎಂದು ಸಾರಲಾಗಿದೆ. ಜೊತೆಗೆ 'ಸದಾ ನಮ್ಮ ಹೃದಯಗಳಲ್ಲಿ' ಎಂದು ಬರೆಯಲಾಗಿದೆ.

ತಲೆಮಾರುಗಳ ವರೆಗೆ ನೆನಪು ಮುಂದುವರೆಯಲಿದೆ

ಪುನೀತ್ ಇನ್ನಿಲ್ಲ ಎಂದು ಹೇಳಲು ಅಥವಾ ಒಪ್ಪಿಕೊಳ್ಳಲು ಸಹ ಅಶ್ವಿನಿ ಅವರಿಗೆ ಸಾಧ್ಯವಾಗಿಲ್ಲ ಎನಿಸುತ್ತದೆ. ಹಾಗಾಗಿಯೇ ಅವರು ನಿಧನದ ವರ್ಷದ ಬಳಿ ಅನಂತದ ಚಿಹ್ನೆ ಬಳಸಿದ್ದಾರೆ. ಅವರು ಬಳಸಿರುವ ಅನಂತದ ಚಿಹ್ನೆ ಸೂಕ್ತವಾಗಿಯೇ ಇದೆ. ಪುನೀತ್ ನೆನಪು ಬಹುತಲೆಮಾರುಗಳವರೆಗೆ ಮುಂದುವರೆಯಲಿದೆ. ಪುನೀತ್ ಸುಲಭಕ್ಕೆ ಮರೆಯಬಹುದಾದ ವ್ಯಕ್ತಿಯಲ್ಲ, ಮರೆತುಬಿಡಬಹುದಾದ ವ್ಯಕ್ತಿತ್ವವೂ ಅವರದ್ದಲ್ಲ.

ಪುನೀತ್ ಅಗಲಿದ ಬಳಿಕ ಬಿಡುಗಡೆ ಆದ ಸಿನಿಮಾ

ದಾನಿಶ್ ಸೇಠ್ ನಟನೆಯ 'ಒನ್ ಕಟ್ ಟು ಕಟ್' ಸಿನಿಮಾ ಪಿಆರ್‌ಕೆ ಪ್ರೊಡಕ್ಷನ್ಸ್ ಮೂಲಕ ಬಿಡುಗಡೆ ಆಗುತ್ತಿರುವ ಐದನೇ ಸಿನಿಮಾ. ಪುನೀತ್ ಅಗಲಿಕೆಯ ಬಳಿಕ ಅವರ ನಿರ್ಮಾಣ ಸಂಸ್ಥೆಯಿಂದ ಬಿಡುಗಡೆ ಆದ ಮೊದಲ ಸಿನಿಮಾ. ದಾನಿಶ್ ಸೇಠ್‌ ಬಗ್ಗೆ ವಿಶೇಷ ಪ್ರೀತಿ ಹೊಂದಿದ್ದ ಪುನೀತ್ ರಾಜ್‌ಕುಮಾರ್ ಈ ಮೊದಲು ದಾನಿಶ್ ನಾಯಕನಾಗಿದ್ದ 'ಫ್ರೆಂಚ್ ಬಿರಿಯಾನಿ' ಸಿನಿಮಾ ನಿರ್ಮಾಣ ಮಾಡಿದ್ದರು.

ಮೂರು ಸಿನಿಮಾಗಳು ಬಿಡುಗಡೆಗೆ ರೆಡಿ

ಪಿಆರ್‌ಕೆ ಪ್ರೊಡಕ್ಷನ್‌ನಲ್ಲಿ ಇನ್ನೂ ಮೂರು ಸಿನಿಮಾಗಳು ನಿರ್ಮಾಣವಾಗಿದ್ದು ಬಿಡುಗಡೆಗೆ ತಯಾರಾಗಿವೆ. 'ಒನ್ ಕಟ್ ಟು ಕಟ್' ಬಳಿಕ 'ಫ್ಯಾಮಿಲಿ ಪ್ಯಾಕ್' ಸಿನಿಮಾ ಬಿಡುಗಡೆ ಆಗಲಿದೆ. ಆ ಸಿನಿಮಾದ ಬಳಿಕ 'ರಾಮಾ ರಾಮಾ ರೇ' ಖ್ಯಾತಿಯ ಸತ್ಯ ನಿರ್ದೇಶನದ 'ಮ್ಯಾನ್ ಆಫ್‌ ದಿ ಮ್ಯಾಚ್' ಸಿನಿಮಾ ಬಿಡುಗಡೆ ಆಗಲಿದೆ. ಬಳಿಕ 'ಓ2' ಹೆಸರಿನ ಸಿನಿಮಾ ಬಿಡುಗಡೆ ಆಗಲಿದೆ. 'ಫ್ಯಾಮಿಲಿ ಪ್ಯಾಕ್' ಹಾಗೂ 'ಮ್ಯಾನ್ ಆಫ್‌ ದಿ ಮ್ಯಾಚ್' ಸಿನಿಮಾಗಳು ಅಮೆಜಾನ್ ಪ್ರೈಂನಲ್ಲಿಯೇ ಬಿಡುಗಡೆ ಆಗಲಿರುವುದು ವಿಶೇಷ.

ಚಿತ್ರಮಂದಿರಗಳಲ್ಲಿ 'ಗಂಧದ ಗುಡಿ'

ಪುನೀತ್ ರಾಜ್‌ಕುಮಾರ್ ಅವರ ಭಿನ್ನ ಪ್ರಯತ್ನ 'ಗಂಧದ ಗುಡಿ' ಟ್ರಾವೆಲ್ ಸಿನಿಮಾ ಸಹ ಪಿಆರ್‌ಕೆಯಿಂದಲೇ ನಿರ್ಮಾಣಗೊಂಡಿದ್ದು ಈ ಸಿನಿಮಾ ಮಾತ್ರ ಚಿತ್ರಮಂದಿರಗಳಲ್ಲಿ ಬಿಡುಗಡೆ ಆಗುವ ಸಾಧ್ಯತೆ ಇದೆ. ಅಮೋಘವರ್ಷ ಹಾಗೂ ಪುನೀತ್ ರಾಜ್‌ಕುಮಾರ್ ಅವರು ರಾಜ್ಯದ ಹಲವು ಕಾಡು-ಮೇಡು, ಜಲಪಾತಗಳು ಸುತ್ತಿ ವಿಡಿಯೋ ದೃಶ್ಯಗಳನ್ನು ಸೆರೆ ಹಿಡಿದುಕೊಂಡು ಬಂದಿದ್ದು, ರಾಜ್ಯದ ಪ್ರಕೃತಿ ಸಂಪತ್ತನ್ನು ವೀಕ್ಷಕರ ಮುಂದೆ ಪ್ರಸ್ತುತಪಡಿಸಿದ್ದಾರೆ. ಈ ಸಿನಿಮಾದ ಚಿತ್ರೀಕರಣ ಬಹುತೇಕ ಅಂತ್ಯಗೊಂಡಿದ್ದು ಸಿನಿಮಾದ ಪೋಸ್ಟ್ ಪ್ರೊಡಕ್ಷನ್ ಕಾರ್ಯ ಶುರುವಾಗಲಿದೆ. ಮಾರ್ಚ್ ಅಥವಾ ಏಪ್ರಿಲ್‌ನಲ್ಲಿ ಸಿನಿಮಾ ಬಿಡುಗಡೆ ಆಗಲಿದೆ. ಪುನೀತ್ ನಾಯಕ ನಟನಾಗಿ ಅಭಿನಯಿಸಿದ ಕೊನೆಯ ಸಿನಿಮಾ 'ಜೇಮ್ಸ್' ಮಾರ್ಚ್ 17 ಕ್ಕೆ ಬಿಡುಗಡೆ ಆಗಲಿದೆ.