ಪುನೀತ್ - ಸಂತೋಷ್ ಸಿನಿಮಾದ ಟೈಟಲ್ ಇದೇ ಅಂತೆ

'ಕ್ರಾಂತಿವೀರ'

ಈ ಹಿಂದೆ ದರ್ಶನ್ 'ಕ್ರಾಂತಿವೀರ ಸಂಗೊಳ್ಳಿ ರಾಯಣ್ಣ' ಎಂಬ ಸಿನಿಮಾ ಮಾಡಿದ್ದರು. ಆದರೆ ಈಗ ಪುನೀತ್ ರಾಜ್ ಕುಮಾರ್ ಚಿತ್ರಕ್ಕೆ 'ಕ್ರಾಂತಿವೀರ' ಎಂಬ ಹೆಸರನ್ನು ನಾಮಕರಣ ಮಾಡಲಾಗಿದೆ ಎಂಬ ಸುದ್ದಿ ಕೇಳಿ ಬಂದಿದೆ. ಈ ಚಿತ್ರಕ್ಕೆ ಇದೇ ಟೈಟಲ್ ಅಂತಿಮ ಎಂಬ ಮಾತಿದೆ.

ರಾಜಣ್ಣನ ಚಿತ್ರದ ಹೆಸರು

ವಿಶೇಷ ಅಂದರೆ, ತಮ್ಮ ಮೊದಲ ಸಿನಿಮಾದಲ್ಲಿ ವಿಷ್ಣುವರ್ಧನ್ ಹಾಗೂ ಎರಡನೇ ಸಿನಿಮಾದಲ್ಲಿ ರಾಜ್ ಕುಮಾರ್ ಅವರ ಆರಾದನೆ ಮಾಡಿದ್ದ ಸಂತೋಷ್ ಆನಂದ್ ರಾಮ್ ಈ ಚಿತ್ರಕ್ಕೆ ಸಹ ರಾಜ್ ಕುಮಾರ್ ಅವರ ಚಿತ್ರದ ಹೆಸರನ್ನು ಇಟ್ಟಿದ್ದಾರೆ. 'ಕ್ರಾಂತಿವೀರ', 1972 ರಲ್ಲಿ ತೆರೆಗೆ ಬಂದ ರಾಜಣ್ಣನ ಚಿತ್ರವಾಗಿದೆ.

ಈ ಹಿಂದೆ ಕೇಳಿ ಬಂದ ಟೈಟಲ್ ಗಳು

ಈ ಸಿನಿಮಾದ ಟೈಟಲ್ ಏನು ಎನ್ನುವ ಪ್ರಶ್ನೆ ಸಾಕಷ್ಟು ದಿನದಿಂದ ಇತ್ತು. ಸಿನಿಮಾಗೆ 'ದೇವತಾ ಮನುಷ್ಯ', 'ಪರಶುರಾಮ', 'ಜ್ವಾಲಾಮುಖಿ' ಎಂಬ ಹೆಸರು ಇಡಬಹುದು ಎಂಬ ಊಹೆ ಇತ್ತು. ಈ ಎಲ್ಲ ಹೆಸರುಗಳು ರಾಜ್ ಕುಮಾರ್ ಅವರ ಹಳೆಯ ಚಿತ್ರಗಳ ಹೆಸರಾಗಿವೆ.

ಅಭಿಮಾನಿಯ ಕೈನಲ್ಲಿ ಟೈಟಲ್ ಲಾಂಚ್

ಪುನೀತ್ ರಾಜ್ ಕುಮಾರ್ ಅವರ ಈ ಸಿನಿಮಾದ ಟೈಟಲ್ ಅನ್ನು ಅಭಿಮಾನಿ ದೇವರು ಲಾಂಚ್ ಮಾಡಲಿದ್ದಾರೆ. ಆ ಅದೃಷ್ಟದ ಅಭಿಮಾನಿ ಯಾರು ಎನ್ನುವ ಕುತೂಹಲ ಎಲ್ಲರಲ್ಲಿ ಇದೆ. ನವೆಂಬರ್ 1 ರಂದು ಕನ್ನಡ ರಾಜ್ಯೋತ್ಸವದ ವಿಶೇಷವಾಗಿ ಟೈಟಲ್ ರಿಲೀಸ್ ಆಗಲಿದೆ.

ಅಪ್ಪು ಅವರ 29ನೇ ಸಿನಿಮಾ

ಅಂದಹಾಗೆ, ಈ ಸಿನಿಮಾ ಪುನೀತ್ ನಟನೆಯ 29ನೇ ಸಿನಿಮಾವಾಗಿದೆ. ಅಲ್ಲದೆ, ಸಂತೋಷ್ ಆನಂದ್ ರಾಜ್ ಅವರ 3ನೇ ಹಾಗೂ ಹೊಂಬಾಳೆ ಪ್ರೊಡಕ್ಷನ್ಸ್ ನ 6ನೇ ಚಿತ್ರವಾಗಿದೆ. 'ರಾಜಕುಮಾರ' ನಂತರ ಅದೇ ನಿರ್ಮಾಪಕ, ನಿರ್ದೇಶಕ, ನಟ ಸೇರಿ ಈ ಸಿನಿಮಾ ಮಾಡುತ್ತಿದ್ದಾರೆ.