ಅಪ್ಪು ಬರ್ತ್ ಡೇ ದಿನವೇ 'ಜೇಮ್ಸ್' ರಿಲೀಸ್, ಇದು ಪುನೀತ್‌ ಕನಸು!

ಮಾರ್ಚ್ 17 ಚಿತ್ರ ರಿಲೀಸ್, ಪುನೀತ್‌ ದೊಡ್ಡ ಆಸೆ!

ನಟ ಪುನೀತ್‌ ರಾಜ್‌ಕುಮಾರ್ ಅವರ ಅಪರೂಪದ ಕನಸಿನ ಬಗ್ಗೆ 'ಜೇಮ್ಸ್' ಚಿತ್ರದ ನಿರ್ಮಾಪಕ ಕಿಶೋರ್ ಪಾತಿಕೊಂಡ ಫಿಲ್ಮಿಬೀಟ್ ಜೊತೆಗೆ ಮಾತನಾಡಿದ್ದಾರೆ. "ಹೀಗೆ ಸಿನಿಮಾ ಬಗ್ಗೆ ಮಾತನಾಡುವ ಪುನೀತ್ ರಾಜ್‌ಕುಮಾರ್ ಅವರು ತಮ್ಮ ಆಸೆ ಬಗ್ಗೆ ಹೇಳಿಕೊಂಡಿದ್ದರು. ಮಾರ್ಚ್ 17 ಹುಟ್ಟುಹಬ್ಬಕ್ಕೆ ಒಂದು ಸಿನಿಮಾ ರಿಲೀಸ್ ಮಾಡಬೇಕು, ಇಲ್ಲಿ ತನಕ ಆಗಿಲ್ಲ, ಹುಟ್ಟುಹಬ್ಬ ಜೊತೆಗೆ ರಾಯರ ವಾರ ಬಂದಿದೆ. ಹಾಗಾಗಿ ಅಂದೇ ರಿಲೀಸ್ ಮಾಡೋಣ ಎಂದು ಹೇಳಿದ್ದರು. ಹಾಗಾಗಿ ನಾವು ಅದನ್ನ ಸಾಕಾರ ಮಾಡುವ ನಿಟ್ಟಿನಲ್ಲಿ ಮಾರ್ಚ್ 17ಕ್ಕೆ ಸಿನಿಮಾ ರಿಲೀಸ್ ಮಾಡುತ್ತಿದ್ದೇವೆ." ಎಂದು ಹೇಳಿಕೆ ನೀಡಿದ್ದಾರೆ.

ಮಾರ್ಚ್ 17 ಅಪ್ಪು ಯಾವ ಚಿತ್ರ ರಿಲೀಸ್ ಆಗಿಲ್ಲ!

ನಟ ಪುನೀತ್‌ ರಾಜ್‌ಕುಮಾರ್ ಅವರ ಹುಟ್ಟುಹಬ್ಬಕ್ಕೆ ಇಲ್ಲಿ ತನಕ ಅವರ ಯಾವುದೇ ಸಿನಿಮಾಗಳು ರಿಲೀಸ್ ಆಗಿಲ್ಲ. ಯಾಕೆಂದರೆ ಒಂದು, ಮಾರ್ಚ್ 17 ಗುರುವಾರ ಬರುತ್ತಾ ಇರಲಿಲ್ಲ. ಇನ್ನೊಂದು ಬಂದರೂ ಆ ಸಮಯಕ್ಕೆ ಸರಿಯಾಗಿ ಸಿನಿಮಾ ರಿಲೀಸ್‌ಗೆ ರೆಡಿ ಇರುತ್ತಿರಲಿಲ್ಲ. ಹಾಗಾಗಿ ಇಲ್ಲಿ ತನಕ ಅಪ್ಪು ಹುಟ್ಟುಹಬ್ಬದಂದೂ ಅವರ ಯಾವೊಂದು ಚಿತ್ರವೂ ರಿಲೀಸ್ ಆಗಿಲ್ಲ. ಆದರೆ ಈ ಬಾರಿ ಮಾರ್ಚ್ 17 ಗುರುವಾರ ಬಂದಿದೆ. ಜೊತೆಗೆ ಸಿನಿಮಾ ಕೂಡ ಬಹುತೇಕ ಮುಗಿದಿತ್ತು. ಹಾಗಾಗಿ ಅಪ್ಪು 'ಜೇಮ್ಸ್' ಸಿನಿಮಾವನ್ನು ತಮ್ಮ ಹುಟ್ಟಹಬ್ಬಕ್ಕೆ ರಿಲೀಸ್ ಮಾಡಬೇಕು ಎಂದುಕೊಂಡಿದ್ದರಂತೆ.

ಕನಸು ಈಡೇರುವ ಮುನ್ನವೇ ಕಣ್ಮರೆಯಾದ ಅಪ್ಪು!

ಆದರೆ ತಮ್ಮ ಕನಸು ಈಡೇರುವುದನ್ನು ನೋಡಲು ಅಪ್ಪುನೇ ಇಲ್ಲ. ಆದರೂ ಅವರ ಈ ಕನಸನ್ನು ನನಸು ಮಾಡುವುದು ಕೇವಲ ಇದೊಂದು ಚಿತ್ರದಿಂದ ಮಾತ್ರ ಸಾಧ್ಯ. ಯಾಕೆಂದರೆ ಮುಂದೆ ಸಮಯ ಕೂಡಿ ಬಂದರೂ, ಸಿನಿಮಾ ಮಾಡಲೂ ಅವರೇ ಇಲ್ಲ. ಹಾಗಾಗಿ ಈ ಚಿತ್ರವನ್ನು ಹುಟ್ಟುಹಬ್ಬಕ್ಕೆ ರಿಲೀಸ್ ಮಾಡಲು ಚಿತ್ರತಂಡ ಯೋಜನೆ ರೂಪಿಸಿದೆ.

ಮಾರ್ಚ್ 13ಕ್ಕೆ 'ಜೇಮ್ಸ್' ಪ್ರೀ ರಿಲೀಸ್ ಕಾರ್ಯಕ್ರಮ!

ಇನ್ನು ಜೇಮ್ಸ್ ಚಿತ್ರದ ಮೂಲಕ ಪುನೀತ್, ಶಿವರಾಜ್ ಕುಮಾರ್ ಮತ್ತು ರಾಘವೇಂದ್ರ ರಾಜ್‌ಕುಮಾರ್ ಮೊದಲ ಬಾರಿಗೆ ಒಂದೇ ಸಿನಿಮಾದಲ್ಲಿ ನಟಿಸಿದ್ದಾರೆ. ಕನ್ನಡದಲ್ಲಿ ಸೆನ್ಸಾರ್ ಆಗಿದೆ. ಚೇತನ್ ಕುಮಾರ್ ನಿರ್ದೇಶನದ ಜೇಮ್ಸ್ ಚಿತ್ರದ ಪ್ರೀ ರಿಲೀಸ್ ಕಾರ್ಯಕ್ರಮ ಬೆಂಗಳೂರಿನಲ್ಲಿ ಮಾರ್ಚ್ 13ರಂದು ನಡೆಯಲಿದೆ. ಜೇಮ್ಸ್ ಕಾರ್ಯಕ್ರಮಕ್ಕಾಗಿ ಇಡೀ ಚಿತ್ರರಂಗ ಒಟ್ಟಾಗಿ ಬರಲಿದೆ. ಇನ್ನು ಮಾರ್ಚ್ 17ಕ್ಕೆ ಕರ್ನಾಟಕದಲ್ಲಿ ಅಕ್ಷರಶಃ ಜಾತ್ರೆ ನಡೆಯಲಿದೆ.