ಇಷ್ಟದ ನಟ, ಡಾನ್ಸರ್, ಯುವರತ್ನ ಸಿನಿಮಾ ಎಲ್ಲದರ ಬಗ್ಗೆ ಪುನೀತ್ ಮಾತು

ಪುನೀತ್ ಗೆ ಹಲವು ನಟರ ಅಭಿನಯ ಇಷ್ಟ

ಪುನೀತ್ ರಾಜ್‌ಕುಮಾರ್ ಗೆ ಹಾಲಿವುಡ್‌ನಲ್ಲಿ Rambo ಸಿನಿಮಾ ಖ್ಯಾತಿಯ ಸಿಲ್‌ವೆಸ್ಟರ್ ಸ್ಟಾಲೋನ್, ಖ್ಯಾತ ನಟ ಅರ್ನಾಲ್ಡ್, ಫಾರೆಸ್ಟ್ ಗಂಪ್ ಖ್ಯಾತಿಯ ಟಾಮ್‌ ಹ್ಯಾಂಕ್ಸ್ ಹಾಗೂ ಜಾಕಿ ಚಾನ್ ಪುನೀತ್‌ ರಾಜ್‌ಕುಮಾರ್ ಅವರ ನೆಚ್ಚಿನ ನಟರಂತೆ.

ಪುನೀತ್ ಆರಾಧಿಸುವ ಬೆಸ್ಟ್ ಡಾನ್ಸರ್ ಯಾರು?

ಇನ್ನು ಪುನೀತ್ ರಾಜ್‌ಕುಮಾರ್ ಆರಾಧಿಸುವ ಬೆಸ್ಟ್ ಡಾನ್ಸರ್ ಯಾರು ಎಂಬ ಪ್ರಶ್ನೆಗೆ ಉತ್ತರಿಸಿದ ಅಪ್ಪು, ನನಗೆ ಮೈಕಲ್ ಜಾಕ್ಸನ್ ಸದಾ ಇಷ್ಟ. ನಾನು ಆರಾಧಿಸುವ ಅತ್ಯುತ್ತಮ ನೃತ್ಯಗಾರ ಮೈಕಲ್ ಜಾನ್ಸನ್ ಎಂದರು. ಮೈಕಲ್ ಜಾನ್ಸನ್ ನಿಧನರಾದಾಗ ಅವರಿಗಾಗಿ ನೃತ್ಯ ಶ್ರದ್ಧಾಂಜಲಿ ಸಲ್ಲಿಸಿದ್ದರು ಪುನೀತ್.

ಅಡುಗೆ ಮಾಡುವುದನ್ನು ಕಲಿತ ಪುನೀತ್

ಲಾಕ್‌ಡೌನ್ ಸಮಯದಲ್ಲಿ ತಾವು ಎಲ್ಲಿಯೂ ಹೊರಗೆ ಹೋಗಲಿಲ್ಲ ಎಂಬ ಪುನೀತ್ ಆ ಸಮಯದಲ್ಲಿ ಅಡುಗೆ ಮಾಡುವುದನ್ನು ಕಲಿತಿದ್ದಾಗಿ ಹಾಗೂ ಹಲವಾರು ಸಿನಿಮಾ ಹಾಗೂ ವೆಬ್ ಸೀರೀಸ್‌ಗಳನ್ನು ನೋಡಿದ್ದಾಗಿ ಹೇಳಿದರು. ಅನ್‌ಲಾಕ್ ಪ್ರಾರಂಭವಾದಾಗ ಸೈಕ್ಲಿಂಗ್‌ಗೆ ಹೋಗಿದ್ದರಂತೆ.

ಎರಡು ಹಾಡುಗಳ ಚಿತ್ರೀಕರಣ ಬಾಕಿ ಇದೆ

ಯುವರತ್ನ ಸಿನಿಮಾ ಬಗ್ಗೆ ಮಾತನಾಡಿದ ಪುನೀತ್ ರಾಜ್‌ಕುಮಾರ್, ಸಿನಿಮಾ ಚಿತ್ರಮಂದಿರದಲ್ಲಿಯೇ ಬಿಡುಗಡೆ ಆಗುತ್ತದೆ ಎಂಬುದನ್ನು ಪರೋಕ್ಷವಾಗಿ ಹೇಳಿದರು. ಚಿತ್ರದ ಎರಡು ಹಾಡುಗಳ ಚಿತ್ರೀಕರಣ ಬಾಕಿ ಇದ್ದು, ಶೀಘ್ರದಲ್ಲಿಯೇ ಮುಗಿಸಲಾಗುತ್ತದೆ ಎಂದರು.

ನಿರ್ಮಾಣದ ಸಿನಿಮಾವನ್ನು ಗೆಲ್ಲಿಸಿದ್ದಕ್ಕೆ ಧನ್ಯವಾದ

ತಮ್ಮ ಪ್ರೊಡಕ್ಷನ್‌ನ ಸಿನಿಮಾಗಳು ಒಟಿಟಿಯಲ್ಲಿ ಬಿಡುಗಡೆ ಆದ ಬಗ್ಗೆ ಮಾತನಾಡಿದ ಅವರು, ಲಾ ಹಾಗೂ ಫ್ರೆಂಚ್ ಬಿರಿಯಾನಿ ಸಿನಿಮಾಕ್ಕೆ ಒಳ್ಳೆಯ ಪ್ರತಿಕ್ರಿಯೆ ಸಿಕ್ಕಿದೆ ಇದಕ್ಕೆ ಎಲ್ಲರಿಗೂ ಧನ್ಯವಾದಗಳನ್ನು ತಿಳಿಸಿದರು. ಕೊರೊನಾ ಸಮಯದಲ್ಲಿ ಎಲ್ಲರೂ ಜಾಗೃತೆಯಿಂದ ಇರಿರೆಂದು ಎಚ್ಚರಿಕೆಯನ್ನು ಪುನೀತ್ ನೀಡಿದರು.