ಅಪ್ಪು ಎಪಿಕ್ ಜರ್ನಿ 'ಗಂಧದಗುಡಿ' ಎಷ್ಟು ನಿಮಿಷಗಳ ಚಿತ್ರ? ಇಂಟರ್‌ವೆಲ್ ಇರುತ್ತಾ?

ಚಿತ್ರದ ರನ್ ಟೈಮ್, ಸರ್ಟಿಫಿಕೇಟ್ ಮತ್ತು ಇಂಟರ್ ವೆಲ್

ಪುನೀತ್ ರಾಜ್ ಕುಮಾರ್ ಹಾಗೂ ಅಮೋಘವರ್ಷ ನಟನೆಯ ಗಂಧದ ಗುಡಿ ಚಿತ್ರ 1 ಗಂಟೆ 37 ನಿಮಿಷದ ಚಿತ್ರವಾಗಿದೆ. ಅಂದರೆ 97 ನಿಮಿಷಗಳ ರನ್ ಟೈಮ್ ಅನ್ನು ಗಂಧದಗುಡಿ ಹೊಂದಿದೆ. ಹೀಗೆ ಈ ಅಪ್ಪು ಅಭಿನಯದ ಹಿಂದಿನ ಚಿತ್ರಗಳಿಗಿಂತ ತುಂಬಾ ಕಡಿಮೆ ರನ್ ಟೈಮ್ ಹೊಂದಿರುವ ಗಂಧದ ಗುಡಿ ಚಿತ್ರಕ್ಕೆ ಮಧ್ಯಂತರ ಇರುತ್ತೋ ಇಲ್ಲವೋ ಎಂಬ ಅನುಮಾನ ಇದೀಗ ಅಭಿಮಾನಿಗಳಲ್ಲಿ ಶುರುವಾಗಿದೆ. ಕಡಿಮೆ ರನ್ ಟೈಮ್ ಇರುವ ಗಂಧದ ಗುಡಿ ಚಿತ್ರಕ್ಕೆ ಇಂಟರ್ವೆಲ್ ನೀಡದೇ ಪ್ರದರ್ಶಿಸಿದರೆ ಉತ್ತಮ ಎಂಬ ಅಭಿಪ್ರಾಯಗಳು ಸಹ ವ್ಯಕ್ತವಾಗುತ್ತಿವೆ.
ಇನ್ನು ಗಂಧದ ಗುಡಿ ಚಿತ್ರಕ್ಕೆ ಸೆನ್ಸಾರ್ ಬೋರ್ಡ್ ಯಾವುದೇ ಕಟ್ ಹಾಗೂ ಮ್ಯೂಟ್ ಹಾಕದೇ ಕ್ಲೀನ್ ಯು ಸರ್ಟಿಫಿಕೇಟ್ ನೀಡಿದೆ.

ಪ್ರೀಮಿಯರ್ ಶೋ ಸೋಲ್ಡ್ ಔಟ್; ಬಿಡುಗಡೆಯ ದಿನ ಮುಂಜಾನೆಯೇ ಪ್ರದರ್ಶನ

ಇನ್ನು ಗಂಧದ ಗುಡಿ ಚಿತ್ರದ ಬಿಡುಗಡೆಯ ಹಿಂದಿನ ದಿನ ಸಂಜೆ ವೇಳೆ ರಾಜ್ಯಾದ್ಯಂತ ಸುಮಾರು ಐವತ್ತಕ್ಕೂ ಹೆಚ್ಚಿನ ಪ್ರೀಮಿಯರ್ ಪ್ರದರ್ಶನಗಳನ್ನು ಆಯೋಜಿಸಲಾಗಿದೆ. ಬೆಂಗಳೂರು, ಮೈಸೂರು ಹಾಗೂ ಶಿವಮೊಗ್ಗ ನಗರಗಳ ಎಲ್ಲಾ ಪ್ರೀಮಿಯರ್ ಶೋಗಳು ಸೋಲ್ಡ್ ಔಟ್ ಆಗಿವೆ. ಅಷ್ಟೇ ಅಲ್ಲದೆ ಬಿಡುಗಡೆ ದಿನ ಬೆಂಗಳೂರಿನಲ್ಲಿ ಮುಂಜಾನೆ 6 ಗಂಟೆಗೆ ಪ್ರದರ್ಶನಗಳು ಆರಂಭವಾಗಲಿದ್ದು ಮೈಸೂರಿನಲ್ಲಿ 6.20ಕ್ಕೆ ಗಂಧದ ಗುಡಿಯ ದರ್ಶನವಾಗಲಿದೆ.

ಟಿಕೆಟ್ ದರ ದುಬಾರಿ!

ಇನ್ನು ಗಂಧದ ಗುಡಿ ಪ್ರೀಮಿಯರ್ ಶೋ ಹಾಗೂ ಬಿಡುಗಡೆಯ ದಿನದ ಬೆಳಗಿನ ಜಾವದ ಪ್ರದರ್ಶನಗಳ ಟಿಕೆಟ್ ದರ ಸಾಮಾನ್ಯವಾಗಿಲ್ಲ. ಮಲ್ಟಿಪ್ಲೆಕ್ಸ್ ಚಿತ್ರಮಂದಿರಗಳಲ್ಲಿ ಟಿಕೆಟ್ ದರ 200ರಿಂದ ಶುರುವಾದರೆ ಸಿಂಗಲ್ ಸ್ಕ್ರೀನ್ ಚಿತ್ರಮಂದಿರಗಳಲ್ಲಿಯೂ 150 ರೂಪಾಯಿಗಳಷ್ಟಿದೆ. ಹೀಗೆ ಪ್ರೀಮಿಯರ್ ಶೋ ಟಿಕೆಟ್ ದರಗಳು ಗಗನಕ್ಕೇರಿದ್ದರೂ ಸಹ ಟಿಕೆಟ್ ಮಾತ್ರ ನಿಮಿಷಗಳಲ್ಲಿ ಸೋಲ್ಡ್ ಔಟ್ ಆಗಿವೆ.