'ಜೇಮ್ಸ್' ಶೋ, ಥಿಯೇಟರ್‌ಗಳ ನಿಜ ಸಂಖ್ಯೆ ಇಲ್ಲಿದೆ: ನಿರ್ಮಾಪಕ, ನಿರ್ದೇಶಕ ಹೇಳಿದ್ದಿಷ್ಟು!

ಕರ್ನಾಟಕದಲ್ಲಿ 'ಜೇಮ್ಸ್'ಕ್ಕೆಎಷ್ಟು ಶೋಗಳು!

ಸದ್ಯ 'ಜೇಮ್ಸ್' ಚಿತ್ರಕ್ಕೆ ಕರ್ನಾಟಕದಲ್ಲಿ 300 ಚಿತ್ರಮಂದಿರಗಳು ಸಿಕ್ಕಿವೆ. ಇದು 300ಕ್ಕೆ ಮಾತ್ರ ಸೀಮಿತ ಆಗುವುದಿಲ್ಲ. ಯಾಕೆಂದರೆ ಸಿನಿಮಾ ರಿಲೀಸ್ ಆಗುವ ಹಿಂದಿನ ದಿನದವರೆಗೂ ಚಿತ್ರ ಮಂದಿರಗಳ ಪಟ್ಟಿ ಬೆಳೆಯುತ್ತಲೇ ಇರುತ್ತದೆ. ಹಾಗಾಗಿ 'ಜೇಮ್ಸ್' ಚಿತ್ರಮಂದಿರಗಳ ಸಂಖ್ಯೆ ಮತ್ತಷ್ಟು ಹೆಚ್ಚಾಗಲಿದೆ. ಈ ವಿಚಾರವನ್ನು ಫಿಲ್ಮೀ ಬೀಟ್‌ಗೆ ಸ್ಪಷ್ಟ ಪಡಿಸಿರುವ ನಿರ್ದೇಶಕ ಚೇತನ್ ಕುಮಾರ್, ಚಿತ್ರಮಂದಿರಗಳ ಸಂಖ್ಯೆ ಇನ್ನು ಹೆಚ್ಚಾಗಲಿವೆ ಎಂದಿದ್ದಾರೆ. ಜೊತೆಗೆ ಚಿತ್ರ ಬಿಗ್ ಓಪನಿಂಗ್ ಪಡೆದುಕೊಳ್ಳಲಿದ್ದು, ಮೊದಲ ದಿನವೇ 1500 ಶೋಗಳು ಆಗಲಿವೆ ಎಂದಿದ್ದಾರೆ. ಇದು ಕೇವಲ ಕರ್ನಾಟಕದ ಲೆಕ್ಕಾಚಾರ ಅಷ್ಟೇ.

ವಿದೇಶದಲ್ಲಿ 'ಜೇಮ್ಸ್'ಗೆ ಎಲ್ಲಿಲ್ಲದ ಬೇಡಿಕೆ!

'ಜೇಮ್ಸ್' ಚಿತ್ರಕ್ಕೆ ವಿದೇಶದಲ್ಲೂ ಭಾರಿ ಬೇಡಿಕೆ ಬಂದಿದ್ದು, ಯು.ಎಸ್‌ನಲ್ಲಿ 'ಜೇಮ್ಸ್' ಒಟ್ಟು 32 ಸ್ಟೇಟ್‌ಗಳಲ್ಲಿ ಪ್ರದರ್ಶನ ಕಾಣುತ್ತಿದೆ. ಇದು ಕೂಡ ಕನ್ನಡ ಚಿತ್ರರಂಗದ ಪಾಲಿಗೆ ದಾಖಲೆಯೇ ಸರಿ. ಜೊತೆಗೆ ಆಸ್ಟ್ರೇಲಿಯಾದಲ್ಲಿ ಸೆನ್ಸಾರ್ ಆದ ಮೊದಲ ಕನ್ನಡ ಚಿತ್ರ ಎನ್ನುವ ಹೆಗ್ಗಳಿಕೆಗೆ 'ಜೇಮ್ಸ್' ಪಾತ್ರವಾಗಿದೆ. ಇನ್ನು ಆಸ್ಟ್ರೇಲಿಯಾದಲ್ಲಿ 150 ಶೋಗಳ ಪ್ರದರ್ಶನಕ್ಕೆ ಅವಕಾಶ ಸಿಕ್ಕಿದೆ. ಇದು ಕೂಡ ದಾಖಲೆ, ಯಾಕೆಂದರೆ ಕನ್ನಡದ ಒಂದು ಸಿನಿಮಾ ಆಸ್ಟ್ರೇಲಿಯಾದಲ್ಲಿ ಇಷ್ಟು ಶೋಗಳನ್ನು ಪಡೆದುಕೊಂಡಿದೆ.

'ಕೆಜಿಎಫ್' ಮಾದರಿಯಲ್ಲಿ ರಿಲೀಸ್ ಆಗಲಿದೆ 'ಜೇಮ್ಸ್'!

ಕನ್ನಡ ಸಿನಿಮಾ ಒಟ್ಟಿಗೆ ಐದು ಭಾಷೆಗಳಲ್ಲಿ ರಿಲೀಸ್ ಆಗಿ ವಿಶ್ವದಾದ್ಯಂತ ದೊಡ್ಡ ಮಟ್ಟದಲ್ಲಿ ಗಮನ ಸೆಳೆದ ಸಿನಿಮಾ ಅಂದರೆ ಅದು 'ಕೆಜಿಎಫ್'. 'ಕೆಜಿಎಫ್' ಬಳಿಕ ಈಗ 'ಜೇಮ್ಸ್' ಸರದಿ. ಈ ಚಿತ್ರದ ಒಟ್ಟಿಗೆ ಐದು ಭಾಷೆಗಳಲ್ಲಿ ತೆರೆಗೆ ಬರುತ್ತಿದ್ದು, ದೊಡ್ಡ ಮಟ್ಟದ ದಾಖಲೆ ಬರೆಯಲು ಸಜ್ಜಾಗಿದೆ. ಕರ್ನಾಟಕ, ಕನ್ನಡಕ್ಕೆ ಮಾತ್ರ 'ಜೇಮ್ಸ್' ಸೀಮಿತ ಆಗಿಲ್ಲ. ಇಡೀ ವಿಶ್ವದಲ್ಲಿರುವ ಕನ್ನಡಿಗರು ಈ ಸಿನಿಮಾ ನೋಡಲು ಕಾಯುತ್ತಿದ್ದಾರೆ.

'ಜೇಮ್ಸ್' ದಾಖಲೆ ಬರೆಯೋದು ಪಕ್ಕಾ!

'ಜೇಮ್ಸ್' ಸಿನಿಮಾ ರಿಲೀಸ್‌ಗೂ ಮುನ್ನವೇ ಸಾಕಷ್ಟು ದಾಖಲೆ ಬರೆದಿದೆ. ಈಗಾಗಲೇ ಸಾವಿರಾರು ಟಿಕೆಟ್‌ಗಳ ಮುಂಗಡ ಬುಕ್ಕಿಂಗ್ ಆಗಿದೆ. ಪ್ರದರ್ಶನಗಳ ಸಂಖ್ಯೆ ಮತ್ತು ಚಿತ್ರಮಂದಿಗಳ ವಿಚಾರದಲ್ಲಿ 'ಜೇಮ್ಸ್' ದಾಖಲೆ ಬರೆಯುವುದರಲ್ಲಿ ಅನುಮಾನ ಇಲ್ಲ. ನಿರೀಕ್ಷೆಗೂ ಮೀರಿದ ದಾಖಲೆಯನ್ನು ಮಾಡಲಿದೆ ಅಪ್ಪು ಕೊನೆಯ ಸಿನಿಮಾ 'ಜೇಮ್ಸ್'.