'ಕುದುರೆ ರೇಸಿಂಗ್'ನಲ್ಲಿ ಡಿ ಬಾಸ್ ದರ್ಶನ್: ನಿರ್ಮಾಪಕ ಪುಷ್ಕರ್ ಹೇಳಿದ್ದೇನು?

ಆಸೆ ಹೇಳಿಕೊಂಡ ನಿರ್ಮಾಪಕ ಪುಷ್ಕರ್

ನಿರ್ಮಾಪಕ ಪುಷ್ಕರ್ ಕುದುರೆ ರೇಸಿಂಗ್ ಫೋಟೋವನ್ನು ಶೇರ್ ಮಾಡಿ "ಒಂದು ವೇಳೆ ಡಿ ಬಾಸ್ ಕ್ರೀಡಾ ಆಧಾರಿತ ಕುದುರೆ ರೇಸಿಂಗ್ ಸಿನಿಮಾದಲ್ಲಿ ಅಭಿನಯಿಸಲು ಒಪ್ಪಿಕೊಂಡರೆ ಸ್ಯಾಂಡಲ್ ವುಡ್ ನಲ್ಲಿ ಅತಿ ದೊಡ್ಡ ಕ್ರೀಡಾ ಆಧಾರಿತ ಚಿತ್ರವಾಗಲಿದೆ. ದರ್ಶನ್ ಸರ್ ನಿಮ್ಮ ಜೊತೆ ಈ ತರ ಸಿನಿಮಾ ಮಾಡಬೇಕು ಅಂತ ಒಂದು ದೊಡ್ಡ ಕನಸಿದೆ" ಎಂದು ಬರೆದುಕೊಂಡು ತನ್ನ ಆಸೆಯನ್ನು ಹೊರಹಾಕಿದ್ದಾರೆ.

ಕ್ರೀಡಾ ಆಧಾರಿತ ಚಿತ್ರಗಳು ಸಂಖ್ಯೆ ಕಡಿಮೆ

ಸ್ಯಾಂಡಲ್ ವುಡ್ ನಲ್ಲಿ ಕ್ರೀಡಾ ಆಧಾರಿತ ಸಿನಿಮಾಗಳ ಸಂಖ್ಯೆ ತೀರಾ ಕಡಿಮೆ. ಅದರಲ್ಲೂ ಸಂಪೂರ್ಣವಾಗಿ ಹಾರ್ಸ್ ರೇಸಿಂಗ್ ಬಗ್ಗೆ ಸಿನಿಮಾಗಳು ಬಂದಿಲ್ಲ. ಹಾಗಾಗಿ ಇಂತಹ ಒಂದು ಕ್ರೀಡಾ ಆಧಾರಿತ ಸಿನಿಮಾ ಮಾಡಿದರೆ ಚಿತ್ರಾಭಿಮಾನಿಗಳಿಗೆ ಇಷ್ಟವಾಗುವುದರಲ್ಲಿ ಯಾವುದೆ ಅನುಮಾನವಿಲ್ಲ. ಪುಷ್ಕರ್ ಆಸೆಯಂತೆ ದರ್ಶನ್ ಕುದುರೆ ರೇಸಿಂಗ್ ಸಿನಿಮಾ ಮಾಡಲು ಒಪ್ಪಿಕೊಳ್ಳುತ್ತಾರಾ ಎನ್ನುವುದು ಅಭಿಮಾನಿಗಳ ಕುತೂಹಲ.

ಜಾಕಿ ದರ್ಶನ್

ಹೇಳಿಕೇಳಿ ದರ್ಶನ್ ಅದ್ಭುತ ಜಾಕಿ. ಹಾರ್ಸ್ ರೈಡಿಂಗ್ ಮಾಡುತ್ತಿರುತ್ತಾರೆ. ದರ್ಶನ್ ಫಾರ್ಮ್ ಹೌಸ್ ನಲ್ಲಿಯೆ ಸಾಕಷ್ಟು ಕುದುರೆಗಳನ್ನು ಸಾಕಿದ್ದಾರೆ. ಬಿಡುವಿನ ವೇಳೆ ಪ್ರಾಣಿಗಳ ಜೊತೆ ಸಮಯ ಕಳೆಯುತ್ತಾರೆ. ಇದನ್ನೆ ನೋಡಿ ಪುಷ್ಕರ್, ದರ್ಶನ್ ಹಾರ್ಸ್ ರೇಸಿಂಗ್ ಚಿತ್ರದಲ್ಲಿ ಕಾಣಿಸಿಕೊಂಡರೆ ಚೆನ್ನಾಗಿರುತ್ತೆ ಎನ್ನುವುದು ಅವರ ಆಲೋಚನೆ ಬಂದಿರಬಹುದು.

ಅಭಿಮಾನಿಗಳ ಸಾಥ್

ಪುಷ್ಕರ್ ಆಸೆಗೆ ಸಾಕಷ್ಟು ಜನ ಅಭಿಮಾನಿಗಳು ಸಾಥ್ ನೀಡುತ್ತಿದ್ದಾರೆ. ದರ್ಶನ್ ಅವರನ್ನು ಕುದುರೆ ರೇಸಿಂಗ್ ಚಿತ್ರದಲ್ಲಿ ನೋಡುವ ಆಸೆಯನ್ನು ವ್ಯಕ್ತಪಡಿಸುತ್ತಿದ್ದಾರೆ. ಸದ್ಯ "ಅವನೇ ಶ್ರೀಮನ್ನಾರಾಯಣ" ಚಿತ್ರದ ರಿಲೀಸ್ ನಲ್ಲಿ ಬ್ಯುಸಿ ಇರುವ ಪುಷ್ಕರ್, ಸಿನಿಮಾ ರಿಲೀಸ್ ಆದಮೇಲೆ ಈ ಬಗ್ಗೆ ದರ್ಶನ್ ಜೊತೆ ಮಾತನಾಡುವ ಸಾಧ್ಯತೆಯು ಇದೆ.