ರಾಜ್ ಕುಮಾರ್ ಚಿತ್ರಗಳ ಹೆಸರನ್ನು ಮರುಬಳಸದಂತೆ ರಾಘಣ್ಣ ಮನವಿ

ರಾಘಣ್ಣ ಬಳಿ ಅಭಿಮಾನಿಗಳ ಮನವಿ

ಇಂದು ಗೂಗಲ್ ನಲ್ಲಿ 'ಶ್ರೀನಿವಾಸ ಕಲ್ಯಾಣ' ಎಂದು ಸರ್ಚ್ ಕೊಟ್ಟರೆ ಅಲ್ಲಿ ಬೇರೆಯೇ ಲವ್ ಕಾಮಿಡಿ ಸಿನಿಮಾ ಕಾಣುತ್ತದೆ. ಆಗ ಅಣ್ಣಾವ್ರ ಭಕ್ತಿ ಪ್ರಧಾನ ಚಿತ್ರದ ವೀಕ್ಷಕರಿಗೆ ನೋವಾಗುತ್ತದೆ. ಅದೇ ರೀತಿ ಇತ್ತೀಚೆಗೆ 'ಎರಡು ಕನಸು', 'ತಾಯಿಗೆ ತಕ್ಕ ಮಗ' ಎನ್ನುವ ಚಿತ್ರಗಳ ಶೀರ್ಷಿಕೆ ಹುಡುಕಿದರೆ ಇಂದಿನ ಹೊಸ ಚಿತ್ರಗಳೇ ಮೊದಲು ಗೋಚರಿಸುತ್ತವೆ. ಇವು ಹಳೆಯ ಚಿತ್ರಗಳಿಗೆ ಮಾಡಲಾಗುತ್ತಿರುವ ಅಪಚಾರ ಎಂದು ಅಭಿಮಾನಿಗಳು ರಾಘವೇಂದ್ರ ರಾಜ್ ಕುಮಾರ್ ಅವರಲ್ಲಿ ಮನವಿ ಮಾಡಿಕೊಂಡರು.

ಹೊರಗಿನವರಿಂದ ಈ ಕೆಲಸ ನಡೆಯದಿರಲಿ..

ಆರಂಭದಲ್ಲಿ ಅವರ ಮನವಿಯನ್ನು ತಪ್ಪಾಗಿ ಅರ್ಥೈಸಿಕೊಂಡ ರಾಘವೇಂದ್ರ ರಾಜಕುಮಾರ್ ಅವರು ತಾವು ತಮ್ಮ ಕುಟುಂಬದವರಿಗೆ ಅಪ್ಪಾಜಿ ಚಿತ್ರಗಳ ಹೆಸರನ್ನು ಬಳಸಿ ಚಿತ್ರ ಮಾಡದಂತೆ ಮನವಿ ಮಾಡುವುದಾಗಿ ಹೇಳಿದರು. ಅದಕ್ಕೆ ತಕ್ಷಣ ಪ್ರತಿಕ್ರಿಯಿಸಿದ ಅಭಿಮಾನಿಗಳು "ಅಣ್ಣಾವ್ರ ಕುಟುಂಬದಿಂದ ಅಣ್ಣಾವ್ರ ಚಿತ್ರಗಳ ಹೆಸರು ಬಳಸಿದಲ್ಲಿ ಅದು ಖುಷಿಯೇ. ಆದರೆ ಹೊರಗಿನವರಿಂದ ಈ ಕೆಲಸ ನಡೆಯದಿರಲಿ" ಎಂದರು.

ಗಿಮಿಕ್ ಗಾಗಿ ಟೈಟಲ್ ಮರು ಬಳಕೆ ಆಗುತ್ತಿದ್ಯಾ.?

ಮಾತ್ರವಲ್ಲ, ಅವರೆಲ್ಲ ಗಿಮಿಕ್ ಗಾಗಿ ಆ ಹೆಸರುಗಳನ್ನು ಬಳಸುತ್ತಿರಬಹುದು. ಆದರೆ ಆ ಹೆಸರಿನ ಚಿತ್ರಗಳು ಒಂದು ಕೂಡ ಯಶಸ್ವಿಯಾದ ಉದಾಹರಣೆ ಇಲ್ಲ. ಹೀಗಿರಬೇಕಾದರೆ ಅದು ಲೆಜೆಂಡ್ ಚಿತ್ರಗಳ ಹೆಸರಿಗೆ ಕಳಂಕ ತರುವ ಪ್ರಯತ್ನದಂತೆ ಕಾಣುತ್ತಿದೆ. ಹಾಗಾಗಿ ದಯವಿಟ್ಟು ಇದರ ವಿರುದ್ಧ ಏನಾದರೂ ಕ್ರಮ ಕೈಗೊಳ್ಳಿ ಎಂದು ರಾಘವೇಂದ್ರ ರಾಜ್ ಕುಮಾರ್ ಅವರಲ್ಲಿ ವಿನಂತಿಸಲಾಗಿತ್ತು.

ರಾಘಣ್ಣ ಏನಂದರು.?

ಈ ಒತ್ತಡಕ್ಕೆ ಉತ್ತರಿಸಿದ ರಾಘಣ್ಣ "ಅಭಿಮಾನಿಗಳು ಈ ಬಗ್ಗೆ ಒಂದು ಸಹಿ ಸಂಗ್ರಹಣಾ ಅಭಿಯಾನ ನಡೆಸಲಿ.‌ ನಾನು ‌ಕೂಡ ಅಭಿಮಾನಿಗಳು ಹೀಗೆ ಬಯಸುತ್ತಿದ್ದಾರೆ ಎಂದು ಹೇಳಿ ಅವರ ಬೇಡಿಕೆ ಈಡೇರಿಸುವಂತೆ ವಾಣಿಜ್ಯ ಮಂಡಳಿಗೆ ಪತ್ರ ಬರೆಯುತ್ತೇನೆ'' ಎಂದು ಭರವಸೆ ನೀಡಿದ್ದಾರೆ.

ಮುತ್ತುರಾಜ್ ಅಭಿಮಾನಿ ಬಳಗ

'ಆರಾಧ್ಯ ದೈವ ಮುತ್ತುರಾಜ್' ಅಭಿಮಾನಿಗಳ ಬಳಗದ ಪರಮ್ ಗುಬ್ಬಿ, ನವೀನ್ ಕುಮಾರ್ ಮೊದಲಾದವರ ನೇತೃತ್ವದಲ್ಲಿ ಈ ಮನವಿಯನ್ನು ರಾಘವೇಂದ್ರ ರಾಜಕುಮಾರ್ ಅವರಲ್ಲಿ ನಿವೇದಿಸಲಾಗಿತ್ತು. ಮಂಗಳಾ ರಾಜಕುಮಾರ್ ಅವರ ಜನ್ಮದಿನದ ಪ್ರಯುಕ್ತ ಶುಕ್ರವಾರ ರಾಘಣ್ಣನ ಮನೆಗೆ ಆಗಮಿಸಿದ್ದ ರಾಜ್ ಕುಮಾರ್ ಅಭಿಮಾನಿಗಳು ಈ‌ ಮನವಿಯನ್ನು ಮುಂದಿಟ್ಟಿದ್ದರು.