ಡ್ರಗ್ಸ್ ಪ್ರಕರಣ: ಮಾಧ್ಯಮಗಳ ಮೇಲೆ ರಾಗಿಣಿ ಮುನಿಸು

ನಟಿಯರ ಬಗ್ಗೆ ಹೇಳಿಕೆ: ರಾಗಿಣಿ ಆಕ್ರೋಶ

ಈ ಕುರಿತು ಸರಣಿ ಟ್ವೀಟ್ ಮಾಡಿರುವ ರಾಗಿಣಿ, 'ಮಾದಕ ವಸ್ತು ಎಂಬುದು ಪ್ರಸ್ತುತ ಮುಖ್ಯ ವಿಷಯ ಅದರ ಸುತ್ತ ಚರ್ಚೆ ಆಗಬೇಕು. ಮಾದಕ ವಸ್ತು ಮಾರಾಟ ಚಂದನವನದಲ್ಲಿ ಆಗಿದ್ದಾದಲ್ಲಿ ಅದರ ಮೂಲದ ತನಿಖೆ ಆಗಬೇಕು. ಇಲ್ಲ ಸಲ್ಲದ ವಿಷಯಗಳ ಚರ್ಚೆ ಬೇಡ, ಸೂಕ್ತ ಮಾಹಿತಿಯೊಂದಿಗೆ ಸುದ್ದಿ ಪ್ರಸಾರ ಮಾಡಿ' ಎಂದು ಕನ್ನಡದ ಮಾಧ್ಯಮವೊಂದನ್ನು ಆಗ್ರಹಿಸಿದ್ದಾರೆ ರಾಗಿಣಿ.

'ಚಿತ್ರರಂಗದ ಮಹಿಳೆಯರನ್ನು ಕೆಟ್ಟದಾಗಿ ಬಿಂಬಿಸುವುದು ಸರಿಯೇ?'

'ನಿಮ್ಮದೆ ಚಿತ್ರರಂಗದ ಮಹಿಳೆಯರನ್ನು ಕೆಟ್ಟದಾಗಿ ಬಿಂಬಿಸುವುದು ನಿಮಗೆ ಸರಿ ಕಾಣುತ್ತದೆಯೇ? ಮಾದಕ ವಸ್ತುವಿನ ವಿಷಯ ನಮ್ಮ ಮುಂದಿದೆ. ಅದರ ಬಗ್ಗೆ ಚರ್ಚೆಯಾಗಲಿ, ಯಾರು ಮಾರಾಟ ಮಾಡಿದ್ದಾರೆ ತನಿಖೆ ಆಗಲಿ. ಅದನ್ನು ಬಿಟ್ಟು ಸುಳ್ಳು, ಅರ್ಧ ಸತ್ಯಗಳ ಪ್ರಸಾರ ಬೇಡ ಎಂದಿದ್ದಾರೆ ರಾಗಿಣಿ.

ನನ್ನ ಕರೆಯನ್ನು ಕಟ್ ಮಾಡಲಾಯಿತು: ರಾಗಿಣಿ

ಚಾನೆಲ್ ಒಂದರಲ್ಲಿ ಕೂತಿದ್ದ ವ್ಯಕ್ತಿ, 'ನಟಿಯರು ಸಣ್ಣ ವಯಸ್ಸಿನವರಂತೆ ಕಾಣಲು ಡ್ರಗ್ಸ್ ಬಳಸುತ್ತಾರೆ' ಎಂದಿದ್ದಾರೆ. ಇದರ ಬಗ್ಗೆ ಸ್ಪಷ್ಟೀಕರಣ ಕೇಳಲೆಂದು ಕರೆ ಮಾಡಿದರೆ ಅರ್ಧದಲ್ಲಿಯೇ ನನ್ನ ಕರೆಯನ್ನು ಕಟ್ ಮಾಡಲಾಯಿತು ಎಂದು ರಾಗಿಣಿ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ವಿಷಯ ಜ್ಞಾನ ರಹಿತ ನಿರೂಪಕರನ್ನು ಹೊರಗಟ್ಟಿ: ರಾಗಿಣಿ

ಕನ್ನಡ ಮಾಧ್ಯಮವು, ವಿಷಯ ಜ್ಞಾನರಹಿತ ಸುದ್ದಿ ನಿರೂಪಕರನ್ನು, ಸುದ್ದಿ ವಿಶ್ಲೇಷಕರನ್ನು ಸುದ್ದಿಮನೆಗಳಿಂದ ಹೊರಗಟ್ಟಬೇಕು ಎಂದು ರಾಗಿಣಿ ಒತ್ತಾಯಿಸಿದ್ದಾರೆ. ಈ ಕಾರ್ಯವನ್ನು ಸಿನಿಮಾ ಉದ್ಯಮದ ಮಹಿಳೆಯರ ಗೌರವ ಕಾಪಾಡಲು ನೀವು ಮಾಡಲೇ ಬೇಕು ಎಂದು ಮನವಿ ಮಾಡಿದ್ದಾರೆ.