ನೆಲಕಚ್ಚುತ್ತಿರುವ ರಜನಿ ಚಿತ್ರಗಳು: ಕಂಗಾಲಾದ ಡಿಸ್ಟ್ರಿಬ್ಯೂಟರ್ಸ್

ಮೊದಲ 2-3 ದಿನ ಮಾತ್ರ ಹೌಸ್ ಫುಲ್ ಬೋರ್ಡ್

ರಜನಿಕಾಂತ್ ಅಭಿನಯದ ಇತ್ತೀಚಿನ ಚಿತ್ರಗಳು ಮೊದಲೆರಡು ದಿನ ಮಾತ್ರ ಹೌಸ್ ಫುಲ್ ಬೋರ್ಡ್ ಕಾಣುತ್ತಿದೆ. ನಂತರ ಅರ್ಧ, ಅದಾದ ನಂತರ ಕಾಲು, ಆಮೇಲೆ ಚಿತ್ರಮಂದಿರ ಬಿಕೋ..ಅದಕ್ಕೆ ಇತ್ತೀಚಿನ ತಾಜಾ ಉದಾಹರಣೆಯೆಂದರೆ ಲಿಂಗಾ ಚಿತ್ರ. ವಿಶ್ವಾದ್ಯಂತ ಬಿಡುಗಡೆಯಾಗಿದ್ದ ಲಿಂಗಾ ಚಿತ್ರವನ್ನು ಮೊದಲ 2-3 ದಿನ ಅಭಿಮಾನಿಗಳು ಅದ್ದೂರಿಯಿಂದ ಸ್ವಾಗತಿಸಿದ್ದರು.

ಲಿಂಗಾ ಚಿತ್ರದ ಕಥೆ ಕೂಡಾ ಹಾಗೇ..

ಟ್ವಿಟರ್ ಟ್ರೆಂಡಿಂಗ್ ನಲ್ಲೂ ಟಾಪ್ ಟೆನ್ ಸ್ಥಾನ ಪಡೆದಿದ್ದ ಲಿಂಗಾ ಚಿತ್ರ ಮೊದಲೆರಡು ದಿನ ಭರ್ಜರಿ ಫಸಲನ್ನೇ ನೀಡಿತ್ತು. ಆದರೆ, ಚಿತ್ರದ ಗೆಲುವಿನ ಅಭಿಯಾನ ಮುಂದಿನ ದಿನಗಳಲ್ಲಿ ಮುಂದುವರಿಯಲೇ ಇಲ್ಲ. ಜೊತೆಗೆ ಅಮೀರ್ ಖಾನ್ ಅವರ ಪಿಕೆ ಚಿತ್ರ ಕೂಡಾ ರಾಷ್ಟೀಯ ಮಟ್ಟದಲ್ಲಿ ಈ ಚಿತ್ರಕ್ಕೆ ಭಾರೀ ಹೊಡೆತ ನೀಡಿತು.

ಲಿಂಗಾ ಚಿತ್ರದ ಕರ್ನಾಟಕದ ಕಥೆ

ಕನ್ನಡದವರೇ ಆದ ರಾಕ್ಲೈನ್ ವೆಂಕಟೇಶ್ ಲಿಂಗಾ ಚಿತ್ರದ ನಿರ್ಮಾಪಕರಾಗಿದ್ದರಿಂದ ರಾಜ್ಯದಲ್ಲಿ ಹೆಚ್ಚಿನ ಚಿತ್ರಮಂದಿರ ಪಡೆಯುವಲ್ಲಿ ಶಕ್ತವಾಗಿದ್ದರು. ಅದಕ್ಕಿಂತ ಹೆಚ್ಚಾಗಿ ರಜನಿ ಚಿತ್ರಗಳಿಗೆ ಕರ್ನಾಟಕ ವಲಯ ಇನ್ನೊಂದು ಭರ್ಜರಿ ಆದಾಯ ತರುವ ಮಾರುಕಟ್ಟೆ. ಯಾವಾಗ ರಾಮಾಚಾರಿ ಅಬ್ಬರ ಶುರುವಾಯಿತೋ, ಲಿಂಗಾ ಚಿತ್ರಕ್ಕೆ ಇಲ್ಲೂ ಹೊಡೆತಬಿತ್ತು.

ರಜನಿಯ ಈ ಹಿಂದಿನ ಚಿತ್ರಗಳು ಸೋತಾಗ

ಹಿಂದಿನ ಕುಚೇಲನ್, ಬಾಬಾ, ಕೊಚಾಡಿಯನ್ ಚಿತ್ರ ಮುಗ್ಗರಿಸಿದಾಗಲೂ ಇಂತಹ ಪರಿಸ್ಥಿತಿಯನ್ನು ರಜನಿ ಎದುರಿಸ ಬೇಕಾಗಿತ್ತು. ಹಂಚಿಕೆದಾರರು ಸೋತು ಹೈರಾಣವಾಗಿದ್ದಾಗ ರಜನಿ ಅವರ ಸಹಾಯಕ್ಕೆ ನಿಂತಿದ್ದರು. ಅವರ ಈ ಒಳ್ಳೆ ಗುಣವೇ ಅವರನ್ನು ಇಂದು ತಲೈವಾರ್ ಸ್ಥಾನದಲ್ಲಿ ನಿಲ್ಲಿಸಿರುವುದು.

ಧರಣಿ ಮಾಡ್ತಾರಂತೆ ಲಿಂಗಾ ಹಂಚಿಕೆದಾರರು

ನೂರು ಕೋಟಿ ವೆಚ್ಚದಲ್ಲಿ ತಯಾರಾದ ಲಿಂಗಾ ಚಿತ್ರ ನೂರ ಎಂಬತ್ತು ಕೋಟಿ ರೂಪಾಯಿಗೆ ರಾಜ್ಯ ಮತ್ತು ಜಿಲ್ಲಾವಾರು ಹಂಚಿಕೆದಾರರಿಗೆ ಮಾರಿ ನಿರ್ಮಪಕ ರಾಕ್ಲೈನ್ ವೆಂಕಟೇಶ್ ಕೈತೊಳೆದು ಕೊಂಡಿದ್ದರಂತೆ. ಆದರೆ ಹಂಚಿಕೆದಾರರು ಮಾತ್ರ ಭಾರೀ ನಷ್ಟ ಅನುಭವಿಸುತ್ತಿದ್ದಾರೆ ಎನ್ನುವುದು ಸುದ್ದಿ.

ಜನವರಿ ಹತ್ತರಂದು ಧರಣಿ

ಲಿಂಗಾ ಸಿನಿಮಾದ ರೈಟ್ಸ್ ಪಡೆದಿದ್ದ ಡಿಸ್ಟ್ರಿಬ್ಯೂಟರ್ಸ್ ಸುಮಾರು 40 ಕೋಟಿಯಷ್ಟು ನಷ್ಟ ಮಾಡಿಕೊಂಡಿದ್ದು, ಆಗಿರುವ ನಷ್ಟ ತುಂಬಿಕೊಡುವಂತೆ ರಜಿನಿ ಅವರನ್ನು ಮನವಿ ಮಾಡಿದ್ದಾರೆ. ನಾವು ರಜನಿ ಸರ್ ಅವರನ್ನು ಪೂಜಿಸುತ್ತೇವೆ. ಅವರ ಮೇಲೆ ನಮಗೆ ಅಪಾರ ಗೌರವವಿದೆ. ನಮಾಗಾಗಿರುವ ನಷ್ಟಕ್ಕೆ ರಜನಿ ಸರ್ ಪರಿಹಾರ ಕೊಡಿಸಬೇಕು. ಇಲ್ಲದಿದ್ದಲ್ಲಿ ಶನಿವಾರ (ಜ 10) ರಜನಿ ಸರ್ ಮನೆ ಮುಂದೆ ಧರಣಿ ನಡೆಸುತ್ತೇವೆಂದು ವಿತರಕರು ತಿಳಿಸಿದ್ದಾರೆ.

ಶಿವಾಜಿ, ಚಂದ್ರಮುಖಿ ನಂತರ ಫ್ಲಾಪ್ ಸಿನಿಮಾಗಳು

ಶಿವಾಜಿ ಮತ್ತು ಚಂದ್ರಮುಖಿ ಚಿತ್ರದ ಯಶಸ್ಸಿನ ಹಾಗೇ ನಂತರದ ಸಿನಿಮಾಗಳು ರಜನಿಗೆ ಹೆಸರು ತಂದುಕೊಡಲಿಲ್ಲ. 2008ರಲ್ಲಿ ಬಂದ ಕುಚೇಲನ್ ನೆಲಕಚ್ಚಿತ್ತು. ನಂತರದ ಎಂದಿರನ್ ಚಿತ್ರ ಕೂಡ ನಿರೀಕ್ಷಿತ ಲಾಭ ತಂದುಕೊಡಲಿಲ್ಲ. ಇನ್ನು ಹೋದ ವರ್ಷದ ಕೊಚಾಡಿಯನ್ ಚಿತ್ರ ಸೋಲುಂಡಿತ್ತು ಮತ್ತು ಲೇಟೆಸ್ಟ್ ಲಿಂಗಾ ಚಿತ್ರ ಕೂಡಾ ಈಗ ಅದೇ ದಾರಿಗೆ ಸಾಗುತ್ತಿದೆ.