'ಜೋಶ್‌'ಗೆ ರಾಕೇಶ್ ಅಡಿಗ ಮೊದಲು ನಾಯಕನಾಗಿರಲಿಲ್ಲ ಬೇರೆಯವರಿದ್ರು ಎಂದ ರಾಕೇಶ್ ತಾಯಿ!

ಆಡಿಷನ್ ಮೂಲಕ ಆಯ್ಕೆ

ಚಿತ್ರರಂಗದ ನಂಟು ಹೆಚ್ಚಿಲ್ಲದ ರಾಕೇಶ್ ಅಡಿಗ ಚಿತ್ರರಂಗಕ್ಕೆ ಹೇಗೆ ಆಯ್ಕೆಯಾದರು ಹಾಗೂ ಜೋಶ್ ರೀತಿಯ ಬ್ಲಾಕ್‌ಬಸ್ಟರ್ ಚಿತ್ರದಲ್ಲಿ ನಾಯಕನ ಪಾತ್ರ ಹೇಗೆ ಗಿಟ್ಟಿಸಿಕೊಂಡರು ಎಂಬ ಪ್ರಶ್ನೆಗೆ 'ಎಂಜಿ ವರ್ಸ್' ಎಂಬ ಯುಟ್ಯೂಬ್ ಚಾನೆಲ್‌ನ ಸಂದರ್ಶನದಲ್ಲಿ ಉತ್ತರಿಸಿದ ರಾಕೇಶ್ ತಾಯಿ ಲತಾ ಅಡಿಗ 'ಆತ ನಾಯಕನಾಗಿ ಆಯ್ಕೆಯಾಗಿದ್ದನ್ನು ಈಗಲೂ ಸಹ ನನ್ನಿಂದ ನಂಬಲು ಸಾಧ್ಯವಾಗುವುದಿಲ್ಲ. ಏಕೆಂದರೆ ಆಟ ಆಡಿಕೊಂಡೇ ನಟನಾಗಿಬಿಟ್ಟ. ಗೆಳೆಯರೆಲ್ಲಾ ಸೇರಿ ಚಿತ್ರದ ಆಡಿಷನ್ ನಡೆಯುತ್ತಿದೆ ಎಂದು ಭಾಗವಹಿಸಿದ್ರು ಹಾಗೂ ಅದರಲ್ಲಿ ಆಯ್ಕೆಯೂ ಸಹ ಆಗಿಬಿಟ್ಟರು' ಎಂದು ಹೇಳಿಕೆ ನೀಡಿದರು.

ನಾಯಕನ ಪಾತ್ರಕ್ಕೆ ರಾಕೇಶ್ ಆಯ್ಕೆಯಾಗಿರಲಿಲ್ಲ

ಇನ್ನು ಜೋಶ್ ಚಿತ್ರದ ನಾಯಕನ ಪಾತ್ರಕ್ಕೆ ಮೊದಲಿಗೆ ಬೇರೆಯವರು ಆಯ್ಕೆಯಾಗಿದ್ದರು ಹಾಗೂ ನಂತರ ರಾಕೇಶ್ ನಟನೆ, ಟ್ಯಾಲೆಂಟ್ ನೋಡಿ ಬದಲಾವಣೆ ಮಾಡಿಕೊಂಡು ಆತನಿಗೆ ನಾಯಕನ ಪಾತ್ರ ಮಾಡಲು ಅವಕಾಶ ನೀಡಿದರು ಎಂದೂ ಸಹ ಲತಾ ಅಡಿಗ ತಿಳಿಸಿದರು. ಅಷ್ಟೇ ಅಲ್ಲದೇ ಚಿತ್ರ ಹಿಟ್ ಆದ ಕಾರಣ ಚಿತ್ರತಂಡ ನಟಿಸಿದ್ದ ಹುಡುಗರಿಗೆಲ್ಲಾ ಪಲ್ಸರ್ ಬೈಕ್ ಕೊಟ್ಟಿತ್ತು, ಅದನ್ನೆಲ್ಲಾ ನೋಡಿ ಖುಷಿಯಾಗಿತ್ತು ಎಂದು ಹಳೆಯ ನೆನಪನ್ನು ಮೆಲುಕು ಹಾಕಿದರು.

ಸೆಲೆಬ್ರಿಟಿ ಎಂಬ ಫೀಲ್ ಇಲ್ಲ

ಇನ್ನು ಇಷ್ಟು ಚಿತ್ರಗಳಲ್ಲಿ ನಟಿಸಿದ್ದರೂ ಸಹ ರಾಕೇಶ್ ಅಡಿಗಗೆ ತಾನೊಬ್ಬ ಸೆಲೆಬ್ರಿಟಿ ಎಂಬ ಭಾವನೆಯೇ ಇಲ್ಲ ಎನ್ನುವ ರಾಕೇಶ್ ತಾಯಿ ಲತಾ ಅಡಿಗ ಆತ ಹೊರಗೆ ಹೋಗುವಾಗ, ಕಾರ್ಯಕ್ರಮಗಳಿಗೆ ತೆರಳುವಾಗ ಬ್ರಾಂಡೆಡ್ ಬಟ್ಟೆಗಳನ್ನು ಧರಿಸುವುದನ್ನೆಲ್ಲಾ ಆತ ಇಷ್ಟ ಪಡುವುದೇ ಇಲ್ಲ ಎಂದೂ ಸಹ ತಿಳಿಸಿದರು. ಎಷ್ಟೋ ಬಾರಿ ತಾನೇ ಮಗನಿಗೆ ನೀನೊಬ್ಬ ಸೆಲೆಬ್ರಿಟಿ ತುಸು ಬ್ರಾಂಡೆಡ್ ಬಟ್ಟೆಗಳನ್ನು ಹಾಕು ಎಂದದ್ದಿದೆ ಎನ್ನುತ್ತಾರೆ ಲತಾ ಅಡಿಗ.

ತಮಿಳು ಹಾಗೂ ತೆಲುಗಿಗೆ ರಿಮೇಕ್ ಆಗಿತ್ತು ಜೋಶ್

ಇನ್ನು ಜೋಶ್ ಚಿತ್ರ ಕನ್ನಡದಲ್ಲಿ ಸೂಪರ್ ಹಿಟ್ ಆದ ಕಾರಣ ಈ ಚಿತ್ರವನ್ನು ತೆಲುಗು ಹಾಗೂ ತಮಿಳಿನಲ್ಲಿಯೂ ರಿಮೇಕ್ ಮಾಡಲಾಗಿತ್ತು. ತೆಲುಗಿನಲ್ಲಿ 'ಕೆರಂಟ' ಹಾಗೂ ತಮಿಳಿನಲ್ಲಿ 'ಯುವನ್' ಎಂಬ ಶೀರ್ಷಿಕೆಗಳಡಿಯಲ್ಲಿ ಜೋಶ್ ರಿಮೇಕ್ ಮೂಡಿಬಂದಿತ್ತು.