ಸ್ಯಾಂಡಲ್ ವುಡ್ ನಲ್ಲಿ Rapper ಚಂದನ್ ಶೆಟ್ಟಿಯ ಹೊಸ ಇನ್ನಿಂಗ್ಸ್

ನಾಯಕನಾದ Rapper ಚಂದನ್

ಇಷ್ಟು ದಿನ ಆಲ್ಬಂ ಸಾಂಗ್ ಗಳಲ್ಲಿ ಕುಣಿದು ಅಭಿಮಾನಿಗಳನ್ನ ಕುಣಿಸುತ್ತಿದ್ದ ಚಂದನ್ ಶೆಟ್ಟಿ ತಮ್ಮ ಚೊಚ್ಚಲ ಚಿತ್ರಕ್ಕೆ ಸಿದ್ದವಾಗಿದ್ದಾರೆ. ಸಂಗೀತ ಕ್ಷೇತ್ರದಲ್ಲಿ ಹೊಸ ಅಲೆಯನ್ನ ಸೃಷ್ಟಿಸಿದ್ದ ಚಂದನ್ ಈಗ ಅಭಿನಯ ಕ್ಷೇತ್ರಕ್ಕೆ ಧುಮುಕಿದ್ದಾರೆ.

ಯಾವುದು ಆ ಚಿತ್ರ

ಚಂದನ್ ನಾಯಕನಾಗಿ ಅಭಿನಯಿಸಲಿರುವ ಚೊಚ್ಚಲ ಚಿತ್ರದ ಹೆಸರು 'ವಿಚಿತ್ರ ಪ್ರೇಮ ಕಥೆ' ಈ ಚಿತ್ರವನ್ನ ರವಿವರ್ಮ ನಿರ್ದೇಶನ ಮಾಡಲಿದ್ದಾರೆ.

ಯಾರು ಈ ರವಿವರ್ಮ

ಗಣೇಶ್ ಅಭಿನಯದ 'ಸಂಗಮ', ಅಜಯ್ ರಾವ್ ಅಭಿನಯದ 'ಜೈ ಭಜರಂಗಿ ಬಲಿ' ಸೇರಿದಂತೆ ಕನ್ನಡದ ಹಲವು ಚಿತ್ರಗಳಿಗೆ ರವಿವರ್ಮ ಸಹಾಯಕ ನಿರ್ದೇಶಕರಾಗಿ ಕೆಲಸ ಮಾಡಿದ್ದಾರೆ. ಅಷ್ಟೇ ಅಲ್ಲದೇ ಸುಮಾರು 400 ಕ್ಕೂ ಹೆಚ್ಚು ಹಾಡುಗಳಲ್ಲಿ ಕೆಲಸ ಮಾಡಿದ್ದಾರಂತೆ.

ನಟನೆ ಜೊತೆ ಸಂಗೀತ ನಿರ್ದೇಶಕ

ಇನ್ನು ಈ ಚಿತ್ರವನ್ನ ಗುಬ್ಬಿ ವೀರಣ್ಣ ಪ್ರೊಡಕ್ಷನ್ ನಿರ್ಮಾಣ ಮಾಡುತ್ತಿದ್ದು, ಚಂದನ್ ಶೆಟ್ಟಿ ಈ ಚಿತ್ರದಲ್ಲಿ ಕೇವಲ ನಾಯಕನಾಗಿ ಮಾತ್ರವಲ್ಲ, ಸಂಗೀತ ನಿರ್ದೇಶಕನಾಗಿಯೂ ಕೆಲಸ ಮಾಡಲಿದ್ದಾರಂತೆ.

ಚಂದನ್ ಗೆ ಈ ಅವಕಾಶ ಹೇಗೆ ಸಿಕ್ತು?

ಅಂದ್ಹಾಗೆ, ನಿರ್ದೇಶಕ ರವಿವರ್ಮ ಅವರ ಮಗ ಚಂದನ್ ಶೆಟ್ಟಿ ಅವರ ದೊಡ್ಡ ಅಭಿಮಾನಿ. ಇನ್ನು ರವಿವರ್ಮ ಅವರು ಕೂಡ ಚಂದನ್ ಅವರ ಆಲ್ಬಂಗಳಲ್ಲಿ ಅವರ ಅಭಿನಯ ನೋಡಿದ್ದು ಚಂದನ್ ಬಗ್ಗೆ ಭರವಸೆ ಹೊಂದಿದ್ದರಂತೆ. ಹೀಗಾಗಿ, ಈ ಪಾತ್ರಕ್ಕೆ ಚಂದನ್ ಸೂಕ್ತವೆಂದು ಆಯ್ಕೆ ಮಾಡಿಕೊಂಡರಂತೆ.

ಜುಲೈ 12 ರಿಂದ ಶೂಟಿಂಗ್

ಈಗಾಗಲೇ ಚಿತ್ರದ ಮುಹೂರ್ತ ಮುಗಿಸಿಕೊಂಡಿರುವ ಚಿತ್ರತಂಡ ಜುಲೈ 12 ರಿಂದ ಶೂಟಿಂಗ್ ಗೆ ಮಾಡಲು ನಿರ್ಧರಿಸಿದ್ದಾರಂತೆ. ಚಿತ್ರಕಥೆ ಬಗ್ಗೆ ಹೆಚ್ಚೇನೂ ಬಿಟ್ಟುಕೊಡದ ಚಿತ್ರತಂಡ ಕುತೂಹಲವಾಗಿಟ್ಟಿದೆ. ಇನ್ನು ಈ ಚಿತ್ರದಲ್ಲಿ ನಿಶ್ವಿಕಾ ನಾಯ್ಡು ನಾಯಕಿಯಾಗಿ ಅಭಿನಯಿಸುತ್ತಿದ್ದಾರೆ.