ದೇವರಕೊಂಡ ಜೊತೆ ಸಿನಿಮಾ ಮಾಡ್ಬೇಡ ಎಂದು ಮನೆಯವರೇ ನಿರಾಕರಿಸಿದ್ದರು: ರಶ್ಮಿಕಾ

ವಿಜಯ್ ಜೊತೆ ಇನ್ನೊಂದು ಸಿನಿಮಾ ಬೇಡ

'ಗೀತಾ ಗೋವಿಂದಂ' ಸಿನಿಮಾ ಮಾಡಿ ದೊಡ್ಡ ಸಕ್ಸಸ್ ಕಂಡಿದ್ದ ವಿಜಯ್ ದೇವರಕೊಂಡ ಮತ್ತು ರಶ್ಮಿಕಾ ಜೋಡಿ ಬಗ್ಗೆ ಪರ್ಸನಲ್ ಆಗಿಯೂ ಕೆಲವು ಗಾಸಿಪ್ ಗಳು ಹರಿದಾಡಿದವು. ಈ ಮಧ್ಯೆ ರಶ್ಮಿಕಾ ನಿಶ್ಚಿತಾರ್ಥವೂ ಮುರಿದುಬಿದ್ದಿತ್ತು. ಇದರ ಬಗ್ಗೆ ಮೊದಲೇ ಅರಿತುಕೊಂಡಿದ್ದ ರಶ್ಮಿಕಾ ಕುಟುಂಬಸ್ಥರು ''ವಿಜಯ್ ದೇವರಕೊಂಡ ಜೊತೆ ಇನ್ನೊಂದು ಸಿನಿಮಾ ಬೇಡ'' ಎಂದು ಕಿವಿಮಾತು ಹೇಳಿದ್ದರಂತೆ.

ನಾನು ಮಾಡಬೇಕು ಎಂದು ನಿರ್ಧರಿಸಿದೆ

''ಅಮ್ಮ, ಅಪ್ಪ ನನ್ನ ಕುಟುಂಬದವರು ದೇವರಕೊಂಡ ಜೊತೆ ಇನ್ನೊಂದು ಸಿನಿಮಾ ಯಾಕೆ ಮಾಡ್ತೀಯಾ, ಬೇಡ ಎಂದು ನಿರಾಕರಿಸಿದರು. ಆದರೆ, ಇಲ್ಲ ನಾನು ಈ ಸಿನಿಮಾ ಮಾಡ್ಬೇಕು ಎಂದುಕೊಂಡಿದ್ದೇನೆ. ಇಂತಹ ಸ್ಕ್ರಿಪ್ಟ್ ಕಳೆದುಕೊಳ್ಳುವುದಕ್ಕೆ ನನಗೆ ಇಷ್ಟ ಇಲ್ಲ ಎಂದು ವಾದಿಸಿ ಅವರನ್ನ ಒಪ್ಪಿಸಿ ಈ ಚಿತ್ರ ಆಯ್ಕೆ ಮಾಡಿಕೊಂಡೆ'' ಎಂದು ರಶ್ಮಿಕಾ ಹೇಳಿಕೊಂಡಿದ್ದಾರೆ.

ಯಾರ ಜೊತೆ ನಟಿಸುತ್ತಿದ್ದೇನೆ ಎನ್ನುವುದು ಮುಖ್ಯವಲ್ಲ

''ಯಾರ ಜೊತೆ ಮಾಡುತ್ತಿದ್ದೇನೆ ಎಂದು ಮುಖ್ಯವಲ್ಲ, ಇಂತಹ ಸ್ಕ್ರಿಪ್ಟ್ ಮಾಡಬೇಕು ಎಂಬ ಆಸೆಯಿಂದ ಈ ಚಿತ್ರ ಮಾಡಲು ನಿರ್ಧರಿಸಿದೆ. ಹೀಗೆ, ಪ್ರತಿಯೊಂದು ವಿಚಾರದಲ್ಲೂ ನಾನು ಫೈಟ್ ಮಾಡಿಕೊಂಡು ಬರುತ್ತಿದ್ದೇನೆ'' ಎಂದು ರಶ್ಮಿಕಾ ಮಂದಣ್ಣ ಭಾವುಕರಾದರು. ವೈಜಾಕ್ ನಲ್ಲಿ ನಡೆದ ಡಿಯರ್ ಕಾಮ್ರೇಡ್ ಪ್ರೀ-ರಿಲೀಸ್ ಕಾರ್ಯಕ್ರಮದಲ್ಲಿ ರಶ್ಮಿಕಾ ಈ ವಿಷ್ಯವನ್ನ ಹೇಳಿಕೊಂಡರು.

ರಶ್ಮಿಕಾಗೆ ಚಾಲೆಂಜ್ ಆದ ದೇವರಕೊಂಡ

ರಶ್ಮಿಕಾ ಮಂದಣ್ಣ ಮತ್ತು ವಿಜಯ್ ದೇವರಕೊಂಡ ಅವರ ಸಿನಿಮಾ ನೋಡಿ ಮೆಚ್ಚಿಕೊಂಡ ಪ್ರೇಕ್ಷಕರು ಮತ್ತೆ ಈ ಜೋಡಿಯನ್ನ ಒಟ್ಟಿಗೆ ನೋಡುವ ಆಸೆ ಹಂಚಿಕೊಳ್ಳುತ್ತಾರೆ. ಆದರೆ, ಅದನ್ನ ಹೊರತು ಪಡಿಸಿ ವಿಜಯ್ ದೇವರಕೊಂಡ ಜೊತೆಗಿನ ಸ್ನೇಹ ಮತ್ತು ಆತ್ಮೀಯತೆಯನ್ನ ಅಭಿಮಾನಿಗಳು ಹಾಗೂ ಸಾಮಾನ್ಯ ಜನರ ಕೆಲವು ಪ್ರಶ್ನೆಗಳನ್ನ ಕೂಡ ಎದುರಿಸಬೇಕಾಗಿದೆ. ಹೋದಲ್ಲಿ ಬಂದಲ್ಲಿ ಇಂತಹ ಪ್ರಶ್ನೆಗಳು, ಸೋಶಿಯಲ್ ಮೀಡಿಯಾದಲ್ಲಿ ಇಂತಹ ಪ್ರಶ್ನೆಗಳು ಬರುತ್ತಿರುತ್ತೆ. ಅದನ್ನೆಲ್ಲಾ ಸವಾಲ್ ಆಗಿ ಸ್ವೀಕರಿಸಬೇಕಾಗುತ್ತೆ. ಬಹುಶಃ ರಶ್ಮಿಕಾ ಕೂಡ ಅದನ್ನೆ ಮಾಡುತ್ತಿದ್ದಾರೆ ಅನ್ಸುತ್ತೆ.