'ಕಾಂತಾರ' ಎಫೆಕ್ಟ್‌ ಮಲಯಾಳಂ ಚಿತ್ರರಂಗದೆಡೆಗೆ ರಿಷಬ್! ಸ್ಟಾರ್ ನಟನೊಟ್ಟಿಗೆ ಜುಗಲ್‌ ಬಂಧಿ

ಮೋಹನ್‌ಲಾಲ್ ಜೊತೆ ರಿಷಬ್ ಶೆಟ್ಟಿ!

ಇದೀಗ ಬಂದಿರುವ ಹೊಸ ಸುದ್ದಿಯ ಪ್ರಕಾರ, ರಿಷಬ್ ಶೆಟ್ಟಿ, ಮಲಯಾಳಂ ಚಿತ್ರರಂಗಕ್ಕೆ ಕಾಲಿಡುತ್ತಿದ್ದಾರೆ. ಅದೂ ಆ ಚಿತ್ರರಂಗದ ಸ್ಟಾರ್ ನಟರೊಬ್ಬರೊಟ್ಟಿಗೆ ತೆರೆ ಹಂಚಿಕೊಳ್ಳಲಿದ್ದಾರೆ. ಮಲಯಾಳಂ ಸ್ಟಾರ್ ನಟ ಮೊಹನ್‌ಲಾಲ್ 'ಮಲೈಕೊಟ್ಟೈ ವಾಲಿಬನ್' ಹೆಸರಿನ ಸಿನಿಮಾದಲ್ಲಿ ನಟಿಸುತ್ತಿದ್ದು, ಪ್ರತಿಭಾವಂತ ನಿರ್ದೇಶಕ ಲಿಜು ಜೋಸೆಫ್ ಆ ಸಿನಿಮಾ ನಿರ್ದೇಶನ ಮಾಡುತ್ತಿದ್ದಾರೆ. ಸಿನಿಮಾದಲ್ಲಿ ರಿಷಬ್ ಶೆಟ್ಟಿ ಸಹ ನಟಿಸಲಿದ್ದಾರೆ ಎನ್ನಲಾಗುತ್ತಿದೆ.

ಭಾರಿ ಬಜೆಟ್ ಸಿನಿಮಾ 'ಮಲೈಕೊಟ್ಟೈ ವಾಲಿಬನ್'

ಲಿಜು ಜೋಸೆಫ್ ನಿರ್ದೇಶಿಸುತ್ತಿರುವ 'ಮಲೈಕೊಟ್ಟೈ ವಾಲಿಬನ್' ಸಿನಿಮಾದಲ್ಲಿ ಭಾರತದ ಹಲವು ಚಿತ್ರರಂಗದ ಖ್ಯಾತನಾಮ ನಟರು ನಟಿಸಲಿದ್ದಾರೆ. ಸಿನಿಮಾದಲ್ಲಿ ತಮಿಳಿನ ಸೂಪರ್ ಸ್ಟಾರ್ ನಟ ಕಮಲ್ ಹಾಸನ್ ನಟಿಸಲಿದ್ದಾರೆ. ಜೊತೆಗೆ ತಮಿಳಿನ ಜೀವಾ ಸಹ ಈ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ಮರಾಠಿ ಚಿತ್ರರಂಗದ ಜನಪ್ರಿಯ ನಟಿ ಸೊನಾಲಿ ಕುಲಕರ್ನಿ ಈ ಸಿನಿಮಾದ ನಾಯಕಿಯಾಗಿ ನಟಿಸಲಿದ್ದಾರೆ. ಬೆಂಗಾಲಿ ನಟಿ ಕತಾ ನಂದಿ ಸಹ ಸಿನಿಮಾದಲ್ಲಿ ನಟಿಸಲಿದ್ದಾರೆ.

ದಾನಿಶ್ ಸೇಠ್ ಸಹ ನಟನೆ?

'ಮಲೈಕೊಟ್ಟೈ ವಾಲಿಬನ್' ಸಿನಿಮಾದಲ್ಲಿ ರಿಷಬ್ ಶೆಟ್ಟಿ ಮಾತ್ರವೇ ಅಲ್ಲದೆ ಕನ್ನಡದ ಮತ್ತೊಂದು ಪ್ರತಿಭೆ ದಾನಿಶ್ ಸೇಠ್ ಸಹ ನಟಿಸಲಿದ್ದಾರೆ ಎನ್ನಲಾಗುತ್ತಿದೆ. ಭಾರಿ ಬಜೆಟ್‌ನ ಈ ಸಿನಿಮಾದ ಪೋಸ್ಟರ್ ಇತ್ತೀಚೆಗಷ್ಟೆ ಬಿಡುಗಡೆ ಆಗಿತ್ತು. ಸಿನಿಮಾದ ಸ್ಕೇಲ್ ದಿನದಿಂದ ದಿನಕ್ಕೆ ದೊಡ್ಡದಾಗುತ್ತಿದ್ದು, ಸಿನಿಮಾ ಭಾರಿ ಬಜೆಟ್‌ನಲ್ಲಿ ನಿರ್ಮಾಣವಾಗಿ, ಪ್ಯಾನ್ ಇಂಡಿಯಾ ಲೆವೆಲ್‌ನಲ್ಲಿ ಬಿಡುಗಡೆ ಆಗುವುದು ಖಾತ್ರಿಯಾಗಿದೆ.

'ಕಾಂತಾರ 2' ಕೆಲಸಗಳಲ್ಲಿ ರಿಷಬ್ ಶೆಟ್ಟಿ ಬ್ಯುಸಿ

ಇನ್ನು ರಿಷಬ್ ಶೆಟ್ಟಿ ಮುಂದೆ ಹಲವು ಆಯ್ಕೆಗಳಿವೆ. ಆದರೆ ಎಲ್ಲ ಆಯ್ಕೆಗಳನ್ನು ಬದಿಗೆ ತಳ್ಳಿ 'ಕಾಂತಾರ 2' ಸಿನಿಮಾದ ಮೇಲೆ ರಿಷಬ್ ಗಮನ ವಹಿಸಿದ್ದಾರೆ. 'ಕಾಂತಾರ' ಸಿನಿಮಾ ದೊಡ್ಡ ಹಿಟ್ ಆಗಿರುವ 'ಕಾಂತಾರ 2' ಸಿನಿಮಾವನ್ನು ಸಹ ಅದೇ ಮಾದರಿಯಲ್ಲಿ ನಿರ್ಮಿಸಲು ಸಿದ್ಧತೆ ಆರಂಭಿಸಿದ್ದಾರೆ. ಸಿನಿಮಾದ ಕತೆ ಬರವಣಿಗೆ ಚಾಲ್ತಿಯಲ್ಲಿದ್ದು, ಮುಂದಿನ ಮಳೆಗಾಲದಲ್ಲಿ ಸಿನಿಮಾದ ಚಿತ್ರೀಕರಣ ಪ್ರಾರಂಭವಾಗಲಿದೆ. 'ಕಾಂತಾರ 2' ಸಿನಿಮಾವು 'ಕಾಂತಾರ' ಸಿನಿಮಾದಲ್ಲಿ ನಡೆದ ಕತೆಗಿಂತಲೂ ಹಿಂದೆ ನಡೆದ ಕತೆಯನ್ನು ಒಳಗೊಂಡಿರಲಿದೆ ಎನ್ನಲಾಗುತ್ತಿದೆ.