ವಿದೇಶಗಳ ಗಳಿಕೆಯಲ್ಲೇ ಬಜೆಟ್ ಮೇಲೆ ಲಾಭ: 'ಕಾಂತಾರ' ಓವರ್‌ಸೀಸ್‌ ಕಲೆಕ್ಷನ್‌ನ ಪೈಸಾ ಪೈಸಾ ಲೆಕ್ಕ ಇಲ್ಲಿದೆ!

30 ದಿನಕ್ಕೆ ₹27 ಕೋಟಿ ಕಲೆಕ್ಷನ್

ಸೆಪ್ಟೆಂಬರ್‌ 30ರಂದು ಇಂಗ್ಲೀಷ್ ಸಬ್‌ಟೈಟಲ್ ಜೊತೆಗೆ ದೇಶ ವಿದೇಶಗಳಲ್ಲಿ 'ಕಾಂತಾರ' ಸಿನಿಮಾ ರಿಲೀಸ್ ಆಗಿತ್ತು. ಎಲ್ಲಾಕಡೆ ಚಿತ್ರಕ್ಕೆ ಭರ್ಜರಿ ರೆಸ್ಪಾನ್ಸ್ ಸಿಕ್ಕಿತ್ತು. 15 ದಿನಗಳ ನಂತರ ಹಿಂದಿ, ತಮಿಳು, ತೆಲುಗು, ಮಲಯಾಳಂ ಭಾಷೆಗಳಿಗೆ ಡಬ್ ಆಗಿ ತೆರೆಗಪ್ಪಳಿಸಿತ್ತು. 30 ದಿನಗಳಲ್ಲಿ ಓವರ್‌ಸೀಸ್‌ ಮಾರ್ಕೆಟ್‌ನಲ್ಲಿ ಸಿನಿಮಾ 27 ಕೋಟಿ ರೂ.ಗೂ ಅಧಿಕ ಕಲೆಕ್ಷನ್ ಮಾಡಿ ದಾಖಲೆ ಬರೆದಿದೆ.

ಎಲ್ಲೆಲ್ಲಿ ಎಷ್ಟೆಷ್ಟು ಕಲೆಕ್ಷನ್?

'ಕಾಂತಾರ' ಸಿನಿಮಾ ಯಾವ ದೇಶದಲ್ಲಿ ಎಷ್ಟು ಕಲೆಕ್ಷನ್ ಮಾಡಿದೆ ಎನ್ನುವುದನ್ನು ನೋಡುವುದಾದರೆ..

ಉತ್ತರ ಅಮೇರಿಕಾ- 14.7 ಕೋಟಿ ರೂ.
ಆಸ್ಟ್ರೇಲಿಯಾ- 1.92 ಕೋಟಿ ರೂ.
ನ್ಯೂಜಿಲೆಂಡ್- 10.8 ಕೋಟಿ ರೂ.
ಯುಕೆ- 1.19 ಕೋಟಿ ರೂ.
ಯುಎಇ- 5 ಕೋಟಿ ರೂ.
ಇತರೆ ದೇಶಗಳಲ್ಲಿ- 4 ಕೋಟಿ ರೂ.

ಒಟ್ಟು- 26.92 ಕೋಟಿ ರೂ.

ಶೀಘ್ರದಲ್ಲೇ ₹300 ಕೋಟಿ ಕ್ಲಬ್

ಈಗಾಗಲೇ ಸಿನಿಮಾ ವಿಶ್ವದಾದ್ಯಂತ 280 ಕೋಟಿಗೂ ಅಧಿಕ ಗ್ರಾಸ್ ಕಲೆಕ್ಷನ್ ಮಾಡಿದೆ. ಶೀಘ್ರದಲ್ಲೇ ₹300 ಕೋಟಿ ಕ್ಲಬ್ ಸೇರುವ ಸುಳಿವು ಸಿಗುತ್ತಿದೆ. ತಿಂಗಳು ಕಳೆದರೂ ವಿದೇಶಗಳಲ್ಲಿ ಕನ್ನಡ ಸಿನಿಮಾವೊಂದು ಈ ರೀತಿ ಸದ್ದು ಮಾಡುತ್ತಿರುವುದು ಇದೇ ಮೊದಲು. 'ಕಾಂತಾರ' ಸಿನಿಮಾ ನಿಜಕ್ಕೂ ತೆರೆಮೇಲೆ ಮ್ಯಾಜಿಕ್ ಮಾಡಿದೆ.

ಹಿಂದಿ ಬೆಲ್ಟ್‌ನಲ್ಲೂ ಭರ್ಜರಿ ಕಲೆಕ್ಷನ್

ತೆಲುಗು, ಹಿಂದಿ ಹಾಗೂ ಮಲಯಾಳಂ ವರ್ಷನ್ 'ಕಾಂತಾರ' ಚಿತ್ರಕ್ಕೆ ಭರ್ಜರಿ ರೆಸ್ಪಾನ್ಸ್ ಸಿಕ್ತಿದೆ. ಸಿನಿಮಾ ರಿಲೀಸ್ ಆಗಿ 15 ದಿನ ಕಳೆದರೂ ಹೊರ ರಾಜ್ಯಗಳಲ್ಲಿ ಹೌಸ್‌ಫುಲ್ ಆಗುತ್ತಿದೆ. ಹಿಂದಿ ಬೆಲ್ಟ್‌ನಲ್ಲಿ 40 ಕೋಟಿಗೂ ಅಧಿಕ ಕಲೆಕ್ಷನ್ ಮಾಡಿ ಸಿನಿಮಾ ಮುನ್ನುಗ್ಗುತ್ತಿದೆ. ಆಂಧ್ರ, ತೆಲಂಗಾಣದ ಕಲೆಕ್ಷನ್ ಕೂಡ ಕೂಡ 40 ಕೋಟಿ ದಾಟಿದೆ. ಕೇರಳದಲ್ಲಿ 10 ಕೋಟಿ ಸಮೀಪದಲ್ಲಿದೆ. ಒಟ್ಟಾರೆ ಎಲ್ಲೆಲ್ಲೂ 'ಕಾಂತಾರ' ಮೇನಿಯಾ ಜೋರಾಗಿದೆ.