ದಾಖಲೆ..ದಾಖಲೆ.. ಬರೀ ದಾಖಲೆ: ಬುಕ್‌ಮೈ ಶೋ, IMDb ರೇಟಿಂಗ್‌ನಲ್ಲೂ 'ಕಾಂತಾರ' ಭಾರತದಲ್ಲೇ ನಂಬರ್ 1

ಬುಕ್‌ಮೈ ಶೋನಲ್ಲಿ 99% ರೇಟಿಂಗ್

ಬುಕ್‌ಮೈ ಶೋನಲ್ಲಿ ಟಿಕೆಟ್ ಬುಕ್ ಮಾಡಿ ಸಿನಿಮಾ ನೋಡಿದ ಪ್ರೇಕ್ಷಕರು, ಚಿತ್ರಕ್ಕೆ ತಮ್ಮ ರೇಟಿಂಗ್ ಕೊಡುವ ಅವಕಾಶ ಇದೆ. ಇದೇ ರೇಟಿಂಗ್‌ ನೋಡಿಕೊಂಡು ಸಾಕಷ್ಟು ಜನ ಸಿನಿಮಾ ನೋಡಲು ಬರ್ತಾರೆ. 'ಕಾಂತಾರ' 16 ಸಾವಿರಕ್ಕೂ ಅಧಿಕ ಜನ ವೋಟ್‌ ಮಾಡಿದ್ದು, 99% ರೇಟಿಂಗ್ ಸಿಕ್ಕಿದೆ. ಭಾರತೀಯ ಚಿತ್ರರಂಗದಲ್ಲೇ ಇಂತಾದೊಂದು ದಾಖಲೆ ಮಾಡಿರುವ ಮೊದಲ ಸಿನಿಮಾ 'ಕಾಂತಾರ' ಎನ್ನಲಾಗ್ತಿದೆ.

ಎಲ್ಲರ ಬಾಯಲ್ಲೂ 'ಕಾಂತಾರ': ಮೂರು ದಿನ ಈ ಸಿನಿಮಾ ದೋಚಿದ್ದೆಷ್ಟು?

ಮಂಕಾದ 'ಪೊನ್ನಿಯಿನ್ ಸೆಲ್ವನ್', 'ವಿಕ್ರಂವೇದ'

'ಕಾಂತಾರ' ಜೊತೆಗೆ ತಮಿಳಿನ 'ಪೊನ್ನಿಯಿನ್ ಸೆಲ್ವನ್' ಬಾಲಿವುಡ್‌ನ 'ವಿಕ್ರಂವೇದ' ಸಿನಿಮಾಗಳು ತೆರೆಕಂಡು ಭರ್ಜರಿ ಪ್ರದರ್ಶನ ಕಾಣ್ತಿದೆ. ಬಜೆಟ್, ಕ್ಯಾನ್ವಾಸ್, ಮಾರ್ಕೆಟ್ ಲೆಕ್ಕಾಚಾರದಲ್ಲಿ ಈ ಎರಡು ಸಿನಿಮಾಗಳು 'ಕಾಂತಾರ'ಗಿಂತ ದೊಡ್ಡ ಸಿನಿಮಾಗಳು. ಆದರೆ ಕಂಟೆಂಟ್ ಮತ್ತು ಕ್ವಾಲಿಟಿ ವಿಚಾರದಲ್ಲಿ 'ಕಾಂತಾರ' ಮೊದಲ ಸ್ಥಾನದಲ್ಲಿದೆ. ಬುಕ್‌ಮೈ ಶೋನಲ್ಲಿ 'ಪೊನ್ನಿಯಿನ್ ಸೆಲ್ವನ್' ಚಿತ್ರಕ್ಕೆ 91 ಸಾವಿರ ಜನ ವೋಟ್ ಮಾಡಿದ್ದು 87% ರೇಟಿಂಗ್ ಅಷ್ಟೇ ಸಿಕ್ಕಿದೆ. 'ವಿಕ್ರಂವೇದ' ಸಿಕ್ಕಿರುವುದು ಕೂಡ 87% ರೇಟಿಂಗ್ ಮಾತ್ರ. 99% ರೇಟಿಂಗ್ ಭಾರತೀಯ ಚಿತ್ರರಂಗದಲ್ಲಿ ಯಾವುದೇ ಚಿತ್ರಕ್ಕೂ ಸಿಕ್ಕಿಲ್ಲ ಎನ್ನಲಾಗ್ತಿದೆ.

IMDb ರೇಟಿಂಗ್‌ನಲ್ಲೂ 'ಕಾಂತಾರ' ನಂಬರ್ 1

ಬರೀ ಬುಕ್‌ ಮೈಶೋ ಮಾತ್ರವಲ್ಲ, IMDb ರೇಟಿಂಗ್‌ನಲ್ಲೂ 'ಕಾಂತಾರ' ನಂಬರ್ ವನ್ ಸ್ಥಾನದಲ್ಲಿದೆ. 9.7 ರೇಟಿಂಗ್‌ನಿಂದ 'ಕಾಂತಾರ' ದಾಖಲೆ ಬರೆದಿದೆ. 'ವಿಕ್ರಂವೇದ' ಚಿತ್ರಕ್ಕೆ 7.2 ಹಾಗೂ 'ಪೊನ್ನಿಯಿನ್ ಸೆಲ್ವನ್' ಚಿತ್ರಕ್ಕೆ 8.6 ರೇಟಿಂಗ್ ಮಾತ್ರ ಸಿಕ್ಕಿದೆ. ಬುಕ್‌ಮೈ ಶೋ ಹಾಗೂ IMDbಯಲ್ಲಿ 'ಕಾಂತಾರ' ಚಿತ್ರಕ್ಕೆ ಸಿಕ್ಕಿರುವ ರೇಟಿಂಗ್ ನೋಡಿ ಪರಭಾಷಿಕರು ಹುಬ್ಬೇರಿಸಿದ್ದಾರೆ. ಇದ್ಯಾವ ಸಿನಿಮಾ ಗುರೂ, ಈ ಪಾಟಿ ರೇಟಿಂಗ್ ಇದೆ. ಸಿನಿಮಾ ನೋಡಲೇ ಬೇಕು ಎಂದು ಸೋಶಿಯಲ್ ಮೀಡಿಯಾದಲ್ಲಿ ಕಾಮೆಂಟ್ ಮಾಡ್ತಿದ್ದಾರೆ.

ಬಾಕ್ಸಾಫೀಸ್‌ನಲ್ಲಿ 20 ಕೋಟಿ ದಾಟಿದ ಕಲೆಕ್ಷನ್

'ಕಾಂತಾರ' ಚಿತ್ರ ಬಾಕ್ಸಾಫೀಸ್‌ನಲ್ಲೂ ಸಖತ್ ಸದ್ದು ಮಾಡ್ತಿದೆ. ಎಲ್ಲಾ ಕಡೆ ಹೌಸ್‌ಫುಲ್ ಪ್ರದರ್ಶನ ಕಾಣುವ ಮೂಲಕ ಕೋಟಿ ಕೋಟಿ ಕೊಳ್ಳೆ ಹೊಡೀತಿದೆ. 4 ದಿನಕ್ಕೆ ಸಿನಿಮಾ ಕಲೆಕ್ಷನ್ 20 ಕೋಟಿ ದಾಟಿರುವ ಅಂದಾಜಿದೆ. ಆಯುಧಪೂಜೆ ಹಾಗೂ ವಿಜಯದಶಮಿ ರಜೆಯ ದಿನಗಳಲ್ಲಿ ಕಲೆಕ್ಷನ್ ಮತ್ತಷ್ಟು ಹೆಚ್ಚುವ ಸುಳಿವು ಸಿಕ್ತಿದೆ.