'ಸಾಹೋ' ಸ್ವಂತ ಚಿತ್ರವಲ್ಲ: ಫ್ರೆಂಚ್ ಭಾಷೆಯಿಂದ ಕದ್ದ ಮಾಲು

ಸಾಹೋ ಸ್ವಮೇಕ್ ಚಿತ್ರವಲ್ಲ

'ಸಾಹೋ ಸಿನಿಮಾ ಕದ್ದ ಚಿತ್ರ' ಎಂದು ಫ್ರೆಂಚ್ ನಿರ್ದೇಶಕ ಜೆರೋಮ್ ಸಲ್ಲೆ ಆರೋಪಿಸಿದ್ದಾರೆ. 2008ರಲ್ಲಿ ತೆರೆಕಂಡಿದ್ದ 'ಲಾರ್ಗೊ ವಿಂಚ್' ಚಿತ್ರವನ್ನ ರೀಮೇಕ್ ಮಾಡಿದ್ದಾರೆ ಎಂದು ಜೆರೋಮ್ ಸಲ್ಲೆ ಸಾಹೋ ಡೈರೆಕ್ಟರ್ ವಿರುದ್ಧ ದೂರಿದ್ದಾರೆ.

ಲಾರ್ಗೊ ವಿಂಚ್ ಚಿತ್ರದ ಫ್ರೀಮೆಕ್

ಈ ಬಗ್ಗೆ ಟ್ವಿಟ್ಟರ್ ನಲ್ಲಿ ಕಾಮೆಂಟ್ ಮಾಡಿರುವ ಜೆರೋಮ್ ''ಲಾರ್ಗೊ ವಿಂಚ್ ಚಿತ್ರದ ಫ್ರೀಮೆಕ್ ಇದ್ದಂತೆ. ಆದರೂ ಅದಕ್ಕಿಂತಲೂ ಕೆಟ್ಟದಾಗಿ ಸಿನಿಮಾ ಮಾಡಲಾಗಿದೆ. ತೆಲುಗು ನಿರ್ದೇಶಕರೇ ನನ್ನ ಕೆಲಸವನ್ನ ಕಾಪಿ ಮಾಡ್ತೀರಾ, ಅದನ್ನಾದರೂ ಸರಿಯಾಗಿ ಮಾಡಿ'' ಎಂದು ವ್ಯಂಗ್ಯ ಮಾಡಿದ್ದಾರೆ.

ನನಗೆ ಭಾರತದಲ್ಲಿ ಭವಿಷ್ಯವಿದೆ

''ನನ್ನ ವೃತ್ತಿ ಜೀವನಕ್ಕೆ ಭಾರತದಲ್ಲಿ ಒಳ್ಳೆಯ ಭವಿಷ್ಯ ಎಂದು ಭಾವಿಸುತ್ತೇನೆ'' ಎಂದು ಹೇಳುವ ಮೂಲಕ ಸಾಹೋ ಸಿನಿಮಾ ಬಗ್ಗೆ ಟೀಕೆ ಮಾಡಿದ್ದಾರೆ. ಅಂದ್ಹಾಗೆ, ಲಾರ್ಗೊ ವಿಂಚ್ ಸಿನಿಮಾ ಎರಡು ಭಾಗಗಳಾಗಿ ಬಿಡುಗಡೆಯಾಗಿದೆ. 2008ರಲ್ಲಿ ಮೊದಲ ಭಾಗ ಹಾಗೂ 2011ರಲ್ಲಿ ಎರಡನೇ ಭಾಗ ಬಂದಿತ್ತು.

ಅಜ್ಞಾತವಾಸಿ ಮೇಲೂ ಇದೇ ಆರೋಪ

ಅಂದ್ಹಾಗೆ, ಜೆರೋಮ್ ಸಲ್ಲೆ ತೆಲುಗು ಚಿತ್ರದ ಮೇಲೆ ಇಂತಹ ಆರೋಪ ಮಾಡುತ್ತಿರುವುದು ಇದೇ ಮೊದಲಲ್ಲ. ಇದಕ್ಕೂ ಮುಂಚೆ ಪವನ್ ಕಲ್ಯಾಣ್ ಅಭಿನಯಿಸಿದ್ದ 'ಅಜ್ಞಾತವಾಸಿ' ಚಿತ್ರವೂ ಫ್ರೆಂಚ್ ಚಿತ್ರದಿಂದ ಕಾಪಿ ಮಾಡಲಾಗಿದೆ ಎಂದು ದೂರಿದ್ದರು.