'ಬಿಗ್ ಬಾಸ್' ಹೊಸ ಸೀಸನ್ ಗೆ ವೇದಿಕೆ ಸಜ್ಜು

ಸಲ್ಮಾನ್ ಖಾನ್ ಗ್ಯಾಲರಿ

ಆದರಿದು ಈಟಿವಿ ಕನಡ ವಾಹಿನಿಯ 'ಬಿಗ್ ಬಾಸ್' ಕನ್ನಡ ಕಾರ್ಯಕ್ರಮವಲ್ಲ. ಕಲರ್ಸ್ ವಾಹಿನಿಯಲ್ಲಿ ಸಲ್ಮಾನ್ ಖಾನ್ ನಡೆಸಿಕೊಡಲಿರುವ ಹಿಂದಿಯ ಬಿಗ್ ಬಾಸ್ ಕಾರ್ಯಕ್ರಮ. ಈಗ ಸೀಸನ್ 7ಕ್ಕೆ ಎಲ್ಲಾ ಸಿದ್ಧತೆಗಳನ್ನೂ ಮಾಡಿಕೊಳ್ಳಲಾಗಿದೆ.

ಈ ಬಾರಿಯೂ ಕಾರ್ಯಕ್ರಮವನ್ನು 47ರ ಹರೆಯದ ನಟ ಸಲ್ಲು ನಿರೂಪಿಸಲಿದ್ದಾರೆ. 'ಬಿಗ್ ಬಾಸ್ 7'ರ ಪ್ರೊಮೋ ಶೀಘ್ರದಲ್ಲೇ ಬಿಡುಗಡೆಯಾಗಲಿದೆ . ಈ ಬಾರಿಯ ವಿಶೇಷ ಎಂದರೆ ಸಲ್ಮಾನ್ ಖಾನ್ ಅವರದು ದ್ವಿಪಾತ್ರ ನಿರೂಪಣೆ. ಅವರ 1997ರ ಹಿಟ್ ಚಿತ್ರ 'ಜುಡ್ವಾ' ಚಿತ್ರದ ದ್ವಿಪಾತ್ರಾಭಿನಯದಂತೆ ಇರುತ್ತದೆ.

'ಜುಡ್ವಾ' ಚಿತ್ರದ ಪಾತ್ರದಂತೆ ಅವರು ಎರಡು ಭಿನ್ನ ಗೆಟಪ್ ಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಈ ಸಂಬಂಧ ಶೀಘ್ರದಲ್ಲೇ ಚಿತ್ರೀಕರಣ ಆರಂಭವಾಗಲಿದೆ. ಈ ಬಾರಿ ತಮ್ಮ ಕಾರ್ಯಕ್ರಮವನ್ನು ವಿಭಿನ್ನವಾಗಿ ತೋರಿಸುವ ಪ್ರಯತ್ನವನ್ನು ಮಾಡುತ್ತಿದ್ದೇವೆ ಎನ್ನುತ್ತವೆ ವಾಹಿನಿ ಮೂಲಗಳು.

'ಬಿಗ್ ಬಾಸ್' ಸೀಸನ್ 4ರಿಂದಲೂ ಸಲ್ಮಾನ್ ಖಾನ್ ಈ ಕಾರ್ಯಕ್ರಮವನ್ನು ನಿರೂಪಿಸುತ್ತಿದ್ದಾರೆ. ಒಂದಷ್ಟು ತಮಾಷೆ, ಸೀರಿಯಸ್, ಹುಡುಗಾಟ ಎಲ್ಲವನ್ನೂ ಮಾಡುವ ಮೂಲಕ ಸಲ್ಲು ತಮ್ಮ ಅಭಿಮಾನಿಗಳಿಗೆ ಇನ್ನೂ ಹತ್ತಿರವಾಗಿದ್ದರು. ಈ ಬಾರಿ ಡಬಲ್ ಧಮಾಕಾ ನೀಡುವ ಮೂಲಕ ಕಾರ್ಯಕ್ರಮಕ್ಕೆ ಇನ್ನಷ್ಟು ಮೆರುಗು ತರುತ್ತಿದ್ದಾರೆ. (ಏಜೆನ್ಸೀಸ್)