ದಕ್ಷಿಣ ಭಾರತದ ಹಿರಿಯ ನಟಿ ಗೀತಾಂಜಲಿ ನಿಧನ

ದಕ್ಷಿಣ ಭಾರತದ ಖ್ಯಾತ ಹಿರಿಯ ನಟಿ ಗೀತಾಂಜಲಿ ಇಂದು ಬೆಳಿಗ್ಗೆ ವಿಧಿವಶರಾಗಿದ್ದಾರೆ. ಅನಾರೋಗ್ಯದಿಂದ ಬಳಲುತ್ತಿದ್ದ ಗೀತಾಂಜಲಿ ಅವರು ಗುರುವಾರ ಬೆಳಿಗ್ಗೆ ಹೃದಯಾಘಾತದಿಂದ ಅಪೋಲೊ ಆಸ್ಪತ್ರೆಯಲ್ಲಿ ಕೊನೆಯುಸಿರೆಳೆದಿದ್ದಾರೆ.

ಗೀತಾಂಜಲಿ ಸಾವಿನಿಂದ ಸೌತ್ ಇಂಡಸ್ಟ್ರಿ ಶೋಕಸಾಗರದಲ್ಲಿ ಮುಳುಗಿದೆ. ತೆಲುಗು ಸಿನಿಮಾರಂಗ ಕಂಡ ಪ್ರತಿಭಾನ್ವಿತ ಕಲಾವಿದೆ ಗೀತಾಂಜಲಿ ಸಾವಿಗೆ ತಮಿಳು, ಹಿಂದಿ, ಮಲಯಾಳಂ, ಕನ್ನಡ ಚಿತ್ರರಂಗ ಸಂತಾಪ ಸೂಚಿಸಿದೆ.

ಗೀತಾಂಜಲಿ ಅವರು 1957ರಲ್ಲಿ ಆಂಧ್ರ ಪ್ರದೇಶದ ಕಾಕಿನಾಡದಲ್ಲಿ ಜನಿಸಿದ್ದರು. 1961ರಲ್ಲಿ ಎನ್.ಟಿ.ಆರ್ ಅಭಿನಯದ ಸೀತಾರಾಮ ಕಲ್ಯಾಣಂ ಚಿತ್ರದ ಮೂಲಕ ಸಿನಿಮಾ ರಂಗ ಪ್ರವೇಶಿಸಿದರು. ಬಳಿಕ ಅನೇಕ ಸಿನಿಮಾಗಳಲ್ಲಿ ಗೀತಾಂಜಲಿ ಬಣ್ಣ ಹಚ್ಚಿದ್ದರು.

ಸುಮಾರು 50ಕ್ಕೂ ಹೆಚ್ಚು ಚಿತ್ರಗಳಲ್ಲಿ ಗೀತಾಂಜಲಿ ನಟಿಸಿದ್ದಾರೆ. ಡಾಕ್ಟರ್ ಚಕ್ರವರ್ತಿ, ಮುರಳಿಕೃಷ್ಣ, ಅಬ್ಬಾಯಿ ಗಾರು ಅಮ್ಮಾಯಿ ಗಾರು ಅಂತಹ ಸಿನಿಮಾದಲ್ಲಿ ಕಾಣಿಸಿಕೊಂಡಿದ್ದರು. ಮದುವೆ ಬಳಿಕ ಮತ್ತೆ ಸಿನಿಮಾಗಳಲ್ಲಿ ಕಾಣಿಸಿಕೊಂಡಿದ್ದ ಗೀತಾಂಜಲಿ ಪೋಷಕ ಪಾತ್ರಗಳಿಗೂ ಜೈ ಎಂದಿದ್ದರು.

ಗೀತಾಂಜಲಿ ಅವರ ಕೊನೆಯ ಚಿತ್ರ ತಮನ್ನಾ ನಟಿಸಿದ್ದ ದಟ್ ಈಸ್ ಮಹಾಲಕ್ಷ್ಮಿ. 2018ರಲ್ಲಿ ಈ ಸಿನಿಮಾ ತೆರೆಕಂಡಿತ್ತು.