ಯಾರಿವಳು.. ಸ್ಯಾಂಡಲ್ ವುಡ್ ಗೆ 'ಗುಡುಗಿ'ನಂತೆ ಬಂದವಳು.?

'ಮೊಗ್ಗಿನ ಮನಸು' ಮತ್ತು 'ಭಲೇ ಅಪರೂಪ ನಮ್ ಜೋಡಿ' ಎಂಬ ಧಾರಾವಾಹಿಯಲ್ಲಿ ಕಾಣಿಸಿಕೊಂಡಿದ್ದ ಕಿರುತೆರೆ ನಟಿ ಶುಭರಕ್ಷ ಅವರು ಇದೀಗ 'ಗುಡುಗು' ಚಿತ್ರದ ಮೂಲಕ ಬಿಗ್ ಸ್ಕ್ರೀನ್ ನಲ್ಲಿ ತಮ್ಮ ಪ್ರತಿಭೆ ತೋರಲು ಸಜ್ಜಾಗಿದ್ದಾರೆ.

ಅಂದಹಾಗೆ ಈ ಮೊದಲು ಶುಭರಕ್ಷ ಅವರು ಒಪ್ಪಿಕೊಂಡಿದ್ದ ಎರಡು ಸಿನಿಮಾಗಳು ಅರ್ಧಕ್ಕೆ ನಿಂತು ಹೋಗಿದ್ದವು. ಆದರೂ ಎದೆಗುಂದದ ನಟಿ ಎಲ್ಲಾ ಸವಾಲುಗಳನ್ನು ಮೆಟ್ಟಿ ಇದೀಗ 'ಗುಡುಗು' ಮೂಲಕ ಗುಡುಗಲು ತಯಾರಾಗಿದ್ದಾರೆ. ಜೊತೆಗೆ ಇನ್ನೊಂದು ಚಿತ್ರಕ್ಕೂ ಸಹಿ ಹಾಕಿದ್ದು, ಇನ್ನೂ ಹೆಸರಿಡದ ಚಿತ್ರ ಆಗಸ್ಟ್ ಕೊನೆಯ ವಾರದಲ್ಲಿ ಟೇಕಾಫ್ ಆಗಲಿದೆ.

ಬರೀ ಕನ್ನಡ ಮಾತ್ರವಲ್ಲದೇ ಟಾಲಿವುಡ್ ಕ್ಷೇತ್ರದಲ್ಲೂ ಮಿಂಚಲು ತಯಾರಿ ನಡೆಸುತ್ತಿರುವ ನಟಿ ಶುಭರಕ್ಷ ಅವರು ಈಗಾಗಲೇ ಟಾಲಿವುಡ್ ನಲ್ಲಿ ಚಿತ್ರದ ಶೂಟಿಂಗ್ ಒಂದನ್ನು ಮುಗಿಸಿದ್ದಾರೆ. ಜೊತೆಗೆ ಕಾಲಿವುಡ್ ನತ್ತ ಕೂಡ ಮುಖ ಮಾಡಿರುವ ಶುಭರಕ್ಷ ನಿಖಿಲ್ ಮುರುಗನ್ ಅವರ ಪ್ರಾಜೆಕ್ಟ್ ಒಂದರಲ್ಲಿ ನಟಿಸಲು ಒಪ್ಪಿಕೊಂಡಿದ್ದಾರೆ.

'ಗುಡುಗು' ಚಿತ್ರದ ಇನ್ನೊಂದು ವಿಶೇಷ ಏನಪ್ಪಾ ಅಂದ್ರೆ, ಈ ಚಿತ್ರದಲ್ಲಿ ಸುವರ್ಣ ವಾಹಿನಿಯಲ್ಲಿ ಪ್ರಸಾರವಾಗುತ್ತಿದ್ದ 'ಅರಗಿಣಿ' ಧಾರಾವಾಹಿ ಖ್ಯಾತಿಯ ನಟಿ ಖುಷಿ ಅಲಿಯಾಸ್ ಮೇಘನಾ ಗೌಡ ಅವರು ಕೂಡ ಈ ಚಿತ್ರದಲ್ಲಿ ಖಡಕ್ ಪಾತ್ರ ಮಾಡಿದ್ದಾರೆ.['ಅರಗಿಣಿ' ಸೀರಿಯಲ್ ಖುಷಿ 'ಗುಡುಗು' ಯಾರ ಮೇಲೆ]

ಕೈಯಲ್ಲಿ ಗನ್ ಹಿಡಿದು ತಮ್ಮ ಅಭಿಮಾನಿಗಳಿಗೆ ಮೋಡಿ ಮಾಡಲಿರುವ ನಟಿ ಖುಷಿ ಅಲಿಯಾಸ್ ಮೇಘನಾ ಗೌಡ ಅವರು ಈ ಚಿತ್ರದ ಮೂಲಕ ಬಿಗ್ ಸ್ಕ್ರೀನ್ ಗೆ ಎಂಟ್ರಿ ಕೊಡುತ್ತಿದ್ದಾರೆ.

'ಬೆಂಕಿಪಟ್ಣ' ಚಿತ್ರದ ಖ್ಯಾತಿಯ ನಟ ನಟ ಪ್ರತಾಪ್ ನಾರಾಯಣ್ ಅವರು ಈ ಚಿತ್ರದಲ್ಲಿ ನಟಿ ಶುಭರಕ್ಷ ಅವರ ಜೊತೆ ರೋಮ್ಯಾನ್ಸ್ ಮಾಡಲಿದ್ದು, ನಟ ಜೀವಾ ಅವರು ಖುಷಿ ಅವರಿಗೆ ನಾಯಕನಾಗಿ ಕಾಣಿಸಿಕೊಂಡಿದ್ದಾರೆ.

ಈಗಾಗಲೇ ಬಹುತೇಕ ಚಿತ್ರೀಕರಣ ಮುಗಿಸಿರುವ ಚಿತ್ರತಂಡ, ಟಾಕಿ ಪೋರ್ಷನ್ ಕೆಲಸಗಳಲ್ಲಿ ಬಿಜಿಯಾಗಿದೆ. ಆಗಸ್ಟ್ ತಿಂಗಳಿನಿಂದ ಚಿತ್ರದ ಹಾಡುಗಳ ಚಿತ್ರೀಕರಣ ನಡೆಯಲಿದೆ.