ಆಟೋರಾಜನ ಅಭಿಮಾನಿಗಳಿಗೆ ಸಿಹಿ ಸುದ್ದಿ: ಶಂಕ್ರಣ್ಣನ ಚಿತ್ರಮಂದಿರಕ್ಕೆ ಮತ್ತೆ ಜೀವ

ಶಂಕರ್ ನಾಗ್ ಸ್ವಾಗತ ಓನಿಕ್ಸ್

'ಶಂಕರ್ ನಾಗ್ ಚಿತ್ರಮಂದಿರ' ಎಂದು ಗುರುತಿಸಲಾಗುತ್ತಿದ್ದ ಚಿತ್ರಮಂದಿರ ಇನ್ನು ಮುಂದೆ 'ಶಂಕರ್ ನಾಗ್ ಸ್ವಾಗತ ಓನಿಕ್ಸ್' ಎಂದು ಮರುನಾಮಕರಣವಾಗಿದೆ. ಎಲ್ಇಡಿ ಮೂಲಕ ಈ ಚಿತ್ರಮಂದಿರದಲ್ಲಿ ಸಿನಿಮಾ ಪ್ರದರ್ಶನ ಮಾಡಲಾಗುತ್ತಿದ್ದು, ಜಗತ್ತಿನ ಅತಿ ದೊಡ್ಡ ಎಲ್ಇಡಿ ಪರದೆ ಎಂದು ಹೇಳಲಾಗ್ತಿದೆ.

614 ಆಸನಗಳ ಥಿಯೇಟರ್

14 ಮೀಟರ್ ಎಲ್ಇಡಿ ಪರದೆಯನ್ನ ಈ ಚಿತ್ರಮಂದಿರದಲ್ಲಿ ಅಳವಡಿಸಲಾಗುತ್ತಿದೆ. ಮಲೇಷ್ಯಾ ಮತ್ತು ಚೀನಾ ನಂತರ ಬೆಂಗಳೂರಿನಲ್ಲಿ ದೊಡ್ಡ ಎಲ್ಇಡಿ ಪರದೆಯಾಗಲಿದೆ. ದೆಹಲಿ ಮತ್ತು ಮುಂಬೈನಲ್ಲಿ ಇದಕ್ಕಿಂತ ಚಿಕ್ಕ ಪರದೆ ಇದೆ. 3ಡಿ ತಂತ್ರಜ್ಞಾನ ಹೊಂದಿರಲಿದೆ. ಇಂದಿನಿಂದ ಶೋ ಆರಂಭವಾಗಿದೆ.

ಹಳೇ ಥಿಯೇಟರ್ ಬಗ್ಗೆ ಮಾಹಿತಿ

560 ಸೀಟುಗಳ ಹೊಂದಿರುವ ಶಂಕರ್​ನಾಗ್ ಚಿತ್ರಮಂದಿರ ಶುರುವಾಗಿದ್ದು 1979ರಲ್ಲಿ. ಮೊದಲು ಇಲ್ಲಿ ಇಂಗ್ಲಿಷ್ ಚಿತ್ರಗಳು ಹೆಚ್ಚಾಗಿ ಪ್ರದರ್ಶನವಾಗುತ್ತಿತ್ತು. ನಂತರ ಅದು ಕನ್ನಡ ಚಿತ್ರಗಳ ಪ್ರದರ್ಶನಕ್ಕೇ ಮೀಸಲಾಯ್ತು. ಸುಮಾರು 38 ವರ್ಷಗಳ ಕಾಲ ಕನ್ನಡ ಸಿನಿಮಾ ಸೇರಿದಂತೆ ಚಿತ್ರ ಪ್ರೇಮಿಗಳಿಗೆ ಮನರಂಜನೆ ನೀಡುತ್ತಾ ಬಂದಿದೆ.

ಮೊದಲ ಹೆಸರು ಸಿಂಪೋನಿ

ಅಂದ್ಹಾಗೆ, ಈ ಚಿತ್ರಮಂದಿರಕ್ಕೆ ಮೊದಲು 'ಸಿಂಫೋನಿ' ಎಂಬ ಹೆಸರಿತ್ತಂತೆ. 1991ರಲ್ಲಿ ಶಂಕರ್​ನಾಗ್ ಅವರ ನಿಧನದ ನಂತರ ಆ ಚಿತ್ರಮಂದಿರಕ್ಕೆ ಶಂಕರ್​ನಾಗ್ ಚಿತ್ರಮಂದಿರ ಎಂದು ಹೊಸದಾಗಿ ನಾಮಕರಣ ಮಾಡಲಾಗಿತ್ತು. ಎರಡ್ಮೂರು ಸಲ ಚಿತ್ರಮಂದಿರಕ್ಕೆ ಬಾಗಿಲು ಹಾಕಲಾಗಿತ್ತು. ಆದ್ರೆ, ಮತ್ತೆ ಮತ್ತೆ ಶೋ ಆರಂಭ ಮಾಡಿತ್ತು.