ತೆಲುಗಿನಲ್ಲಿ ಜಲ್ಸಾ, ತಮಿಳಿನಲ್ಲಿ ಬಾ‍ಷಾ, ಕನ್ನಡದಲ್ಲಿ ಮರುಬಿಡುಗಡೆಯಾಗಿ ಹೆಚ್ಚು ಕಲೆಕ್ಷನ್ ಮಾಡಿದ ಚಿತ್ರ ಯಾವುದು?

ತಮಿಳಿನಲ್ಲಿ ರಜಿನಿ 'ಬಾಷಾ' ರಿ ರಿಲೀಸ್

ರಜಿನಿಕಾಂತ್ ಅಭಿನಯದ ಬಾಷಾ 1995ರಲ್ಲಿ ತೆರೆ ಕಂಡಿದ್ದ ಸೂಪರ್ ಹಿಟ್ ಚಿತ್ರ. ರಜಿನಿ ಸಿನಿ ಜೀವನದಲ್ಲಿ ಆ ಸಮಯಕ್ಕೆ ಬೃಹತ್ ಹಿಟ್ ಆಗಿದ್ದ ಈ ಬಾಷಾ ನಂತರ ಕನ್ನಡಕ್ಕೂ ಸಹ ರಿಮೇಕ್ ಆಯಿತು. ರಜಿನಿ ಹುಟ್ಟುಹಬ್ಬ ಹಾಗೂ ಕೆಲ ವಿಶೇಷ ಸಂದರ್ಭಗಳಲ್ಲಿ ಬಾಷಾ ಚಿತ್ರವನ್ನು ರಿ ರಿಲೀಸ್ ಮಾಡಿದ್ದಿದೆ. ಬಾಷಾ ಅನೇಕ ಬಾರಿ ರಿ ರಿಲೀಸ್ ಅಗಿದ್ದು, ಮರುಬಿಡುಗಡೆ ವೇಳೆಯೂ ಸಹ ಹೌಸ್‌ಫುಲ್ ಪ್ರದರ್ಶನಗಳನ್ನು ಕಂಡಿದೆ. ಈ ಮೂಲಕ ತಮಿಳಿನಲ್ಲಿ ಬಾಷಾ ಸಿನಿಮಾ ಮರುಬಿಡುಗಡೆಯಾಗಿ ಅತಿಹೆಚ್ಚು ಗಳಿಕೆ ಮಾಡಿದ ಚಿತ್ರ ಎನಿಸಿಕೊಂಡಿದೆ.

ಕನ್ನಡದಲ್ಲಿ ರಿ ರಿಲೀಸ್ ಆಗಿ ಅತಿಹೆಚ್ಚು ಹಣ ಬಾಚಿದ ಸಿನಿಮಾ ಯಾವುದು?

ಇನ್ನು ರಿ ರಿಲೀಸ್ ಮೂಲಕ ಅತಿಹೆಚ್ಚು ಕಲೆಕ್ಷನ್ ಮಾಡಿದ ಕನ್ನಡ ಸಿನಿಮಾ ಶಿವರಾಜ್ ಕುಮಾರ್ ಅಭಿನಯದ, ಉಪೇಂದ್ರ ನಿರ್ದೇಶನದ ಓಂ. 500ಕ್ಕೂ ಹೆಚ್ಚು ಬಾರಿ ರಿ ರಿಲೀಸ್ ಆಗಿರುವ ಓಂ ಅತಿಹೆಚ್ಚು ಬಾರಿ ಮರುಬಿಡುಗಡೆಯಾದ ಚಿತ್ರ ಎಂಬ ದಾಖಲೆಯನ್ನು ಹೊಂದಿದೆ. ಬಿಡುಗಡೆಯಾಗಿ ಎರಡು ದಶಕದ ನಂತರ ಕಿರುತೆರೆಯಲ್ಲಿ ಪ್ರಸಾರವಾದ ಓಂ ಅಲ್ಲಿಯವರೆಗೂ ಹಲವಾರು ಬಾರಿ ತೆರೆಗಪ್ಪಳಿಸಿದೆ. ಓಂ ಚಿತ್ರ ಮರುಬಿಡುಗಡೆಯಾದಾಗಲೆಲ್ಲಾ ಎಷ್ಟರ ಮಟ್ಟಿಗೆ ಜನ ಮುಗಿಬಿದ್ದು ವೀಕ್ಷಿಸುತ್ತಿದ್ದರು ಹಾಗೂ ಕ್ರೇಜ್ ಹೇಗಿತ್ತು ಎಂಬುದನ್ನು ಬಿಡಿಸಿ ಹೇಳಬೇಕಾದ ಅಗತ್ಯವಿಲ್ಲ. ಹೀಗೆ 500ಕ್ಕಿಂತ ಹೆಚ್ಚು ಬಾರಿ ಮರುಬಿಡುಗಡೆಯಾಗಿರುವ ಓಂ ರಿರಿಲೀಸ್ ಮೂಲಕ ಅತಿಹೆಚ್ಚು ಹಣ ಬಾಚಿದ ಕನ್ನಡ ಸಿನಿಮಾ ಎನಿಸಿಕೊಂಡಿದೆ.

ಹೊಸ ಕ್ವಾಲಿಟಿಯಲ್ಲಿ ಬಿಡುಗಡೆಯಾದಾಗ ಅರ್ಧಶತಕ

ಓಂ ಚಿತ್ರವನ್ನು ಹೊಸ ತಂತ್ರಜ್ಙಾನದೊಂದಿಗೆ ಡಿಟಿಎಸ್ ಸೌಂಡ್ ಕ್ವಾಲಿಟಿಯಲ್ಲಿ 2015ರ ಮಾರ್ಚ್ 12ರಂದು ಸುಮಾರು ನೂರಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ ಬಿಡುಗಡೆ ಮಾಡಲಾಗಿತ್ತು. ಈ ವೇಳೆ ಓಂ ಸಿನಿಮಾ ಹಲವು ಚಿತ್ರಮಂದಿರಗಳಲ್ಲಿ 50 ದಿನಗಳನ್ನು ಪೂರೈಸಿತ್ತು. ಇಷ್ಟರ ಮಟ್ಟಿಗಿನ ಕ್ರೇಜ್ ಇದ್ದ ಓಂ ಮರುಬಿಡುಗಡೆಯಾದಾಗಲೆಲ್ಲಾ ಬಾಕ್ಸ್ ಆಫೀಸ್ ಕೊಳ್ಳೆ ಹೊಡೆದಿದೆ.

ಬಿಡುಗಡೆಯಾಗಿ ಇಪ್ಪತ್ತು ವರ್ಷಗಳ ನಂತರ ಟಿವಿ ಪ್ರೀಮಿಯರ್

ಬೆಳ್ಳಿ ತೆರೆಯಲ್ಲಿ ಕೋಟಿ ಕೋಟಿ ಬಾಚಿದ್ದ ಓಂ ಸಿನಿಮಾ ಬರೋಬ್ಬರಿ ಇಪ್ಪತ್ತು ವರ್ಷಗಳ ನಂತರ ಟಿವಿಯಲ್ಲಿ ಪ್ರಸಾರವಾಯಿತು. ಹತ್ತು ಕೋಟಿಗೆ ಓಂ ಸಿನಿಮಾದ ಟಿವಿ ಹಕ್ಕನ್ನು ಸನ್ ನೆಟ್‌ವರ್ಕ್ ಖರೀದಿಸಿತ್ತು. ಬಿಡುಗಡೆಯಾಗಿ ಇಪ್ಪತ್ತು ವರ್ಷಗಳ ನಂತರವೂ ಭರ್ಜರಿ ಮೊತ್ತಕ್ಕೆ ಮಾರಾಟವಾದ ಚಿತ್ರ ಎಂಬ ಹೆಗ್ಗಳಿಕೆ ಕೂಡ ಓಂ ಚಿತ್ರಕ್ಕಿದೆ.