ನಮ್ ಇಂಡಸ್ಟ್ರಿಯಲ್ಲಿಯೂ 'ಕಾಸ್ಟಿಂಗ್ ಕೌಚ್' ಇದ್ಯಾ? ಇಲ್ಲಿದೆ ಶಿವಣ್ಣನ ನೇರ ಉತ್ತರ

ಇತ್ತೀಚಿಗಿನ ಸಂದರ್ಶನ

ಇತ್ತೀಚಿಗೆ 'ಟಗರು' ಸಿನಿಮಾದ 50 ದಿನದ ವಿಶೇಷವಾಗಿ ಸುದ್ದಿ ವಾಹಿನಿಯೊಂದರಲ್ಲಿ ಸಂದರ್ಶನ ಮಾಡಲಾಗಿತ್ತು. ಈ ವೇಳೆ ಕಾರ್ಯಕ್ರಮದ ನಿರೂಪಕಿ ''ಶಿವಣ್ಣ ಇತ್ತೀಚಿಗೆ ತುಂಬ ಸುದ್ದಿ ಮಾಡುತ್ತಿರುವ ಸಾಮಾಜಿಕ ವಿಷಯ ಅಂದರೆ ಕಾಸ್ಟಿಂಗ್ ಕೌಚ್, ಬೇರೆ ಇಂಡಸ್ಟ್ರಿಯಲ್ಲಿ ಮತ್ತೆ ನಮ್ಮ ಇಂಡಸ್ಟ್ರಿಯಲ್ಲಿ ಸಹ ಈ ಸುದ್ದಿ ಇದೆ.'' ಎಂದು ಹೇಳಿದರು. ಆಗ ಶಿವಣ್ಣ ನೇರವಾಗಿ ಕಾಸ್ಟಿಂಗ್ ಕೌಚ್ ಬಗ್ಗೆ ಮಾತನಾಡಿದ್ದಾರೆ.

ಇಲ್ಲಿಯೂ ಕೆಲವರು ಮಾತನಾಡಿದ್ದು ನಿಜ

''ನನ್ನ ಪ್ರಕಾರ ನಮ್ಮ ಇಂಡಸ್ಟ್ರಿಯಲ್ಲಿ ಇದುವರೆಗೆ ಆ ರೀತಿಯ ಹೆಚ್ಚು ಘಟನೆ ಕೇಳಿ ಬಂದಿಲ್ಲ. ಇಲ್ಲಿ ಕೆಲವರು ಆ ಬಗ್ಗೆ ಮಾತನಾಡಿದ್ದು ನಿಜ. ಆದರೆ ಅವರು ಯಾವ ದೃಷ್ಟಿಯಿಂದ ಹೇಳಿದ್ದಾರೆ ನನಗೆ ಗೊತ್ತಿಲ್ಲ. ನನ್ನ ಪ್ರಕಾರ ಇಲ್ಲಿ ಆ ರೀತಿ ಆಗಿಲ್ಲ. ಇಲ್ಲಿ ದರ್ಶನ್, ಸುದೀಪ್, ಅಪ್ಪು, ಯಶ್, ಗಣೇಶ್, ವಿಜಿ ಯಾರ ಮೇಲೆಯೂ ಆ ರೀತಿಯ ಸುದ್ದಿ ಬಂದಿಲ್ಲ.'' ಎಂದು ಸ್ಪಷ್ಟನೆ ಶಿವಣ್ಣ ನೀಡಿದರು.

ನ್ಯೂಸ್ ಕೇಳಿ ಶಾಕ್ ಆಯ್ತು

''ನಮ್ಮ ಜೊತೆಗೆ ನಟಿಸಿದ್ದ ಯಾವುದೇ ನಟಿಯರು ಯಾರಿಗೂ ಆ ರೀತಿ ಆಗಿಲ್ಲ. ಬೇರೆ ಇಂಡಸ್ಟ್ರಿ ಬಗ್ಗೆ ನನಗೆ ಅಷ್ಟು ಗೊತ್ತಿಲ್ಲ. ಇತ್ತೀಚಿಗೆ ನಾನು ನ್ಯೂಸ್ ನೋಡಿದಾಗ ಗೊತ್ತಾಯ್ತು. ತೆಲುಗಿನಲ್ಲಿ ಯಾರಿಗೋ ಆ ರೀತಿ ಆಗಿದೆ ಅಂತ ಸುದ್ದಿ ಬರುತಿತ್ತು. ಆ ಸುದ್ದಿ ನೋಡಿದಾಗ ನಮಗೆ ಸಹ ಶಾಕ್ ಆಯ್ತು.'' - ಶಿವರಾಜ್ ಕುಮಾರ್, ನಟ

ಇಂಡಸ್ಟ್ರಿಯನ್ನು ಕುಟುಂಬ ಅಂತ ತಿಳಿದುಕೊಂಡಿದ್ದೇವೆ

''ನಾವು ಇಂಡಸ್ಟ್ರಿಯನ್ನು ಒಂದು ಕುಟುಂಬ ಅಂತ ತಿಳಿದುಕೊಂಡಿದ್ದೇವೆ. ಸೋ, ಹಾಗೆ ಮಾಡಿದರೆ ನಾವು ಒಬ್ಬರಿಗೆ ಮೋಸ ಮಾಡಿದಂತೆ ಆಗುತ್ತೆ. ಯಾವತ್ತು ನಾವು advantage ತೆಗೆದುಕೊಳ್ಳಬಾರದು. ಯಾರೇ ಆಗಲಿ ಈ ರೀತಿ ಮಾಡುವುದು ಸರಿ ಅಲ್ಲ. ಎಲ್ಲರಿಗೆ ತಾಯಿ, ತಂಗಿ, ಹೆಂಡತಿ, ಮಕ್ಕಳು, ಒಳ್ಳೆಯ ಗೆಳೆಯರು ಇದ್ದಾರೆ. ನಾವು ದ್ರೋಹ ಮಾಡಬಾರದು. ನನಗೆ ಅನಿಸುತ್ತೆ ಆ ರೀತಿ ಆಗಬಾರದು.'' - ಶಿವರಾಜ್ ಕುಮಾರ್, ನಟ

ಇಂದು ಬೆಳಕಿಗೆ ಬಂದ ಘಟನೆ

ಕಾಸ್ಟಿಂಗ್ ಕೌಚ್ ಬಗ್ಗೆ ಇಂದು ಕೂಡ ಒಂದು ಘಟನೆ ಬೆಳಕಿಗೆ ಬಂದಿದೆ. ಕೃತಿ ತಾಪಂಡ ಬಳಿಕ ನಟಿ ಖುಷಿ ಕಾಸ್ಟಿಂಗ್ ಕೌಚ್ ಬಗ್ಗೆ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಖುಷಿ ತಮಗೆ ಆದ ಕಿರುಕುಳ ಬಗ್ಗೆ ಫೇಸ್ ಬುಕ್ ನಲ್ಲಿ ಹಂಚಿಕೊಂಡಿದ್ದಾರೆ. ನಟಿ ಖುಷಿ ಶೆಟ್ಟಿ ಅವರಿಗೆ ತಮಿಳುನಾಡಿನ ಸಿನಿಮಾರಂಗದ ವ್ಯಕ್ತಿ ಕರೆ ಮಾಡಿ ತಮಿಳು ಚಿತ್ರದಲ್ಲಿ ಅಭಿನಯ ಮಾಡುತ್ತೀರ ಎಂದು ಕೇಳಿದ್ದಾರೆ. ಹೌದು ಅಭಿನಯಿಸುತ್ತೇನೆ ಎಂದಾಗ ನಿಮ್ಮ ಬಗ್ಗೆ ಸಂಪೂರ್ಣ ಮಾಹಿತಿ ಹಾಗೂ ಫೋಟೋ ಗಳನ್ನ ಕಳುಹಿಸಿ ಎಂದಿದ್ದಾರೆ. ಫೋಟೋ ಡಿಟೇಲ್ಸ್ ತೆಗೆದುಕೊಂಡ ನಂತರ ನಿರ್ಮಾಪಕರ ಜೊತೆ ಅಡ್ಜೆಸ್ಟ್ ಮಾಡಿಕೊಳ್ಳಿ ಸಂಭಾವನೆ ಇನ್ನೂ ಹೆಚ್ಚಾಗುತ್ತೆ ಎಂದಿದ್ದಾರೆ. ಇದರಿಂದ ಕೋಪಗೊಂಡ ಖುಷಿ ಶೆಟ್ಟಿ ಶಶಿ ಎನ್ನುವ ವ್ಯಕ್ತಿಗೆ ಬಾಯಿಗೆ ಬಂದಂತೆ ಬೈದಿದ್ದಾರೆ.