ಘೋಸ್ಟ್ ಚಿತ್ರದ ಶಿವಣ್ಣನ ವಿಂಟೇಜ್ ಪೋಸ್ಟರ್ 1983ರ ಅಮೆರಿಕನ್ ಚಿತ್ರದ ಕಾಪಿ!

1983ರ ಅಮೆರಿಕನ್ ಚಿತ್ರದ ಕಾಪಿ

ವೈರಲ್ ಆಗಿದ್ದ ಘೋಸ್ಟ್ ಚಿತ್ರದ ಪೋಸ್ಟರ್ ಅನ್ನು ಹಂಚಿಕೊಂಡಿರುವ ನೆಟ್ಟಿಗನೋರ್ವ ಈ ಪೋಸ್ಟರ್ 1983ರಲ್ಲಿ ತೆರೆಕಂಡಿದ್ದ ಚಿತ್ರ ಸ್ಕಾರ್‌ಫೇಸ್‌ನ ಕಾಪಿ ಎಂದು ಟ್ವೀಟ್ ಮಾಡಿದ್ದಾರೆ. ಹೌದು, ಶಿವಣ್ಣನ ಈ ವಿಶಿಷ್ಟ ಪೋಸ್ಟರ್‌ಗೆ ಬಳಸಲಾಗಿರುವ ಫೋಟೊ 1983ರಲ್ಲಿ ಬಿಡುಗಡೆಯಾಗಿದ್ದ ಸ್ಕಾರ್‌ಫೇಸ್ ಚಿತ್ರದಲ್ಲಿ ಅಲ್ ಫೆಸಿನೊ ಎಂಬ ನಟ ನಿರ್ವಹಿಸಿದ್ದ ಟೋನಿ ಮೊಂಟಾನಾ ಎಂಬ ಪಾತ್ರದ ಫೋಟೊವಾಗಿದೆ. ಈ ಫೋಟೊವನ್ನು ಎಡಿಟ್ ಮಾಡಿ ಅದಕ್ಕೆ ಶಿವ ರಾಜ್‌ಕುಮಾರ್ ಅವರ ತಲೆಯನ್ನು ಸೇರಿಸಿರುವುದನ್ನು ಎರಡೂ ಫೋಟೊಗಳ ನಡುವೆ ಹೋಲಿಕೆ ಮಾಡಿದರೆ ಕಾಣಬಹುದಾಗಿದೆ.

ನಿರ್ದೇಶಕ ಹೇಳಿದ್ದಿಷ್ಟು

ಹೀಗೆ ನೆಟ್ಟಿಗನೋರ್ವ ಘೋಸ್ಟ್ ಚಿತ್ರದ ಪೋಸ್ಟರ್ ಸ್ಕಾರ್‌ಫೇಸ್ ಚಿತ್ರದ ಕಾಪಿ ಎಂದಿದ್ದು, ಇದಕ್ಕೆ ಘೋಸ್ಟ್ ಚಿತ್ರದ ನಿರ್ದೇಶಕ ಎಂಜಿ ಶ್ರೀನಿವಾಸ್ ಪ್ರತಿಕ್ರಿಯೆ ನೀಡಿದ್ದಾರೆ. ಇಂತಹ ತಪ್ಪನ್ನು ತನ್ನ ಗಮನಕ್ಕೆ ತಂದಿದ್ದಕ್ಕೆ ಧನ್ಯವಾದ ತಿಳಿಸಿದ ಎಂಜಿ ಶ್ರೀನಿವಾಸ್ ಇದು ಲುಕ್‌ ಟೆಸ್ಟ್‌ಗಾಗಿ ಯತೀಶ್ ಎಂಬ ಎಡಿಟರ್ ಚಿತ್ರ ಬಿಡಿಸಿ, ಹಲವು ತಂತ್ರಜ್ಙಾನ ಬಳಸಿ ತಯಾರಿಸಿದ ಪೋಸ್ಟರ್ ಆಗಿದೆ, ಆದರೆ ಮುಂದಿನ ದಿನಗಳಲ್ಲಿ ಇಂತಹ ತಪ್ಪುಗಳಾಗದಿರುವ ಹಾಗೆ ಎಚ್ಚರವಹಿಸಲಿದ್ದೇವೆ ಎಂದು ಬರೆದುಕೊಂಡಿದ್ದಾರೆ.

ಶ್ರೀನಿ ಪ್ರತಿಕ್ರಿಯೆಗೆ ಮೆಚ್ಚುಗೆ

ಸದ್ಯ ನಿರ್ದೇಶಕ ಶ್ರೀನಿ ನೀಡಿರುವ ಪ್ರತಿಕ್ರಿಯೆಗೆ ನೆಟ್ಟಿಗರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಸಿನಿ ರಸಿಕರು ತಪ್ಪನ್ನು ಹುಡುಕಿದಾಗ ಅದನ್ನು ಒಪ್ಪಿಕೊಳ್ಳದೇ ತಾವು ಮಾಡಿದ್ದರಲ್ಲಿ ಯಾವುದೇ ತಪ್ಪಿಲ್ಲ, ತಾವು ಯಾರನ್ನೂ ಕಾಪಿ ಮಾಡಿಲ್ಲ, ನಮ್ಮ ಕೆಲಸಕ್ಕೂ ನೀವು ಆರೋಪಿಸುತ್ತಿರುವ ಕೆಲಸಕ್ಕೂ ಸಾಕಷ್ಟು ವ್ಯತ್ಯಾಸವಿದೆ ಎಂದು ವಾದಿಸುವ ನಿರ್ದೇಶಕರ ನಡುವೆ ಈ ರೀತಿ ಮುಂದೆ ಈ ರೀತಿಯ ತಪ್ಪಾಗದಂತೆ ನೋಡಿಕೊಳ್ಳುತ್ತೇವೆ ಎಂದು ಪ್ರತಿಕ್ರಿಯಿಸುವ ನಿರ್ದೇಶಕರು ಸಿಗುವುದು ಬಲು ವಿರಳ, ಇಂತಹ ಮನಸ್ಥಿತಿ ಎಲ್ಲರಲ್ಲೂ ಇರಬೇಕು ಎಂದು ನೆಟ್ಟಿಗರು ಶ್ಲಾಘಿಸಿದ್ದಾರೆ.