ಇಂದು ನಟಿ ಸೌಂದರ್ಯ ಅಭಿಮಾನಿಗಳ ಪಾಲಿಗೆ ಕರಾಳ ದಿನ

ಕಡಿಮೆ ಅವಧಿಯಲ್ಲಿ 120ಕ್ಕು ಹೆಚ್ಚು ಚಿತ್ರಗಳು

ಕನ್ನಡ ಚಿತ್ರರಂಗದ ಮೂಲಕ ಸಿನಿಮಾ ಪಯಣ ಶುರುಮಾಡಿದ ಸೌಂದರ್ಯ ದಕ್ಷಿಣ ಭಾರತದ ಎಲ್ಲಾ ಭಾಷೆಯಲ್ಲೂ ಮಿಂಚುವ ಜೊತೆಗೆ ಬಾಲಿವುಡ್ ಚಿತ್ರರಸಿಕರನ್ನು ರಂಜಿಸಿದ್ದಾರೆ. 1992ರಲ್ಲಿ ಚಿತ್ರರಂಗ ಪ್ರವೇಶ ಮಾಡಿದ ಈ ಚೆಲುವೆ 12 ವರ್ಷದಲ್ಲಿ 120ಕ್ಕು ಹೆಚ್ಚು ಸಿನಿಮಾಗಳಲ್ಲಿ ಅಭಿನಯಿಸಿದ ಖ್ಯಾತಿ ಸೌಂದರ್ಯ ಅವರದ್ದು. ಕನ್ನಡ ಚಿತ್ರರಂಗದ ಮೂಲಕ ಪಯಣ ಪ್ರಾರಂಭಿಸಿದ ಈ ನಟಿ ಕನ್ನಡದಲ್ಲೇ ಕೊನೆಯ ಸಿನಿಮಾ ಮಾಡಿ ಕನ್ನಡಾಭಿಮಾನಿಗಳಿಗೆ ಮರೆಯಲಾಗದ ನೋವು ನೀಡಿ ಬಾರದ ಲೋಕಕ್ಕೆ ಹೊರಟು ಹೋಗಿ 15ವರ್ಷಗಳಾಗಿವೆ.

ವೈದ್ಯೆಯಾಗಬೇಕಿದ್ದ ಸೌಂದರ್ಯ

ಸೌಂದರ್ಯ ನಟಿಯಾಗದಿದ್ದರೆ ಡಾಕ್ಟರ್ ಆಗಿ ಜನರ ಸೇವೆ ಮಾಡುತ್ತಿದ್ದರು. ಯಾಕೆಂದ್ರೆ ಪಿಯುಸಿ ಮುಗಿಸಿದ ನಂತರ ಸೌಂದರ್ಯ ಮೊದಲ ವರ್ಷದ ಎಂಬಿಬಿಎಸ್ ಅನ್ನು ಪೂರ್ಣಗೊಳಿಸಿದ್ದರು. ಆದ್ರೆ ಆಕಸ್ಮಿಕವಾಗಿ ಚಿತ್ರರಂಗಕ್ಕೆ ಎಂಟ್ರಿ ಕೊಟ್ಟ ಸೌಂದರ್ಯ ಭಾರತೀಯ ಚಿತ್ರರಂಗದ ಮೇರು ನಟಿಯಾಗಿ ಬೆಳೆದು ಅಲ್ಪ ಕಾಲದಲ್ಲೆ ದುರಂತ ಸಾವಿಗೆ ಸುತ್ತಾದರು.

ದ್ವೀಪ ಚಿತ್ರದ ಮೂಲಕ ನಿರ್ಮಾಪಕಿ ಆದ ನಟಿ

ಕಮರ್ಷಿಯಲ್ ಚಿತ್ರಗಳಲ್ಲಿ ಹೆಚ್ಚಾಗಿ ಕಾಣಿಸಿಕೊಳ್ಳುತ್ತಿದ್ದ ಸೌಂದರ್ಯ 'ದ್ವೀಪ' ಚಿತ್ರದ ಮೂಲಕ ಕಲಾತ್ಮಕ ಚಿತ್ರದಲ್ಲೂ ಅಭಿನಯಿಸಿ ಅಭಿಮಾನಿಗಳ ಮೆಚ್ಚುಗೆ ಪಡೆದಿದ್ದರು. ಅಭಿನಯದ ಜೊತೆಗೆ 'ದ್ವೀಪ' ಚಿತ್ರದ ಮೂಲಕ ನಿರ್ಮಾಪಕಿಯಾಗಿ ಬಡ್ತಿ ಕೂಡ ಪಡೆದ್ದರು ಸೌಂದರ್ಯ. ಗರೀಶ್ ಕಾರವಳ್ಳಿ ನಿರ್ದೇಶನದಲ್ಲಿ ಮೂಡಿಬಂದ 'ದ್ವೀಪ' ರಾಷ್ಟ್ರ ಪ್ರಶಸ್ತಿಯನ್ನು ಮುಡಿಗೇರಿಸಿಕೊಂಡಿತ್ತು. ಅಷ್ಟೆಯಲ್ಲ ಸಾಕಷ್ಟು ಪ್ರಶಸ್ತಿಗಳು ಹರಿದು ಬಂದಿದ್ದವು.

ಭಾರತೀಯ ಚಿತ್ರರಂಗದ ಪರಿಪೂರ್ಣ ನಟಿ

ಸೌಂದರ್ಯ ಮತ್ತು ತೆಲುಗು ನಟ ವೆಂಕಟೇಶ್ ಅವರ ಜೋಡಿ ತೆಲುಗು ಚಿತ್ರರಂಗದಲ್ಲಿ ಸೂಪರ್ ಹಿಟ್ ಜೋಡಿಯಾಗಿತ್ತು. ಸಿನಿಪ್ರಿಯರ ಫೇವರಿಟ್ ಫೇರ್ ಆಗಿದ್ದ ಇವರು ಸುಮಾರು 6ಕ್ಕು ಹೆಚ್ಚು ಚಿತ್ರಗಳಲ್ಲಿ ಒಟ್ಟಿಗೆ ಅಭಿನಯಿಸಿದ್ದಾರೆ. ಸೌಂದರ್ಯ ಅವರ ಅದ್ಭುತ ನಟನೆ ಕಂಡು ನಟ ವೆಂಕಟೇಶ್ ಭಾರತೀಯ ಚಿತ್ರರಂಗದ ಪರಿಪೂರ್ಣ ನಟಿ ಸೌಂದರ್ಯ ಎಂದು ಬಿರುದು ನೀಡಿದ್ದರು.