'ಆಕ್ಟ್-1978' ಸಿನಿಮಾ ವೀಕ್ಷಿಸಲಿರುವ ಶಾಸಕಿ ಸೌಮ್ಯ ರೆಡ್ಡಿ; ನಿರ್ದೇಶಕರು ಹೇಳಿದ್ದೇನು?

ಕೊರೊನಾ ಲಾಕ್ ಡೌನ್ ಬಳಿಕ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾದ ಮೊದಲ ಕನ್ನಡ ಸಿನಿಮಾ ಆಕ್ಟ್-1978 ಚಿತ್ರಕ್ಕೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಆರೇಳು ತಿಂಗಳ ಬಳಿಕ ಚಿತ್ರಮಂದಿರದಲ್ಲಿ ಉತ್ತಮ ಸಿನಿಮಾ ವೀಕ್ಷಿಸಿ ಸಂತಸ ಪಡುತ್ತಿದ್ದಾರೆ. ಆಕ್ಟ್-1978 ಸಿನಿಮಾ ವೀಕ್ಷಿಸಿದ ಪ್ರತಿಯೊಬ್ಬರು ಮೆಚ್ಚುಗೆಯ ಮಾತುಗಳನ್ನು ಆಡುತ್ತಿದ್ದಾರೆ.

ಚಿತ್ರಪ್ರಿಯರು ಮಾತ್ರವಲ್ಲದೆ ಸಿನಿಮಾರಂಗದ ಗಣ್ಯರು, ರಾಜಕೀಯ ವ್ಯಕ್ತಿಗಳು ಹಾಗೂ ಪೊಲೀಸ್ ಅಧಿಕಾರಿಗಳು ಸಹ ಆಕ್ಟ-1978 ಸಿನಿಮಾ ವೀಕ್ಷಿಸಿ ಮೆಚ್ಚಿಕೊಂಡಿದ್ದಾರೆ. ಸ್ಯಾಂಡಲ್ ವುಡ್ ನಲ್ಲಿ ಸದ್ಯ ಸದ್ದು ಮಾಡುತ್ತಿರುವ ಆಕ್ಟ್-1978 ಸಿನಿಮಾವನ್ನು ವೀಕ್ಷಿಸುವುದಾಗಿ ಶಾಸಕಿ ಸೌಮ್ಯ ರೆಡ್ಡಿ ಹೇಳಿದ್ದಾರೆ.

ಗುರುವಾರ ಮಧ್ಯಾಹ್ನ ಜೆ.ಪಿ ನಗರದ ಸಿದ್ದೇಶ್ವರ ಚಿತ್ರಮಂದಿರಗಳಲ್ಲಿ ಆಕ್ಟ್-1978 ಸಿನಿಮಾ ನೋಡುತ್ತಿದ್ದಾರೆ. ವಿಶೇಷ ಎಂದರೆ ಸೌಮ್ಯ ರೆಡ್ಡಿ, ತಮ್ಮ ಕ್ಷೇತ್ರದ ಪಾಲಿಕೆ ಸಿಬ್ಬಂದಿ ಮತ್ತು ಕೊರೊನಾ ವಾರಿಯರ್ಸ್ ಜೊತೆ ಸಿನಿಮಾ ವೀಕ್ಷಿಸುತ್ತಿದ್ದಾರೆ.

ಈ ಬಗ್ಗೆ ನಿರ್ದೇಶಕ ಮಂಸೋರೆ ಸಾಮಾಜಿಕ ಜಾಲತಾಣದಲ್ಲಿ ಬಹಿರಂಗ ಪಡಿಸಿದ್ದಾರೆ. 'ಚಲನಚಿತ್ರ ನಿರ್ದೇಶಕರಾದ ಚೈತನ್ಯ ಕೆ.ಎಂ ಸರ್ ಅವರಿಂದ ಒಂದು ಫೋನ್ ಕಾಲ್ ಬಂತು. ಅವರು ಫೋನ್ ಹಸ್ತಾಂತರಿಸಿದ್ದು ಸೌಮ್ಯ ರೆಡ್ಡಿ ಅವರಿಗೆ. 'ನಿಮ್ಮ ಸಿನಿಮಾ ಬಗ್ಗೆ ತುಂಬಾ ಕೇಳಿದಿನಿ, ನಾನು ಮತ್ತು ನಮ್ಮ ಕ್ಷೇತ್ರದ ಪಾಲಿಕೆ ಸಿಬ್ಬಂದಿ ಹಾಗು ಕೋವಿಡ್ ವಾರಿಯರ್ಸ್ ಸಿನಿಮಾ ನೋಡಬೇಕು, ಹತ್ತಿರದಲ್ಲಿ ಎಲ್ಲಿದೆ?" ಎಂದು ಕೇಳಿದರು. "ಮೇಡಂ, ನೀವ್ ಎಲ್ಲಿ ನೋಡ್ತೀರೋ ಅಲ್ಲಿ ಶೋ ಅರೇಂಜ್ ಮಾಡ್ತೀವಿ" ಅಂದಾಗ. "ಬೇಡಿ, ನಾವೇ ಬುಕ್ ಮಾಡಿಕೊಂಡು ನೋಡ್ತೀವಿ, ಥಿಯೇಟರ್ ಹೇಳಿ ಸಾಕು" ಅಂದ್ರು ಎಂದು ಬರೆದುಕೊಂಡಿದ್ದಾರೆ.

Recommended Video

ಇತ್ತೀಚಿಗಷ್ಟೆ ಬೆಂಗಳೂರು ಕಮಿಷನರ್ ಕಚೇರಿ ಸಿಬ್ಬಂದಿ ಸಿನಿಮಾವನ್ನು ವೀಕ್ಷಿಸಿದ್ದರು. ಆಕ್ಟ್-1978 ಸಿನಿಮಾ ಮೆಚ್ಚಿಕೊಂಡ ಪೊಲೀಸ್ ಅಧಿಕಾರಿಗಳು, ನಿರ್ದೇಶಕ ಮಂಸೋರೆ, ಸಂಚಾರಿ ವಿಜಯ್ ಸೇರಿದಂತೆ ಇಡೀ ತಂಡವನ್ನು ಕಮಿಷನರ್ ಆಫೀಸಿಗೆ ಕರೆದು ಅಭಿನಂದನೆ ಸಲ್ಲಿಸಿದ್ದರು. ಎಲ್ಲಾ ಕಡೆಯಿಂದನೂ ಚಿತ್ರಕ್ಕೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದ್ದು, ಸಿನಿಮಾತಂಡ ಸಂತದಲ್ಲಿದೆ.