ಕುವೈತ್‌ನ ಸುದೀಪ್ ಅಭಿಮಾನಿಯ ಕನ್ನಡ: ವಿಡಿಯೋ ವೈರಲ್

ಕುವೈತ್ ಅಭಿಮಾನಿಯ ಉತ್ಸುಕತೆ

ಗಲ್ಫ್ ದೇಶಗಳ ಅಭಿಮಾನಿಗಳೊಂದಿಗೆ, ಕನ್ನಡಿಗರೊಂದಿಗೆ ಸುದೀಪ್ ಇದೇ ಶುಕ್ರವಾರ ಆನ್‌ಲೈನ್ ಸಂವಾದ ನಡೆಸಲಿದ್ದಾರೆ. ಸುದೀಪ್ ಜೊತೆ ಮಾತನಾಡಲು ಕುವೈತ್‌ನ ಹಾಡುಗಾರರೊಬ್ಬರು ಭಾರಿ ಉತ್ಸುಕರಾಗಿದ್ದು, ಈ ಬಗ್ಗೆ ವಿಡಿಯೋದಲ್ಲಿ ಹೇಳಿಕೊಂಡಿದ್ದಾರೆ. ಈ ವಿಡಿಯೋ ಭಾರಿ ವೈರಲ್ ಆಗಿದೆ.

ಕನ್ನಡದಲ್ಲಿಯೇ ಮಾತನಾಡಿದ ಅಲ್-ರಶೀದ್

ಕುವೈತ್‌ನ ಹಾಡುಗಾರ ಮುಬಾರಕ್ ಅಲ್-ರಶೀದ್ ಅಲ್-ಆಜ್ಮಿ, ಟಿಕ್‌ಟಾಕ್‌ನಲ್ಲಿ ವಿಡಿಯೋ ಮಾಡಿ, ಸುದೀಪ್ ಅವರನ್ನು ಸ್ವಾಗತಿಸಿದ್ದಾರೆ. 'ನಮಸ್ಕಾರ ಸುದೀಪ್, ಕುವೈತ್‌ನಿಂದ ನಿಮ್ಮ ಅಭಿಮಾನಿ ಮುಬಾರಕ್ ಅಲ್-ರಶೀದ್ ನಿಮ್ಮ ಜೊತೆ ಮಾತನಾಡಲು ಕಾಯುತ್ತಿದ್ದೇನೆ' ಎಂದು ಕನ್ನಡದಲ್ಲಿಯೇ ಹೇಳಿದ್ದಾರೆ ಅಲ್-ರಶೀದ್.

ಸುಷ್ಮಾ ಸ್ವರಾಜ್ ಎದುರು ಹಾಡಿದ್ದ ಅಲ್‌-ರಶೀದ್

ಅಲ್ ರಶೀದ್ ಅವರು ಗಾಯಕರಾಗಿದ್ದು, ಹಿಂದಿ ಬಾಲಿವುಡ್‌ ಸಿನಿಮಾ ಹಾಡುಗಳನ್ನು ಹಾಡುವುದರಲ್ಲಿ ಖ್ಯಾತರು. ಮಾಜಿ ವಿದೇಶಾಂಗ ಸಚಿವೆ, ದಿವಂಗತ ಸುಷ್ಮಾ ಸ್ವರಾಜ್ ಅವರ ಕುವೈತ್ ಭೇಟಿ ಸಂದರ್ಭ ಅವರು ವೇದಿಕೆ ಮೇಲೆ 'ವೈಷ್ಣವ ಜನತೋ' ಹಾಡು ಹಾಡಿ ಸುಷ್ಮಾ ಅವರಿಂದ ಹೊಗಳಿಕೆಗೆ ಪಾತ್ರರಾಗಿದ್ದರು. ಪ್ರಧಾನಿ ಮೋದಿ ಸಹ ಇವರ ಹಾಡಿನ ವಿಡಿಯೋ ಹಂಚಿಕೊಂಡಿದ್ದರು.

ಕೆನಡಾ, ಅಮೆರಿಕ, ಸಿಂಗಪೂರ್ ಅಭಿಮಾನಿಗಳೊಂದಿಗೆ ಸಂವಾದ

ಸುದೀಪ್ ಅವರು ಈಗಾಗಲೇ ಕೆನಡಾ, ಯು.ಎಸ್‌.ಎ, ಸಿಂಗಪೂರ್ ನ ಅಭಿಮಾನಿಗಳು, ಕನ್ನಡಿಗರೊಂದಿಗೆ ಆನ್‌ಲೈನ್ ಸಂವಾದ ಮಾಡಿದ್ದಾರೆ. ಇದೀಗ ಕುವೈತ್, ದುಬೈ ಸೇರಿದಂತೆ ಗಲ್ಫ್ ರಾಷ್ಟ್ರಗಳ ಅಭಿಮಾನಿಗಳೊಂದಿಗೆ ಇದೇ ಶುಕ್ರವಾರ ಸಂವಾದ ನಡೆಸಲಿದ್ದಾರೆ.