ಗೆಳೆಯ ಗುರುಕಿರಣ್ ಗೆ ಚಾಲೆಂಜ್ ಹಾಕಿದ ಸುದೀಪ್

ಸಂಗೀತ ನಿರ್ದೇಶಕ ಗುರುಕಿರಣ್ ಎರಡು ದಿನಗಳ ಹಿಂದೆಯಷ್ಟೆ ಟ್ವಿಟ್ಟರ್ ಗೆ ಕಾಲಿಟ್ಟರು. ಆದರೆ ಟ್ವಿಟ್ಟರ್ ಬಂದ ತಕ್ಷಣ ಗುರುಕಿರಣ್ ಗೆ ನಟ ಸುದೀಪ್ ಚಾಲೆಂಜ್ ಹಾಕಿದ್ದಾರೆ. ತಮ್ಮ BringOutThePailwaanInYou ಚಾಲೆಂಜ್ ಅನ್ನು ಕಿಚ್ಚ ಈಗ ಗುರುಕಿರಣ್ ಮುಂದೆ ಇಟ್ಟಿದ್ದಾರೆ.

ಈಗಾಗಲೇ ಸುದೀಪ್ ಅವರ ಸವಾಲನ್ನು ನಟ ಉಪೇಂದ್ರ, ನಿರ್ದೇಶಕ ಕೃಷ್ಣ, ನಟ ನವೀನ್ ಕೃಷ್ಣ ಸೇರಿದಂತೆ ಅನೇಕರು ಸ್ವೀಕರಿಸಿದ್ದು, ಈಗ ಗುರುಕಿರಣ್ ಕೂಡ ಚಾಲೆಂಜ್ ಸ್ವೀಕರಿಸಲು ಸಿದ್ಧರಾಗಿದ್ದಾರೆ.

ಅಂದಹಾಗೆ, ಸುದೀಪ್ ಹಾಗೂ ಗುರುಕಿರಣ್ ನಿನ್ನೆ ಮೊನ್ನೆಯ ಸ್ನೇಹಿತರಲ್ಲ. ಚಿತ್ರರಂಗಕ್ಕೆ ಬರುವ ಮುಂಚೆಯೇ ಅವಕಾಶಕ್ಕಾಗಿ ಇಬ್ಬರು ಅದೆಷ್ಟೋ ನಿರ್ದೇಶಕರ ಮನೆ ಮನೆಗೆ ಒಟ್ಟಿಗೆ ಅಲೆದಿದ್ದಾರೆ. ಅದರ ಬಳಿಕ ಸುದೀಪ್ ಸ್ಟಾರ್ ಆದರೆ ಗುರು ಸ್ಟಾರ್ ಕಂಪೋಸರ್ ಆದರು. ಎಷ್ಟು ಎತ್ತರಕ್ಕೆ ಬಳೆದರು ಇಬ್ಬರ ಸ್ನೇಹ ಅದೇ ರೀತಿ ಇದೆ.

ಇನ್ನು ಸದ್ಯ ಹೊಸದಾಗಿ ಟ್ವಿಟ್ಟರ್ ಖಾತೆ ತೆರೆದಿರುವ ಗುರುಕಿರಣ್ ಏಳು ಜನರನ್ನು ಮಾತ್ರ ಫಾಲೋ ಮಾಡುತ್ತಿದ್ದಾರೆ. ನಟ ಉಪೇಂದ್ರ, ಸುದೀಪ್, ಚಿರಂಜೀವಿ ಸರ್ಜಾ, ಪ್ರಿಯಾಂಕ ಉಪೇಂದ್ರ, ಚೈತನ್ಯ, ರಾಜೇಶ್ ಕೃಷ್ಣನ್ ಹಾಗೂ ಪತ್ನಿ ಪಲ್ಲವಿ ಶೆಟ್ಟಿ ರನ್ನು ಗುರುಕಿರಣ್ ಟ್ವಿಟ್ಟರ್ ನಲ್ಲಿ ಹಿಂಬಾಲಿಸುತ್ತಿದ್ದಾರೆ.