ಕನ್ನಡದಲ್ಲಿ ಡಬ್ ಆಗಿ ರಿಲೀಸ್ ಆಗ್ತಿದೆ 'ಕಾಂಚನ 3' ಸಿನಿಮಾ

ಡಬ್ಬಿಂಗ್ ಸಿನಿಮಾಗಳ ಬರುವಿಕೆ ದಿನದಿಂದ ದಿನಕ್ಕೆ ಜಾಸ್ತಿಯಾಗುತ್ತಿದೆ. ತಮಿಳಿನ ಮತ್ತೊಂದು ಬಹು ನಿರೀಕ್ಷಿತ ಸಿನಿಮಾ ಕನ್ನಡಕ್ಕೆ ಡಬ್ ಆಗಿ ರಿಲೀಸ್ ಆಗುತ್ತಿದೆ.

'ಕಾಂಚನ' ಸೀರಿಸ್ ತಮಿಳಿನಲ್ಲಿ ಸಖತ್ ಫೇಮಸ್. ಈಗ ಆ ಸರಣಿಯ ಮತ್ತೊಂದು ಸಿನಿಮಾ 'ಕಾಂಚನ 3' ಬಿಡುಗಡೆಗೆ ರೆಡಿ ಇದೆ. ಈ ಸಿನಿಮಾ ಇದೇ ತಿಂಗಳ 19ಕ್ಕೆ ಬಿಡುಗಡೆಯಾಗುತ್ತಿದೆ. ತಮಿಳಿನ ಈ ಚಿತ್ರ ತೆಲುಗು ಹಾಗೂ ಕನ್ನಡಕ್ಕೆ ಡಬ್ ಆಗುತ್ತಿದೆ.

'ಕಾಂಚನ' ಸರಣಿಯ ಎರಡು ಚಿತ್ರಗಳು ಕನ್ನಡಕ್ಕೆ ರಿಮೇಕ್ ಆಗಿತ್ತು. ಉಪೇಂದ್ರ ಈ ಸಿನಿಮಾದಲ್ಲಿ ನಾಯಕನಾಗಿದ್ದರು. ಆದರೀಗ ಮೂರನೇ ಸಿನಿಮಾ ನೇರವಾಗಿ ಡಬ್ ಆಗಿ ಬರುತ್ತಿದೆ.

ರಾಘವ ಲಾರೆನ್ಸ್ ಈ ಸಿನಿಮಾನ ನಟನೆ ಹಾಗೂ ನಿರ್ದೇಶನ ಮಾಡಿದ್ದಾರೆ. ವೇದಿಕಾ ಈ ಚಿತ್ರದ ನಾಯಕಿಯಾಗಿದ್ದಾರೆ. ಕೆ ಎಸ್ ಕೆ ಶೋ ರೀಲ್ ಹಾಗೂ ಬಸವರಾಜ್ ಈ ಚಿತ್ರದ ಕರ್ನಾಟಕದ ವಿತರಣೆಯನ್ನು ಪಡೆದುಕೊಂಡಿದ್ದಾರೆ.

ಈ ಹಿಂದೆ ಅಜಿತ್ ನಟನೆಯ ಕೆಲ ಸಿನಿಮಾಗಳು ಡಬ್ ಆಗಿ ಕನ್ನಡಕ್ಕೆ ಬಂದಿತ್ತು. ತೆಲುಗಿನ 'ರಂಗಸ್ಥಳಂ' ಕೂಡ ಸದ್ಯದಲ್ಲಿಯೇ ಡಬ್ ಆಗಿ ಬಿಡುಗಡೆಯಾಗಲಿದೆ.