'ವಿಕ್ರಾಂತ್ ರೋಣ' ನಂತರ 'ಪೊನ್ನಿಯಿನ್ ಸೆಲ್ವನ್' ನಿರ್ಮಾಪಕರ ಜೊತೆ ಕಿಚ್ಚನ ಚಿತ್ರ! ಕನ್ನಡದಲ್ಲಿ ಇದೇ ಮೊದಲು

ಲೈಕಾ ಪ್ರೊಡಕ್ಷನ್ಸ್ ಬಂಡವಾಳ, ಚಿತ್ರೀಕರಣ ಯಾವಾಗ?

ಕಿಚ್ಚ ಸುದೀಪ್ ನಟಿಸಲಿರುವ ಮುಂದಿನ ಚಿತ್ರಕ್ಕೆ ತಮಿಳು ಚಿತ್ರರಂಗದ ದೈತ್ಯ ಚಿತ್ರ ನಿರ್ಮಾಣ ಸಂಸ್ಥೆ ಲೈಕಾ ಪ್ರೊಡಕ್ಷನ್ಸ್ ಬಂಡವಾಳ ಹೂಡಲಿದೆ ಎಂಬ ಸುದ್ದಿ ಹೊರಬಿದ್ದಿದೆ. ಸದ್ಯ ಬಿಗ್ ಬಾಸ್ ಕಾರ್ಯಕ್ರಮದಲ್ಲಿ ನಿರತರಾಗಿರುವ ಕಿಚ್ಚ ಜನವರಿ ತಿಂಗಳಿನಲ್ಲಿ ಬಿಗ್ ಬಾಸ್ ಮುಗಿಸಿ ಕೆಲ ದಿನಗಳು ವಿಶ್ರಾಂತಿ ತೆಗೆದುಕೊಂಡು ಅದೇ ತಿಂಗಳು ಲೈಕಾ ಪ್ರೊಡಕ್ಷನ್ ನಿರ್ಮಾಣದ ಚಿತ್ರದಲ್ಲಿ ನಟಿಸಲಿದ್ದಾರೆ. ಅಂದರೆ ಮುಂಬರುವ ಜನವರಿ ತಿಂಗಳಿನಲ್ಲಿ ಕಿಚ್ಚ ಸುದೀಪ್ ಹಾಗೂ ಲೈಕಾ ಪ್ರೊಡಕ್ಷನ್ಸ್ ಸಿನಿಮಾ ಸೆಟ್ಟೇರುವುದು ಖಚಿತ. ಇನ್ನು ಈಗಾಗಲೇ ಲೈಕಾ ತಂಡ ಕಿಚ್ಚ ಸುದೀಪ್ ಅವರನ್ನು ಭೇಟಿಯಾಗಿ ಈ ಕುರಿತು ಮಾತನಾಡಿದೆ ಎಂದೂ ಸಹ ಮಾಹಿತಿ ಇದೆ.

ಇದೇ ಮೊದಲ ಬಾರಿಗೆ ಕನ್ನಡ ಚಿತ್ರಕ್ಕೆ ಬಂಡವಾಳ!

ಇನ್ನು ಕೋಟ್ಯಂತರ ರೂಪಾಯಿಗಳನ್ನು ಸ್ಟಾರ್ ನಟರ ಚಿತ್ರಗಳಿಗೆ ಸರಾಗವಾಗಿ ಹೂಡುವ ಲೈಕಾ ಪ್ರೊಡಕ್ಷನ್ಸ್ ಇದೇ ಮೊದಲ ಬಾರಿಗೆ ಕನ್ನಡ ಚಿತ್ರವೊಂದಕ್ಕೆ ಬಂಡವಾಳ ಹೂಡಲು ತೀರ್ಮಾನಿಸಿದೆ. ಈ ಹಿಂದೆ ತೆಲುಗು ಹಾಗೂ ಹಿಂದಿ ಭಾಷೆಯ ಚಿತ್ರಗಳಿಗೂ ಬಂಡವಾಳ ಹೂಡಿದ್ದ ಲೈಕಾ ಪ್ರೊಡಕ್ಷನ್ಸ್ ತಮಿಳಿನಲ್ಲಿ ರಜಿನಿಕಾಂತ್ ಅಭಿನಯದ ಅನೇಕ ತೆಲುಗು ಚಿತ್ರಗಳು ಸೇರಿದಂತೆ ಶಿವ ಕಾರ್ತಿಕೇಯನ್, ಧನುಷ್, ವಿಜಯ್, ಅಜಿತ್ ಅಭಿನಯದ ಚಿತ್ರಗಳು ಹಾಗೂ ಇತ್ತೀಚೆಗಷ್ಟೆ ಮಣಿರತ್ನಂ ನಿರ್ದೇಶನದ ಪೊನ್ನಿಯಿನ್ ಸೆಲ್ವನ್ ಚಿತ್ರಕ್ಕೂ ಬಂಡವಾಳ ಹೂಡಿತ್ತು. ಈ ಹಿಂದೆ ಬಹುಕೋಟ ವೆಚ್ಚದಲ್ಲಿ ಮೂಡಿ ಬಂದಿದ್ದ ಶಂಕರ್ ಹಾಗೂ ರಜಿನಿ ಕಾಂಬಿನೇಶನ್‌ನ ರೊಬೊ ಚಿತ್ರ ಸರಣಿಗೂ ಸಹ ಇದೇ ಸಂಸ್ಥೆ ಬಂಡವಾಳ ಹಾಕಿತ್ತು.

ಕನ್ನಡದವರು ತಮಿಳಿಗೆ, ತಮಿಳಿನವರು ಕನ್ನಡಕ್ಕೆ!

ಸದ್ಯ ಕನ್ನಡದ ದೊಡ್ಡ ಸಿನಿಮಾ ನಿರ್ಮಾಪಕರು ತಮಿಳು ಚಿತ್ರ ನಿರ್ಮಿಸುವ ಹಾಗೂ ತಮಿಳಿನ ದೊಡ್ಡ ನಿರ್ಮಾಪಕರು ಕನ್ನಡ ಚಿತ್ರ ನಿರ್ಮಿಸುವ ಹೊಸ ಟ್ರೆಂಡ್ ಶುರುವಾಗಿದೆ ಎನ್ನಬಹುದು. ಹೌದು, ಲೈಕಾ ಪ್ರೊಡಕ್ಷನ್ಸ್ ಕನ್ನಡದಲ್ಲಿ ಕಿಚ್ಚ ಸುದೀಪ್ ಚಿತ್ರಕ್ಕೆ ಬಂಡವಾಳ ಹೂಡಲು ಮುಂದಾಗಿದ್ದರೆ, ಇತ್ತ ಹೊಂಬಾಳೆ ಫಿಲ್ಮ್ಸ್ ತಮಿಳಿನಲ್ಲಿ ಕೀರ್ತಿ ಸುರೇಶ್ ಅಭಿನಯದ ರಘು ತಾತಾ ಎಂಬ ಚಿತ್ರಕ್ಕೆ ಬಂಡವಾಳ ಹೂಡುತ್ತಿದ್ದಾರೆ.