ಕುಡಿದು ಕಾರು ಚಾಲನೆ ಮಾಡಿದ ನಟನಿಗೆ ಕೋರ್ಟ್ ಕೊಟ್ಟ ಶಿಕ್ಷೆ ಏನು?

ತೆಲುಗು ನಟ ಕಮ್ ಟಿವಿ ನಿರೂಪಕ ಪ್ರದೀಪ್ ಮಾಚಿರಾಜು ಕುಡಿದು ವಾಹನ ಚಾಲನೆ ಮಾಡಿದ ಪ್ರಕರಣದಲ್ಲಿ ತಪ್ಪಿತಸ್ಥ ಎಂದು ಹೈದರಬಾದ್ ಕೋರ್ಟ್ ಶುಕ್ರವಾರ ತೀರ್ಪು ನೀಡಿದೆ.

ಡಿಸೆಂಬರ್ 31ರ ಮಧ್ಯರಾತ್ರಿ ಪ್ರದೀಪ್ ಮಾಚಿರಾಜು ಪಾರ್ಟಿ ಮುಗಿಸಿ ಮನೆಗೆ ವಾಪಸ್ ಬರುತ್ತಿದ್ದಾಗ ಕುಡಿದು ವಾಹನ ಚಾಲನೆ ಮಾಡಿ ಪೊಲೀಸರಿಗೆ ಸಿಕ್ಕಿಬಿದ್ದಿದ್ದರು. ಜುಬ್ಲಿ ಹಿಲ್ಸ್ ಪೊಲೀಸರು ಮಧ್ಯಪಾನ ಸೇವನೆ ಮಾಡಿ ಕಾರು ಚಾಲನೆ ಮಾಡಿದ್ದಾರೆ ಎಂದು ಪ್ರಕರಣ ದಾಖಲಿಸಿ ಕಾರು ವಶಕ್ಕೆ ಪಡೆದುಕೊಂಡಿದ್ದರು.

ಈ ಪ್ರಕರಣದ ಅರ್ಜಿ ವಿಚಾರಿಸಿದ ನ್ಯಾಯಾಲಯ ಪ್ರದೀಪ್ ಆರೋಪಿ ಎಂದು ತೀರ್ಪು ನೀಡಿ, 2100 ರೂಪಾಯಿ ದಂಡ ವಿದಿಸಿದೆ. ಜೊತೆ ಮೂರು ವರ್ಷ ಡ್ರೈವಿಂಗ್ ಲೈಸೆನ್ಸ್ ರದ್ದು ಮಾಡಿದೆ.

ಅಂದ್ಹಾಗೆ, ಪ್ರದೀಪ್ ಮಾಚಿರಾಜು ತೆಲುಗಿನ 'ವರುಡು', '100% ಲವ್', 'ಜುಲಾಯ್', 'ಅತ್ತಾರಿಂಟಿಕಿ ದಾರೇದಿ', 'ರಾಮಯ್ಯ ವಸ್ತವಯ್ಯ' ಚಿತ್ರಗಳಲ್ಲಿ ನಟಿಸಿದ್ದು, ಹಲವು ಟಿವಿ ಕಾರ್ಯಕ್ರಮಗಳನ್ನ ನಿರೂಪಣೆ ಮಾಡಿದ್ದಾರೆ.