ತೆಲುಗು ಇಂಡಸ್ಟ್ರಿಗೆ ಚೆನ್ನಾಗಿ ಗೊತ್ತು ನಮ್ಮ ಉಪೇಂದ್ರ ತಾಕತ್ತು

ಒತ್ತಾಯ ಮಾಡಿ ಕೇಳಿದ್ದರು

ಚಿರಂಜೀವಿ ಅವರಿಗೆ ನಿರ್ದೇಶನ ಮಾಡಿ ಎಂದು ವೈಜಯಂತಿ ಪ್ರೊಡಕ್ಷನ್ ಅವರು ಬಹಳ ಒತ್ತಾಯ ಮಾಡಿ ಉಪೇಂದ್ರ ಅವರನ್ನ ಒಪ್ಪಿಸಿದ್ದರಂತೆ. ಆಗಿನ ಸಮಯದಲ್ಲಿ ಉಪೇಂದ್ರ ತುಂಬಾ ಬ್ಯುಸಿ ಇದ್ದರೂ ಒತ್ತಾಯಕ್ಕೆ ಮಣಿದು ಸರಿ ಮಾಡೋಣ ಅಂತ ಹೇಳಿ ಕಥೆ ರೆಡಿ ಮಾಡಿದ್ರಂತೆ.

ಕಥೆ ಕೇಳಿದ ಎಲ್ಲರೂ ಶಾಕ್

''ಅಲ್ಲಿಯವರೆಗೂ ಇದ್ದ ಕಥೆಗಳನ್ನ ಬಿಟ್ಟು ಬೇರೆಯದ್ದೇ ಕಥೆ ಮಾಡಿದ್ದರು. ಸಿನಿಮಾ ಹೀಗೆ ಇರುತ್ತೆ, ಹೀಗೆ ಇರಬೇಕು ಎಂಬ ಕಲ್ಪನೆಯನ್ನ ಬ್ರೇಕ್ ಮಾಡಿ ಕಥೆ ಮಾಡಿದ್ದರಂತೆ. ಈ ಕಥೆ ಕೇಳಿ ಹೀಗೂ ಸಿನಿಮಾ ಮಾಡಬಹುದಾ ಅಂತ ಎಲ್ಲರೂ ಒಂದು ಕ್ಷಣ ಶಾಕ್ ಆಗಿದ್ರಂತೆ. ಅಲ್ಲಿಯವರೆಗಿದ್ದ ಕಮರ್ಷಿಯಲ್ ಟ್ರೆಂಡ್ ಮುರಿದು ಹಾಕುವಂತ ಸಿನಿಮಾ ಅದು''

ವಿಚಿತ್ರ, ಊಹಿಸಲೇ ಸಾಧ್ಯವಾಗದ ಕಥೆ

''ದ್ವಿಪಾತ್ರದ ಕಥೆ ಮಾಡಿದ್ದರು. ಬಹುಶಃ ತುಂಬಾ ವಿಚಿತ್ರವೆನಿಸಿತ್ತು. ಯಾರೂ ಊಹಿಸಲು ಕೂಡ ಸಾಧ್ಯವಾಗುತ್ತಿರಲಿಲ್ಲ. ಈಗ ಇಂಟರ್ ನೆಟ್, ಟೆಕ್ನಾಲಜಿ ಇದ್ದರೂ ಈಗ ಒಂದು ಸಿನಿಮಾ ಮಾಡ್ಬೇಕಾದ್ರೆ ಅದಕ್ಕೊಂದು ಸ್ಫೂರ್ತಿ, ಮೂಲ ಇರುತ್ತೆ. ಆದ್ರೆ, ಅಂದು ಉಪೇಂದ್ರ ಹೇಳಿದ ಕಥೆಗೆ ಅವರೇ ಮೂಲ. ವಿಭಿನ್ನವಾಗಿರಬೇಕು, ಹೊಸತನ ಇರಬೇಕು ಎಂದು ಮಾಡುವ ನಿರ್ದೇಶಕ''

ಪುಟ್ಟಣ್ಣ, ಕಾಶಿನಾಥ್ ನಂತರ ಉಪೇಂದ್ರ

''ಪುಟ್ಟಣ್ಣ ಕಣಗಾಲ್, ನಂತರ ಕಾಶೀನಾಥ್ ನಂತರ ತೆಲುಗಿನಲ್ಲಿ ಉಪೇಂದ್ರ ಚಿತ್ರಗಳಿಗೆ ಹೆಚ್ಚು ಬೇಡಿಕೆ ಮತ್ತು ಪ್ರೇಕ್ಷಕರಿದ್ದಾರೆ. ಆ ಕಾರಣಕ್ಕಾಗಿಯೇ ಉಪೇಂದ್ರ ಅವರನ್ನ ಕರೆದುಕೊಂಡು ಬಂದು ಇಲ್ಲಿನ ಚಿತ್ರಗಳಲ್ಲಿ ನಟಿಸುವ ಆಸಕ್ತಿ ತೋರಿಸ್ತಾರೆ'' ಎಂದು ನಿರ್ದೇಶಕ ವೈವಿಎಸ್ ಚೌಧರಿ ಐ ಲವ್ ಯೂ ಸುದ್ದಿಗೋಷ್ಠಿಯಲ್ಲಿ ಹೇಳಿಕೊಂಡಿದ್ದಾರೆ.