'ದಿ ವಿಲನ್' ಚಿತ್ರಕ್ಕೆ 'ಎ' ಸರ್ಟಿಫಿಕೇಟ್ ಕೊಟ್ರೆ ಏನೆಲ್ಲಾ ಆಗಬಹುದು.?

'ಎ' ಸರ್ಟಿಫಿಕೇಟ್ ನೀಡಲು ಕಾರಣವೇನು.?

ದಿ ವಿಲನ್.... ಇಬ್ಬರು ಸೂಪರ್ ಸ್ಟಾರ್ ಗಳು ಅಭಿನಯದ ಪಕ್ಕಾ ಕಮರ್ಷಿಯಲ್ ಸಿನಿಮಾ. ಹೀಗಿರುವಾಗ, ಈ ಚಿತ್ರಕ್ಕೆ ಎ ಸರ್ಟಿಫಿಕೇಟ್ ನೀಡುತ್ತಿರುವುದು ಯಾಕೆ ಎಂಬ ಪ್ರಶ್ನೆ ಕಾಡುವುದು ಸಹಜ. ಇದಕ್ಕೆ ಕಾರಣ ಚಿತ್ರದಲ್ಲಿನ ಅತಿಯಾದ ಆಕ್ಷನ್ ಮತ್ತು ನಟಿ ಆಮಿ ಜಾಕ್ಸನ್ ಎನ್ನಲಾಗಿದೆ. ಶಿವಣ್ಣ ಮತ್ತು ಸುದೀಪ್ ಇಬ್ಬರು ಗ್ಯಾಂಗ್ ಸ್ಟರ್ ಗಳಾಗಿದ್ದು, ಸಾಹಸಮಯ ದೃಶ್ಯಗಳು ಹೆಚ್ಚಿವೆಯಂತೆ. ಮತ್ತು ಆಮಿ ಜಾಕ್ಸನ್ ಕೆಲವು ದೃಶ್ಯಗಳಲ್ಲಿ ತುಂಬಾ ಬೋಲ್ಡ್ ಆಗಿ ಕಾಣಿಸಿಕೊಂಡಿದ್ದಾರಂತೆ. ಆದ್ದರಿಂದ ಎ ಪ್ರಮಾಣಪತ್ರ ನೀಡಲು ಸೆನ್ಸಾರ್ ಅಧಿಕಾರಿಗಳು ಮುಂದಾಗಿದ್ದಾರಂತೆ.

ವೀಕ್ಷಕರ ಕೊರತೆ ಆಗಬಹುದು

ಪ್ರೇಮ್ ಲೆಕ್ಕಾಚಾರದಲ್ಲಿ 'ದಿ ವಿಲನ್' ಚಿತ್ರವನ್ನ ಎಲ್ಲ ವರ್ಗದ ಪ್ರೇಕ್ಷಕರು ನೋಡಬಹುದಾದ ಸಿನಿಮಾ. ಒಂದು ವೇಳೆ ಎ ಪ್ರಮಾಣ ಪತ್ರ ನೀಡಿದ್ರೆ, ಅದು ಕೇವಲ ಒಂದು ವರ್ಗದ ಆಡಿಯೆನ್ಸ್ ಗೆ ಸೀಮಿತವಾಗಿಬಿಡುತ್ತೆ. ಇನ್ನು ಫ್ಯಾಮಿಲಿ ವೀಕ್ಷಕರು ಕೂಡ ಥಿಯೇಟರ್ ಗೆ ಬರುವ ಮನಸ್ಸು ಮಾಡಲ್ಲ ಎನ್ನುವುದು ಆತಂಕ.

ಬಾಕ್ಸ್ ಆಫೀಸ್ ನಲ್ಲಿ ಪರಿಣಾಮ

'ಎ' ಪ್ರಮಾಣಪತ್ರ ನೀಡುವುದರಿಂದ ಸಹಜವಾಗಿ ವೀಕ್ಷಕರ ಕೊರತೆ ಎದುರಿಸುವ ದಿ ವಿಲನ್ ಬಾಕ್ಸ್ ಆಫೀಸ್ ಕಲೆಕ್ಷನ್ ನಲ್ಲೂ ಸ್ವಲ್ಪ ಹಿನ್ನಡೆಯಾಗಬಹುದು. ಅಂದ್ರೆ, ಇಬ್ಬರು ಸೂಪರ್ ಸ್ಟಾರ್ ನಟರು ಅಭಿನಯದ ಚಿತ್ರದಿಂದ ದೊಡ್ಡ ಗಳಿಕೆಯನ್ನ ಅಂದಾಜು ಮಾಡಲಾಗಿರುತ್ತೆ. ಇಬ್ಬರ ಅಭಿಮಾನಿಗಳು ಮುಗಿಬಿದ್ದು ಸಿನಿಮಾ ನೋಡಲು ಬರ್ತಾರೆ. ಆದ್ರೆ, ಎ ಸರ್ಟಿಫಿಕೇಟ್ ಬಂದಾಗ ಸ್ವಲ್ಪ ಜನ ಬರುವುದಿಲ್ಲ. ಹೀಗಾಗಿ, ನಿರೀಕ್ಷೆಯ ಮಟ್ಟದ ತಲುಪುವಲ್ಲಿ ಆರಂಭಿಕ ಹಿನ್ನಡೆಯಾಗಬಹುದು ಎಂಬ ಭಯ.

'ಜೋಗಯ್ಯ' ವೇಳೆಯೂ ಅದೇ ಆಗಿತ್ತು.!

ಅಂದ್ಹಾಗೆ, ಶಿವರಾಜ್ ಕುಮಾರ್ ನಟನೆ ಹಾಗೂ ಪ್ರೇಮ್ ನಿರ್ದೇಶನ ಮಾಡಿದ್ದ ಜೋಗಯ್ಯ ಚಿತ್ರಕ್ಕೂ ಮೊದಲು ಸೆನ್ಸಾರ್ ಮಂಡಳಿ ಎ ಸರ್ಟಿಫಿಕೇಟ್ ನೀಡಿತ್ತು. ಕೆಲವು ದೃಶ್ಯಗಳನ್ನ ಮ್ಯೂಟ್ ಮಾಡಿ, ಮತ್ತೆ ಕೆಲವನ್ನ ಕಟ್ ಮಾಡಿದ್ರೆ ಯು/ಎ ಪ್ರಮಾಣ ಪತ್ರ ನೀಡುತ್ತೇವೆ ಎಂದು ಸನ್ಸಾರ್ ತಿಳಿಸಿತ್ತು. ಆಗ ಫ್ಯಾಮಿಲಿ ಆಡಿಯೆನ್ಸ್ ಸಂಖ್ಯೆ ಕುಸಿಯಬಾರದು ಎಂಬ ಕಾರಣಕ್ಕೆ ಪ್ರೇಮ್ ಸೆನ್ಸಾರ್ ಸೂಚನೆಯನ್ನ ಪರಿಗಣಿಸಿದರು. ನಂತರ ಜೋಗಯ್ಯ ಚಿತ್ರಕ್ಕೆ ಯು/ಎ ಸಿಕ್ಕಿತ್ತು. ಈಗ ವಿಲನ್ ಗೂ ಅದೇ ರೀತಿ ಆದ್ರೂ ಅಚ್ಚರಿಯಿಲ್ಲ.

ಸುದೀಪ್ ಚಿತ್ರಕ್ಕೆ 'ಎ' ಸರ್ಟಿಫಿಕೇಟ್

ಸುದೀಪ್ ಅಭಿನಯದ ಇತ್ತೀಚಿನ ಯಾವ ಚಿತ್ರಗಳಿಗೂ ಎ ಸರ್ಟಿಫಿಕೇಟ್ ಸಿಕ್ಕಿರಲಿಲ್ಲ. ದಾಖಲೆಗಳ ಪ್ರಕಾರ ಸುದೀಪ್ ಅಭಿನಯಿಸಿದ್ದ ಗೂಳಿ ಚಿತ್ರಕ್ಕೆ ಕೊನೆಯದಾಗಿ ಎ ಪ್ರಮಾಣಪತ್ರ ನೀಡಲಾಗಿತ್ತು. ಆ ಚಿತ್ರದ ನಂತರ ಈಗ ವಿಲನ್ ಗೆ ಎ ಸರ್ಟಿಫಿಕೇಟ್ ಸೀಗೋ ಸಾಧ್ಯತೆ ಇದೆ.

ಗೌರಿ ಗಣೇಶ್ ಹಬ್ಬಕ್ಕೆ ರಿಲೀಸ್.?

ಅದೇನೇ ಆಗಲಿ, ಗೌರಿ ಗಣೇಶ್ ಹಬ್ಬದ ಪ್ರಯುಕ್ತ 'ದಿ ವಿಲನ್' ಚಿತ್ರವನ್ನ ತೆರೆಗೆ ತರಬೇಕು ಎನ್ನುವುದು ಪ್ರೇಮ್ ಅವರ ಗುರಿ. ಅದಕ್ಕೆ ಎಲ್ಲ ಸಿದ್ಧತೆಗಳು ಆಗಿವೆ. ಸೆನ್ಸಾರ್ ಪಕ್ಕಾ ಆಗ್ಮೇಲೆ ರಿಲೀಸ್ ದಿನಾಂಕ ಘೋಷಣೆ ಮಾಡ್ತಾರೆ. ಸುದೀಪ್, ಶಿವಣ್ಣ, ಆಮಿ ಜಾಕ್ಸನ್, ಶ್ರೀಕಾಂತ್, ಮಿಥುನ್ ಚಕ್ರವರ್ತಿ ಸೇರಿದಂತೆ ದೊಡ್ಡ ತಾರಬಳಗ ಈ ಚಿತ್ರಕ್ಕಿದೆ. ಸಿ ಆರ್ ಮನೋಹರ್ ಈ ಚಿತ್ರವನ್ನ ನಿರ್ಮಾಣ ಮಾಡಿದ್ದಾರೆ.