ಈ ವಾರ ಕನ್ನಡದಲ್ಲಿ ಒಟ್ಟು 11 ಚಿತ್ರಗಳು ಬಿಡುಗಡೆ

ಜಂಟಲ್ ಮನ್

ಪ್ರಜ್ವಲ್ ದೇವರಾಜ್ ಮತ್ತು ನಿಶ್ವಿಕಾ ನಾಯ್ಡು ನಟನೆಯ ಜಂಟಲ್ ಮನ್ ಸಿನಿಮಾ ಈ ವಾರದ ನಿರೀಕ್ಷೆ ಚಿತ್ರ. 18 ಗಂಟೆ ನಿದ್ದೆ 6 ಗಂಟೆ ಎಚ್ಚರವಾಗಿರುವ ವ್ಯಕ್ತಿ ಕಥೆ ಎನ್ನುವುದಕ್ಕೆ ಭಾರಿ ಕುತೂಹಲ ಮೂಡಿಸಿದೆ. ಹಂಪಿ ಜಡೇಶ್ ಕುಮಾರ್ ನಿರ್ದೇಶನ, ಗುರುದೇಶಪಾಂಡೆ ನಿರ್ಮಾಣ ಹೊಂದಿದೆ.

ಮಾಲ್ಗುಡಿ ಡೇಸ್

ವಿಜಯ್ ರಾಘವೇಂದ್ರ ವಿಶೇಷ ಪಾತ್ರ ನಿರ್ವಹಿಸಿರುವ ಚಿತ್ರ ಮಾಲ್ಗುಡಿ ಡೇಸ್. ಶೀರ್ಷಿಕೆಯಿಂದಲೇ ಭಾರಿ ಗಮನ ಸೆಳೆದಿರುವ ಈ ಚಿತ್ರದ ಮೇಲೆ ಒಂದು ಕಣ್ಣಿದೆ. ಕಿಶೋರ್ ಮೂಡಬಿದ್ರಿ ನಿರ್ದೇಶನದ ಈ ಚಿತ್ರದಲ್ಲಿ ಅರ್ಜುನ್, ಗ್ರೀಷ್ಮಾ, ಧನ್ ರಾಜ್ ನಟಿಸಿದ್ದಾರೆ. ಈ ಚಿತ್ರವೂ ಇದೇ ವಾರ ಬರ್ತಿದೆ.

ಮತ್ತೆ ಉದ್ಭವ

ಹಿರಿಯ ನಿರ್ದೇಶಕ ಕೊಡ್ಲು ರಾಮಕೃಷ್ಣ ನಿರ್ದೇಶನದ ಮತ್ತೆ ಉದ್ಭವ ಸಿನಿಮಾನೂ ಇದೇ ವಾರ ತೆರೆಗೆ ಬರ್ತಿದೆ. ಪ್ರಮೋದ್ ಈ ಚಿತ್ರದಲ್ಲಿ ನಾಯಕನಾಗಿದ್ದು, ಮಿಲನ ನಾಗರಾಜ್ ನಾಯಕಿಯಾಗಿ ನಟಿಸಿದ್ದಾರೆ. ಅನಂತ್ ನಾಗ್ ನಟಿಸಿದ್ದ ಉದ್ಭವ ಚಿತ್ರದ ಮುಂದುವರಿದ ಕಥೆ ಇದಾಗಿರುವುದು ವಿಶೇಷ.

ಬಿಲ್ ಗೇಟ್ಸ್

ಶಿಶಿರ್ ಮತ್ತು ಚಿಕ್ಕಣ್ಣ ಕಾಂಬಿನೇಷನ್ ನಲ್ಲಿ ತಯಾರಾಗಿರುವ ಬಿಲ್ ಗೇಟ್ಸ್ ಸಿನಿಮಾನೂ ಇದೇ ವಾರ ಚಿತ್ರಮಂದಿರಕ್ಕೆ ಬರ್ತಿದೆ. ಶ್ರೀನಿವಾಸ ಸಿ ಮಂಡ್ಯ ಈ ಚಿತ್ರ ನಿರ್ದೇಶನ ಮಾಡಿದ್ದು, ನೊಬಿನ್ ಪೌಲ್ ಸಂಗೀತ ನೀಡಿದ್ದಾರೆ. ಕುರಿ ಪ್ರತಾಪ್, ಗಿರಿ, ರೋಜಾ, ಅಕ್ಷರ ರೆಡ್ಡಿ ನಟಿಸಿದ್ದಾರೆ.

ಜಿಲ್ಕ ಮತ್ತು ದಿಯಾ

ಕವೀಶ್ ಶೆಟ್ಟಿ, ಪ್ರಿಯಾ ಹೆಗ್ಡೆ, ಪ್ರತೀಕ್ ಶೆಟ್ಟಿ ನಟಿಸಿರುವ ಜಿಲ್ಕ ಸಿನಿಮಾ ಇದೇ ವಾರ ಬಿಡುಗಡೆಯಾಗುತ್ತಿದೆ. ನಾಯನ ಕವೀಶ್ ಶೆಟ್ಟಿ ಅವರೇ ಈ ಚಿತ್ರ ನಿರ್ದೇಶನ ಮಾಡಿದ್ದಾರೆ. ಪೃಥ್ವಿ ಅಂಬಾರ್, ಖುಷಿ, ದೀಕ್ಷಿತ್ ನಟನೆಯ ದಿಯಾ ಸಿನಿಮಾನೂ ಈ ವಾರ ಚಿತ್ರಮಂದಿರಕ್ಕೆ ಬರ್ತಿದೆ.

3ರ್ಡ್ ಕ್ಲಾಸ್

ಜಗದೀಶ್, ರೂಪಿಕಾ, ದಿವ್ಯಾ ರಾವ್, ಅವಿನಾಶ್ ಮತ್ತು ರಮೇಶ್ ಭಟ್ ಪ್ರಮುಖ ಪಾತ್ರದಲ್ಲಿ ನಟಿಸಿರುವ '3ರ್ಡ್ ಕ್ಲಾಸ್' ಚಿತ್ರವೂ ಇದೇ ವಾರ ನಿಮ್ಮ ಮುಂದೆ ಬರಲಿದೆ. 7 ಹಿಲ್ಸ್ ಸ್ಟುಡಿಯೋ ಸಂಸ್ಥೆಯಡಿ ಈ ಚಿತ್ರ ನಿರ್ಮಾಣವಾಗಿದ್ದು, ಅಶೋಕ್ ದೇವ್ ನಿರ್ದೇಶಿಸಿದ್ದಾರೆ. ಜೆಸ್ಸಿ ಗಿಫ್ಟ್ ಮ್ಯೂಸಿಕ್ ಕಂಪೋಸ್ ಮಾಡಿದ್ದಾರೆ. ಬಿ ಕೆ ಶಾಮ್ ರಾಜ್ ಛಾಯಾಗ್ರಹಣ ಮತ್ತು ಶ್ರೀಕಾಂತ್ ಸಂಕಲನ ಚಿತ್ರಕ್ಕಿದೆ.

ಉಳಿದ ನಾಲ್ಕು ಚಿತ್ರಗಳು

ಇಷ್ಟು ಚಿತ್ರಗಳ ಜೊತೆ ಇನ್ನು ನಾಲ್ಕು ಚಿತ್ರಗಳು ಈ ವಾರ ಥಿಯೇಟರ್ ಅಂಗಳಕ್ಕೆ ಕಾಲಿಡುತ್ತಿದೆ. ಪುರ್ ಸೊತ್ ರಾಮ, ಡೆಡ್ಲಿ ಅಫೇರ್, ಅರಿಷಡ್ವರ್ಗ, ಓಜೋಸ್ ಎಂಬ ಹೊಸಬರ ಚಿತ್ರಗಳು ಈ ವಾರ ಪ್ರೇಕ್ಷಕರ ಮನ ಗೆಲ್ಲಲು ಪೈಪೋಟಿಗೆ ಬಿದ್ದು ಬರ್ತಿವೆ. ಒಟ್ಟಾರೆ, ಕನ್ನಡ, ತೆಲುಗು, ತಮಿಳು, ಹಿಂದಿ, ಬೆಂಗಾಳಿ, ಮರಾಠಿ ಚಿತ್ರಗಳು ಸೇರಿ ಒಟ್ಟು 32 ಚಿತ್ರಗಳು ಈ ವಾರ ಬಿಡುಗಡೆಯಾಗುತ್ತಿದೆ.