ಮದುವೆಯ ನಂತರ ನಟಿ ಸಮಂತಾ 'ಯೂಟರ್ನ್'

ನಟಿ ಸಮಂತಾ ಮದುವೆಯ ಬಳಿಕ ಯಾವ ಸಿನಿಮಾ ಮಾಡುತ್ತಾರೆ ಎಂಬ ನಿರೀಕ್ಷೆ ಹೆಚ್ಚಿತ್ತು. ಅದೇ ರೀತಿ ಸಮಂತಾ ಈಗ ಹೊಸ ಸಿನಿಮಾ ಮಾಡುತ್ತಿದ್ದಾರೆ. ಅದು ಕೂಡ ಕನ್ನಡದ ನಿರ್ದೇಶಕ ಪವನ್ ಕುಮಾರ್ ಅವರ ಜೊತೆಗೆ ಎನ್ನುವುದು ವಿಶೇಷ.

ಪವನ್ ಕುಮಾರ್ ತಮ್ಮ 'ಯೂಟರ್ನ್' ಚಿತ್ರವನ್ನು ತೆಲುಗು ಭಾಷೆಗೆ ಮಾಡಲಿದ್ದು, ಅದರಲ್ಲಿ ಸಮಂತಾ ನಾಯಕಿ ಎಂಬ ಮಾತು ಇತ್ತು. ಆದರೆ ಈಗ ಆ ಸಿನಿಮಾ ಶುರುವಾಗುವ ಕಾಲ ಕೂಡಿ ಬಂದಿದೆ. ಇತ್ತೀಚಿಗಷ್ಟೆ 'ಫಿಲ್ಮಿಬೀಟ್ ಕನ್ನಡ'ದ 'ನನ್ನ ಮೊದಲ ಸಿನಿಮಾ' ಲೇಖನದ ಸಂದರ್ಶನದ ವೇಳೆ ಮಾತನಾಡಿದ ಪವನ್ ತಮ್ಮ 'ಯೂಟರ್ನ್' ರಿಮೇಕ್ ಬಗ್ಗೆ ಕೂಡ ಮಾತನಾಡಿದ್ದಾರೆ.

ಸದ್ಯಕ್ಕೆ 'ಯೂಟರ್ನ್' ತೆಲುಗು ಭಾಷೆಗೆ ರಿಮೇಕ್ ಮಾಡುತ್ತಿದ್ದು ಅದು ಫೆಬ್ರವರಿಯಿಂದ ಪ್ರಾರಂಭ ಆಗಲಿದೆ ಎಂದು ಪವನ್ ತಿಳಿಸಿದ್ದಾರೆ. ಇತ್ತ ಸಮಂತಾ ಕೂಡ ತಮ್ಮ ಟ್ವಿಟ್ಟರ್ ಖಾತೆಯಲ್ಲಿ ಈ ಚಿತ್ರದ ಬಗ್ಗೆ ಬರೆದುಕೊಂಡಿದ್ದಾರೆ. 'ಯೂಟರ್ನ್' ಸಿನಿಮಾ ತೆಲುಗು ಮತ್ತು ತಮಿಳು ಭಾಷೆಗೆ ರಿಮೇಕ್ ಆಗುತ್ತಿದೆ. ಈ ಎರಡು ಚಿತ್ರದಲ್ಲಿಯೂ ಸಮಂತಾ ಅವರೇ ನಾಯಕಿ ಆಗಿದ್ದಾರೆ.