ಟಗರು ಪಲ್ಯ ಚಿತ್ರಕ್ಕೆ ಪ್ರೇಮ್ ಮಗಳನ್ನು ನಾಯಕಿ ಮಾಡೋಣ ಎಂದು ಹೇಳಿದ್ದು ಇವರೇ: ಧನಂಜಯ್

ಪ್ರೇಮ್ ಮಗಳನ್ನು ಆರಿಸಿದ್ದು ಯಾರು?

"ನಾಯಕನಾಗಿ ನಾಗಭೂಷಣ್ ಅವರನ್ನು ಹಾಗೂ ಪೋಷಕ ಪಾತ್ರಗಳಿಗೆ ಆರಿಸಿದ ನಂತರ ನಾಯಕಿಯನ್ನಾಗಿ ಯಾರನ್ನು ಆರಿಸಬಹುದು ಎಂಬ ಚರ್ಚೆ ಶುರುವಾಯಿತು. ಈ ಕುಟುಂಬಕ್ಕೆ ಒಬ್ರು ಮಹಾಲಕ್ಷ್ಮಿ ಬೇಕಿತ್ತು. ಏಕೆಂದರೆ ಈ ಚಿತ್ರದ ನಾಯಕಿ ಇಷ್ಟವಾದರೆ, ಆಕೆ ಗೆದ್ದರೆ ಇಡೀ ಚಿತ್ರ ಗೆಲ್ಲುತ್ತೆ. ಅಂತಹ ಅದ್ಭುತವಾದ ಪಾತ್ರ ಅದು. ಹಾಗಾಗಿ ಆ ಪಾತ್ರಕ್ಕೆ ಯಾರು ಸೂಕ್ತ ಎನ್ನುವಾಗ ನಮ್ಮ ನಿರ್ದೇಶಕರು ಪ್ರೇಮ್ ಸರ್ ಮಗಳಾದರೆ ಹೇಗೆ ಎಂದು ಸೂಚಿಸಿದರು" ಎಂದು ಧನಂಜಯ್ ಹೇಳಿದರು.

ಫೋಟೊ, ವಿಡಿಯೊ ನೋಡಿ ಖುಷಿಯಾಯಿತು

ಹೀಗೆ ಚಿತ್ರದ ನಿರ್ದೇಶಕ ಉಮೇಶ್ ಕೆ ಕೃಪ ನೆನಪಿರಲಿ ಅಮೃತಾ ಪ್ರೇಮ್ ಹೆಸರನ್ನು ಸೂಚಿಸಿದರು ಎಂದು ಹೇಳಿದ ಧನಂಜಯ್ "ನಾನು ಅಮೃತಾಳನ್ನು ನೇರವಾಗಿ ನೋಡಿರಲಿಲ್ಲ. ಆದರೆ ಫೋಟೊ ಹಾಗೂ ವಿಡಿಯೊಗಳನ್ನು ನೋಡಿ ಖುಷಿಯಾಯಿತು" ಎಂದು ತಿಳಿಸಿದರು. ಈ ಮೂಲಕ ಪ್ರೇಮ್ ಮಗಳನ್ನು ತಮ್ಮ ನಿರ್ಮಾಣದ 'ಟಗರು ಪಲ್ಯ' ಚಿತ್ರಕ್ಕೆ ಆಯ್ಕೆ ಮಾಡಿದ್ದು ಹೇಗೆ ಎಂಬುದನ್ನು ಬಿಚ್ಚಿಟ್ಟರು.

ಪ್ರೇಮ್ ಜತೆ ಚರ್ಚೆ

ಇನ್ನೂ ಮುಂದುವರಿದು ಮಾತನಾಡಿದ ಧನಂಜಯ್ ಅಮೃತಾ ಪ್ರೇಮ್ ಫೋಟೊ ಹಾಗೂ ವಿಡಿಯೊ ನೋಡಿ ಮೆಚ್ಚಿಕೊಂಡ ಕೂಡಲೇ ಪ್ರೇಮ್ ಸರ್‌ಗೆ ಕರೆ ಮಾಡಿ ವಿಷಯ ತಿಳಿಸಿ, ಅವರು ಒಪ್ಪಿಕೊಂಡರೆ ಮುಂದುವರಿಯೋಣ, ಏಕೆಂದರೆ ಅವರು ತಮ್ಮ ಮಗಳನ್ನು ಯಾವ ರೀತಿ ಲಾಂಚ್ ಮಾಡಬೇಕು ಎಂದು ಯೋಜನೆ ಹಾಕಿಕೊಂಡಿದ್ದಾರೋ ಏನೋ ಎಂದು ತಿಳಿಸಿದ್ದರಂತೆ. ಅದರಂತೆ ನೆನಪಿರಲಿ ಪ್ರೇಮ್‌ಗೆ ಚಿತ್ರದ ಕತೆಯನ್ನು ಕಳುಹಿಸಿಕೊಟ್ಟಾಗ ತುಂಬಾ ಖುಷಿಯಿಂದ ಒಪ್ಪಿಗೆ ನೀಡಿದರು ಎಂಬುದನ್ನೂ ಸಹ ಧನಂಜಯ್ ಹೇಳಿಕೊಂಡಿದ್ದಾರೆ.