ಉಪೇಂದ್ರ ಮುಂದಿನ ಚಿತ್ರದ ಬಜೆಟ್ 2 ಲಕ್ಷ 25 ಸಾವಿರ ಕೋಟಿ.!

2 ಲಕ್ಷ 25 ಸಾವಿರ ಕೋಟಿ ಸಿನಿಮಾ

ಉಪೇಂದ್ರ ಒಂದು ರಿಯಲ್ ಸಿನಿಮಾ ಮಾಡ್ತಾರಂತೆ. ಆ ಚಿತ್ರದ ಬಜೆಟ್ 2 ಲಕ್ಷ 25 ಸಾವಿರ ಕೋಟಿ. ಒಂದು ವರ್ಷದ ಪ್ರಾಜೆಕ್ಟ್ ಇದು. ಈ ಚಿತ್ರದ ನಿರ್ಮಾಪಕರು ನೀವೇ (ಪ್ರೇಕ್ಷಕರು). ಇದು ಎರಡೂವರೆ ಗಂಟೆಯ ಸಿನಿಮಾ ಅಲ್ಲ. ನಿತ್ಯ ನಿರಂತರ ಸಿನಿಮಾ ಎಂದು ಅಚ್ಚರಿ ಮೂಡಿಸಿದ್ದಾರೆ. 'ನಮ್ಮ ಕರ್ನಾಟಕವನ್ನ ಭವ್ಯ ಕರ್ನಾಟಕವನ್ನಾಗಿ ಮಾಡಬೇಕೆಂದು ನಾನು ಹಲವು ಸಿನಿಮಾ ಡೈರೆಕ್ಷನ್ ಮಾಡದೇ, ಆಕ್ಟ್ ಮಾಡದೆ ಇಲ್ಲಿವರೆಗೂ ಬಂದಿದ್ದೀನಿ'' ಎಂದು ಉಪ್ಪಿ ಹೇಳಿದ್ರು.

ಉಪ್ಪಿ ಹೇಳಿದ್ದು ರಿಯಲ್ ಪ್ರಜಾಕೀಯ

ಇಂತಹ ರಿಯಲ್ ಚಿತ್ರವನ್ನ ನಾನು ನಿರ್ದೇಶನ ಮಾಡ್ಬೇಕಾ ಅಥವಾ ಬೇಡವಾ ಎಂದು ಈಗ ಉಪೇಂದ್ರ ಅವರು ತಮ್ಮ ಅಭಿಮಾನಿಗಳ ಮುಂದೆ ಪ್ರಶ್ನೆಯಿಟ್ಟಿದ್ದಾರೆ. ಅಂದ್ರೆ, ಉಪೇಂದ್ರ ಅವರು ಹೇಳಿದ್ದು ರೀಲ್ ಸಿನಿಮಾ ಅಲ್ಲ, ತಮ್ಮ ಪ್ರಜಾಕೀಯದ ಪರಿಕಲ್ಪನೆಯನ್ನ ಹೊಂದಿರುವ ರಿಯಲ್ ಸಿನಿಮಾವನ್ನ. ಅವರ ಹೇಳಿದ್ದ ಬಜೆಟ್, ರಾಜ್ಯ ಸರ್ಕಾರದ ವಾರ್ಷಿಕ ಬಜೆಟ್ ಇರಬಹುದು.

ಡೈರೆಕ್ಷನ್ ಕೂಡ ಮಾಡ್ತೀನಿ

'ನನ್ನ ಕನಸು ಅಥವಾ ಅದನ್ನ ನೀವು ಹುಚ್ಚು ಎನ್ನಬಹುದು. ಇದು ನನ್ನ ರಿಯಲ್ ಸಿನಿಮಾ' ಎಂದು ಉಪೇಂದ್ರ ಹೇಳಿದ್ರು. ಈ ಸಿನಿಮಾಗಾಗಿ ನಿಮ್ಮನ್ನ ಮರೆಯಲು ಸಾಧ್ಯವಿಲ್ಲ. ನಿಮಗಾಗಿ ಚಿತ್ರ ಮಾಡ್ತೀನಿ. ನಿಮಗೆ ಇಷ್ಟವಾಗುವಂತಹ ಸ್ಕ್ರಿಪ್ಟ್ ಬೇಕು ಅಂತ ಕಾಯ್ತಿದ್ದೀನಿ. ಅದರ ಮೇಲೆ ಕೆಲಸ ನಡೆಯುತ್ತಿದೆ. ಸದ್ಯದಲ್ಲೇ ಅನೌನ್ಸ್ ಮಾಡ್ತೀನಿ' ಎಂದು ಉಪ್ಪಿ ಹೇಳಿದ್ರು.

ಸಂಕ್ರಾಂತಿಗೆ ಸಿಗುತ್ತಾ ಗುಡ್ ನ್ಯೂಸ್.!

ಸದ್ಯದ ಮಾಹಿತಿ ಪ್ರಕಾರ ಉಪೇಂದ್ರ ಡೈರೆಕ್ಷನ್ ಸಿನಿಮಾ ಮುಂದಿನ ವರ್ಷ ಆರಂಭವಾಗಲಿದೆ ಎನ್ನಲಾಗುತ್ತಿದೆ. ಸಂಕ್ರಾತಿ ಹಬ್ಬಕ್ಕೆ ಉಪ್ಪಿ ನಿರ್ದೇಶನದ ಸಿನಿಮಾ ಬಗ್ಗೆ ಮಾಹಿತಿ ಸಿಗಲಿದೆ. ಮುಂದಿನ ವರ್ಷ ಚಿತ್ರೀಕರಣ ಕೂಡ ಶುರುವಾಗಲಿದೆ ಎಂಬ ಮಾತಿದೆ. ಅದಕ್ಕೆ ಇನ್ನು ಕೆಲವು ದಿನಗಳ ಕಾಲ ಕಾದುನೋಡಬೇಕು.