'ಕಾಂತಾರ 2' ಚಿತ್ರದಲ್ಲಿ ಐರಾವತ ನಟಿ ನಟನೆ? ರಿಷಬ್ ಜತೆಗಿನ ಫೋಟೊ ವೈರಲ್!

ರಿಷಬ್ ಜತೆ ಊರ್ವಶಿ ರೌಟೆಲಾ

ಬಾಲಿವುಡ್‌ ನಟಿ ಊರ್ವಶಿ ರೌಟೆಲಾ ತನ್ನ ಅಧಿಕೃತ ಫೇಸ್‌ಬುಕ್ ಖಾತೆಯಲ್ಲಿ ರಿಷಬ್ ಶೆಟ್ಟಿ ಜತೆಗಿ ಪೋಟೊ ಹಂಚಿಕೊಂಡು ರಿಷಬ್ ಶೆಟ್ಟಿ ಹಾಗೂ ಹೊಂಬಾಳೆ ಫಿಲ್ಮ್ಸ್ ಖಾತೆಗಳನ್ನು ಟ್ಯಾಗ್ ಮಾಡಿ 'ಕಾಂತಾರ 2 ಲೋಡಿಂಗ್' ಎಂದು ಬರೆದುಕೊಂಡಿದ್ದಾರೆ. ಸದ್ಯ ನಟಿ ಬರೆದುಕೊಂಡಿರುವ ಈ ಸಾಲುಗಳನ್ನು ನೋಡಿ ಸಿನಿ ರಸಿಕರು ಊರ್ವಶಿ ರೌಟೆಲಾ ಏಕೆ ಕಾಂತಾರ 2 ಬಗ್ಗೆ ಬರೆದುಕೊಂಡಿದ್ದಾರೆ, ಚಿತ್ರದಲ್ಲಿ ಈಕೆ ಪಾತ್ರವನ್ನೇನಾದರೂ ನಿರ್ವಹಿಸುತ್ತಿದ್ದಾರಾ ಎಂಬ ಅನುಮಾನ ವ್ಯಕ್ತಪಡಿಸಿದ್ದಾರೆ.

ಗಿಮಿಕ್ ಪೋಸ್ಟ್!

ಇನ್ನು ಊರ್ವಶಿ ರೌಟೆಲಾ ಸಾಮಾಜಿಕ ಜಾಲತಾಣದಲ್ಲಿ ಇಂತಹ ಗಿಮಿಕ್ ಪೋಸ್ಟ್‌ಗಳನ್ನು ಹಂಚಿಕೊಂಡು ನೆಟ್ಟಿಗರ ತಲೆಗೆ ಹುಳಬಿಡುವುದು ಹೊಸದೇನಲ್ಲ. ಈ ಹಿಂದೆಯೂ ಕ್ರಿಕೆಟಿಗ ರಿಷಬ್ ಪಂತ್ ವಿಚಾರದಲ್ಲಿ ಆತನ ಹೆಸರನ್ನು ಎಲ್ಲೂ ಉಲ್ಲೇಖಸದೇ ಪೋಸ್ಟ್ ಮಾಡಿ ಕಾಲೆಳೆದಿದ್ದರು ಹಾಗೂ ಇದು ದೊಡ್ಡ ಮಟ್ಟದ ವಿವಾದಕ್ಕೂ ಸಹ ಕಾರಣವಾಗಿತ್ತು. ಹೀಗಾಗಿ ಕೆಲವರು ರಿಷಬ್ ಶೆಟ್ಟಿ ಅವರನ್ನು ಭೇಟಿಯಾದ ಫೋಟೊಗೆ ಗೊಂದಲ ಹುಟ್ಟಿಸುವ ಬರಹವನ್ನು ಊರ್ವಶಿ ರೌಟೆಲಾ ಬರೆದುಕೊಂಡಿರುತ್ತಾರೆ ಅಷ್ಟೇ ಎಂದು ಹೇಳುತ್ತಿದ್ದಾರೆ.

ಐರಾವತದಲ್ಲಿ ನಟನೆ

2013ರಲ್ಲಿ ತೆರೆಕಂಡ ಸಿಂಗ್ ಸಾಬ್ ದ ಗ್ರೇಟ್ ಎಂಬ ಹಿಂದಿ ಚಿತ್ರದಲ್ಲಿ ನಟಿಸುವ ಮೂಲಕ ತನ್ನ ಸಿನಿ ಜರ್ನಿಯನ್ನು ಆರಂಭಿಸಿದ್ದ ನಟಿ ಊರ್ವಶಿ ರೌಟೆಲಾ 2015ರಲ್ಲಿ ತೆರೆಕಂಡ ದರ್ಶನ್ ನಟನೆಯ ಐರಾವತ ಚಿತ್ರದಲ್ಲಿ ನಟಿಸುವ ಮೂಲಕ ಕನ್ನಡ ಚಿತ್ರರಂಗಕ್ಕೂ ಪದಾರ್ಪಣೆ ಮಾಡಿದರು. ಇದು ಈಕೆ ವೃತ್ತಿ ಜೀವನದ ಎರಡನೇ ಸಿನಿಮಾವಾಗಿದ್ದು, ಬಳಿಕ ಏಳೆಂಟು ಹಿಂದಿ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಈ ವರ್ಷ ತೆರೆಕಂಡ ಚಿರಂಜೀವಿ ನಟನೆಯ ವಾಲ್ತೇರು ವೀರಯ್ಯ ಸಿನಿಮಾದಲ್ಲಿ ಐಟಂ ಹಾಡಿಗೆ ಹೆಜ್ಜೆ ಹಾಕಿದ್ದ ಊರ್ವಶಿ ರೌಟೆಲಾ ಮತ್ತೆ ದಕ್ಷಿಣ ಇಂಡಸ್ಟ್ರಿಗಳತ್ತ ಮುಖ ಮಾಡಿದ್ದು, ಮತ್ತೆರಡು ತೆಲುಗು ಸಿನಿಮಾಗಳಿಗೆ ಸಹಿ ಹಾಕಿದ್ದಾರೆ.