ಸುದೀಪ್‌ಗೆ ಆಹ್ವಾನ ತಲುಪಿತ್ತೆ? ಗೊಂದಲ ಮೂಡಿಸಿದ ಚಿತ್ರ, ರಾಮುಲು ಬಗ್ಗೆಯೂ ಚರ್ಚೆ!

ಸುದೀಪ್ ತಂದೆಗೆ ಆಹ್ವಾನ ತಲುಪಿತ್ತು

ವಾಲ್ಮೀಕಿ ಪೀಠಾಧಿಪತಿ ಪ್ರಸನ್ನಾನಂದ ಪುರಿ ಸ್ವಾಮೀಜಿ ಅವರು ನಟ ಸುದೀಪ್‌ ಅವರ ತಂದೆ ಸಂಜೀವ್ ಅವರಿಗೆ ಆಹ್ವಾನ ನೀಡಿರುವ ಚಿತ್ರ ಇದೀಗ ವೈರಲ್ ಆಗಿದೆ. ಸ್ವಾಮೀಜಿಯವರು ಸುದೀಪ್‌ ಭೇಟಿಗೆ ತೆರಳಿದ್ದಾಗ ಅವರಿಲ್ಲದೇ ಇದ್ದ ಕಾರಣ, ಅವರ ತಂದೆಗೆ ಆಹ್ವಾನ ನೀಡಲಾಗಿತ್ತು ಎನ್ನಲಾಗಿದ್ದು, ಹಾಗಿದ್ದ ಮೇಲೆ ಸುದೀಪ್, ತಮಗೆ ಆಹ್ವಾನ ನೀಡಿರಲಿಲ್ಲ ಎಂದು ಹೇಳಿರುವುದೇಕೆ? ಎಂಬ ಗೊಂದಲ ಮೂಡಿದೆ.

ಸುದೀಪ್ ಆಹ್ವಾನದಲ್ಲಿ ತಪ್ಪಾಗಿದೆ ಎಂದ ಆಯೋಜಕರು

ಇನ್ನು ಮಾಧ್ಯಮಗಳಿಗೆ ಪ್ರತಿಕ್ರಿಯೆ ನೀಡಿರುವ ಜಾತ್ರಾ ಮಹೋತ್ಸವದ ಅಧ್ಯಕ್ಷ ಎಸ್ಯ. ವಿ. ರಾಮಚಂದ್ರ, ಸುದೀಪ್ ಅವರನ್ನು ಕಾರ್ಯಕ್ರಮಕ್ಕೆ ಆಹ್ವಾನ ಮಾಡುವಲ್ಲಿ ಎಲ್ಲೋ ತಪ್ಪಾಗಿದೆ. ಮುಂಬರುವ ದಿನಗಳಲ್ಲಿ ಇದು ಮರುಕಳಿಸದಂತೆ ನೋಡಿಕೊಳ್ಳುತ್ತೇವೆ. ದೊಡ್ಡ ದೊಡ್ಡ ಕಾರ್ಯಕ್ರಮಗಳು ನಡೆಯುವಾಗ ಸಣ್ಣಪುಟ್ಟ ಸಮಸ್ಯೆಗಳು ಆಗುವುದು ಸಹಜ. ಮತ್ತೆ ಇದು ಆಗದಂತೆ ಎಚ್ಚರ ವಹಿಸುತ್ತೇವೆ ಎಂದು ಹೇಳಿದ್ದಾರೆ.

ಸಚಿವ ಶ್ರೀರಾಮುಲು ಸಹ ಗೈರು

ಸುದೀಪ್ ಅಲ್ಲದೆ, ಸಚಿವ ಶ್ರೀರಾಮುಲು ಗೈರಿನ ಬಗ್ಗೆಯೂ ಚರ್ಚೆಗಳು ಕೇಳಿ ಬರುತ್ತಿವೆ. ವಾಲ್ಮಿಕಿ ಸಮುದಾಯದ ಹಾಲಿ ಮುಖಂಡರಲ್ಲಿ ಒಬ್ಬರಾದ ಶ್ರೀರಾಮುಲು ಸಹ ಕಾರ್ಯಕ್ರಮದಲ್ಲಿ ಭಾಗವಹಿಸುವ ನಿರೀಕ್ಷೆ ಇತ್ತು ಆದರೆ ಅವರೂ ಸಹ ಭಾಗವಹಿಸಿಲ್ಲ. ಇದರ ಬಗ್ಗೆಯೂ ಕೆಲವರು ಆಕ್ಷೇಪ ಎತ್ತಿದ್ದಾರೆ.

ಯಾರು ಯಾರು ಭಾಗವಹಿಸಿದ್ದರು?

ಇನ್ನು ನಿನ್ನೆ ನಡೆದ ಕಾರ್ಯಕ್ರಮದಲ್ಲಿ ಸಿಎಂ ಬಸವರಾಜ ಬೊಮ್ಮಾಯಿ ಭಾಗವಹಿಸಿದ್ದರು. ಮಾಜಿ ಸಿಎಂ ಸಿದ್ದರಾಮಯ್ಯ ಸಹ ಭಾಗವಹಿಸಿದ್ದರು. ಇನ್ನೂ ಕೆಲ ಸಚಿವರು, ಶಾಸಕರು ಸಹ ಕಾರ್ಯಕ್ರಮದಲ್ಲಿ ಭಾಗಿಯಾಗಿದ್ದರು. ಆದರೆ ಕಳೆದ ಬಾರಿ ಜಾತ್ರೆ ಯಶಸ್ವಿಯಾಗಿ ನಡೆಯಲು ಕಾರಣಕರ್ತರಾಗಿದ್ದ ಶ್ರೀರಾಮುಲು ಈ ಬಾರಿ ಕಾರ್ಯಕ್ರಮದಲ್ಲಿ ಪಾಲ್ಗೊಳ್ಳದೇ ಇರುವುದು ಅನುಮಾನಕ್ಕೆ ಕಾರಣವಾಗಿದೆ.