ಸಿಹಿ ಸುದ್ದಿ; ತೆಗೆದು ಹಾಕಲಾಗಿದ್ದ ಕಾಂತಾರ ಚಿತ್ರದ 'ವರಾಹ ರೂಪಂ' ಹಾಡು ಮತ್ತೆ ಬಂತು!

ಹಾಡು ಎಲ್ಲಿ ಲಭ್ಯ?

ವರಾಹ ರೂಪಂ ಹಾಡಿನ ಮೇಲೆ ಹೂಡಲಾಗಿರುವ ದಾವೆಗೆ ಇನ್ನೂ ಸರಿಯಾದ ಅಂತ್ಯ ಸಿಗದಿದ್ದರೂ ಸಹ ಹೊಂಬಾಳೆ ಫಿಲ್ಮ್ಸ್ ಯುಟ್ಯೂನ್ ಚಾನೆಲ್‌ನಲ್ಲಿ ಇಂದು ( ಡಿಸೆಂಬರ್ 3 ) ಹಳೆಯ ಹಾಡು ಮತ್ತೆ ಕೇಳುಗರಿಗೆ ಲಭ್ಯವಾಗಿದೆ. ಥೈಕ್ಕುಡಂ ಬ್ರಿಡ್ಜ್ ಕೇಸ್ ಹಾಕಿದ್ದ ನಂತರ ಮಾಯವಾಗಿದ್ದ ಈ ಹಾಡು ಇದೀಗ ಮತ್ತೆ ಲಭಿಸಿರುವುದನ್ನು ಕಂಡ ಕಾಂತಾರ ಅಭಿಮಾನಿಗಳು ಖುಷಿ ವ್ಯಕ್ತಪಡಿಸುತ್ತಿದ್ದಾರೆ.

ಅಮೆಜಾನ್‌ನಲ್ಲಿ ಇಲ್ಲ ಬದಲಾವಣೆ

ಇನ್ನು ಈ ಹಾಡು ಹೊಂಬಾಳೆ ಫಿಲ್ಮ್ಸ್ ಯುಟ್ಯೂಬ್ ಚಾನೆಲ್‌ನಲ್ಲಿ ಮಾತ್ರ ಲಭ್ಯವಿದ್ದು, ಅಮೆಜಾನ್ ಪ್ರೈಮ್‌ನಲ್ಲಿ ಪ್ರಸಾರವಾಗುತ್ತಿರುವ ಚಿತ್ರದಲ್ಲಿ ಮಾತ್ರ ಲಭ್ಯವಿಲ್ಲ. ಈಗಲೂ ಸಹ ಕೇಸ್ ದಾಖಲಾದ ನಂತರ ಸಂಯೋಜಿಸಲಾಗಿದ್ದ ಹೊಸ ವರಾಹ ರೂಪಂ ಹಾಡೇ ಅಮೆಜಾನ್‌ ಪ್ರೈಮ್ ವಿಡಿಯೊದಲ್ಲಿ ಪ್ರಸಾರವಾಗುತ್ತಿದೆ.

ವಿವಾದ ಎಲ್ಲಿಗೆ ಬಂದು ನಿಂತಿದೆ?

ಇನ್ನು ವರಾಹ ರೂಪಂ ಹಾಡಿನ ಮೇಲೆ ಥೈಕ್ಕುಡಂ ಬ್ರಿಡ್ಜ್ ಮೇಲೆ ಹಾಕಿದ್ದ ನಂತರ ಹಾಡನ್ನು ಬಳಸುವಂತಿಲ್ಲ ಎಂದು ಕೇರಳ ಸ್ಥಳೀಯ ನ್ಯಾಯಾಲಯ ನೀಡಿದ್ದ ಆದೇಶವನ್ನು ಕೇರಳ ಹೈಕೋರ್ಟ್ ರದ್ದುಗೊಳಿಸಿತ್ತು ಹಾಗೂ ಹಾಡನ್ನು ಉಪಯೋಗಿಸಲು ಅನುಮತಿ ನೀಡಿತ್ತು. ಆದರೆ ನಂತರ ಮತ್ತೊಂದು ಸ್ಥಳೀಯ ಕೋರ್ಟ್ ಹಾಡನ್ನು ಬಳಸಬಾರದು ಎಂದು ತಡೆ ನೀಡಿದೆ. ಹೌದು, ಥೈಕ್ಕುಡಂ ಬ್ರಿಡ್ಜ್ ಕೋಯಿಕೋಡ್ ನ್ಯಾಯಾಲಯದಲ್ಲಿ ದಾಖಲಿಸಿದ್ದ ದೂರು ಹೊಂಬಾಳೆ ಪರ ಆಗಿದ್ದು, ಮಾತೃಭೂಮಿ ಕಪ್ಪಾ ಟಿವಿ ಪಾಲಕ್ಕಾಡ್ ನ್ಯಾಯಾಲಯದಲ್ಲಿ ದಾಖಲಿಸಿರುವ ದೂರು ಇನ್ನೂ ಚಾಲ್ತಿಯಲ್ಲಿದ್ದು, ಹಾಡಿನ ಮೇಲೆ ಮತ್ತೆ ತಡೆಯಾಜ್ಞೆ ಹೇರಲಾಗಿತ್ತು. ಆದರೆ ಇದೀಗ ಹಾಡು ಲಭ್ಯವಾಗಿರುವುದನ್ನು ನೋಡಿದರೆ ಈ ಕೇಸ್ ಕೂಡ ಹೊಂಬಾಳೆ ಫಿಲ್ಮ್ಸ್ ಪರ ಆದಂತಿದೆ ಎಂದು ನೆಟ್ಟಿಗರು ಅಭಿಪ್ರಾಯ ವ್ಯಕ್ತಪಡಿಸುತ್ತಿದ್ದಾರೆ.