ಹೊಸ ವರ್ಷದ ಪ್ರಯುಕ್ತ ವಿನಯ್ ರಾಜ್‌ಕುಮಾರ್ 'ಪೆಪೆ' ಚಿತ್ರದ ರಗಡ್ ಪೋಸ್ಟರ್ ರಿಲೀಸ್

2022ರಂತಹ ಗೋಲ್ಡನ್ ಇಯರ್ ಕಂಡ ಕನ್ನಡ ಚಲನಚಿತ್ರರಂಗ ವರ್ಷಪೂರ್ತಿ ಭರ್ಜರಿ ಯಶಸ್ವಿ ಚಿತ್ರಗಳನ್ನು ನೀಡಿ ಅಂತಿಮ ತಿಂಗಳಿನಲ್ಲಿ ವೇದ ಹಾಗೂ ಪದವಿ ಪೂರ್ವ ಚಿತ್ರಗಳ ಗೆಲುವಿನ ಮೂಲಕ ವರ್ಷಕ್ಕೆ ತೆರೆ ಎಳೆದಿದೆ. ಇನ್ನು ಈ ವರ್ಷದಲ್ಲಿ ಹಲವು ಸ್ಟಾರ್ ನಟರು ಹಾಗೂ ಯುವ ತಂಡಗಳ ಚಿತ್ರ ಸದ್ದು ಮಾಡಿದ್ದು, ವಿನಯ್ ರಾಜ್‌ಕುಮಾರ್ ನಟನೆಯ ಚಿತ್ರ ಸೋಲನ್ನು ಕಂಡಿತ್ತು.

ಹೌದು, ವಿನಯ್ ರಾಜ್‌ಕುಮಾರ್ ನಟನೆಯ 'ಟೆನ್' ಚಿತ್ರ ಹೀನಾಯವಾಗಿ ಸೋಲುಂಡಿತು. ಇನ್ನು ಈ ಚಿತ್ರದ ಬಳಿಕ ತಯಾರಾಗುತ್ತಿರುವ ವಿನಯ್ ರಾಜ್‌ಕುಮಾರ್ ನಟನೆಯ 'ಪೆಪೆ' ಚಿತ್ರದ ಮೇಲೆ ಪ್ರೇಕ್ಷಕರಿಗೆ ನಿರೀಕ್ಷೆ ಹೆಚ್ಚಿದೆ. ಈ ಹಿಂದೆ ಟೀಸರ್ ಮೂಲಕ ಸದ್ದು ಮಾಡಿದ್ದ ಈ ಚಿತ್ರ ಒಂದೊಳ್ಳೆ ಕಂಟೆಂಟ್ ಹೊಂದಿರಲಿದೆ ಎಂದು ಟೀಸರ್ ವೀಕ್ಷಿಸಿದ್ದ ಸಿನಿ ರಸಿಕರು ವ್ಯಕ್ತಪಡಿಸಿದ್ದರು.

ಟೀಸರ್ ಬಳಿಕ ಚಿತ್ರದ ಕುರಿತು ಹೆಚ್ಚೇನೂ ಮಾಹಿತಿ ಹಂಚಿಕೊಳ್ಳದಿದ್ದ ಚಿತ್ರತಂಡ ನವೆಂಬರ್ ತಿಂಗಳಿನಲ್ಲಿ ಚಿತ್ರೀಕರಣ ಮುಗಿಸಿ ಕುಂಬಳಕಾಯಿ ಹೊಡೆದಿತ್ತು. ಈ ಬಳಿಕ ಚಿತ್ರದ ಟ್ರೈಲರ್ ಯಾವಾಗ ಬಿಡುಗಡೆಯಾಗಬಹುದು ಹಾಗೂ ಚಿತ್ರ ಮತ್ಯಾವ ಅಪ್‌ಡೇಟ್ ನೀಡಬಹುದು ಎಂಬ ಪ್ರಶ್ನೆ ಸಿನಿ ರಸಿಕರಲ್ಲಿ ಮೂಡಿತ್ತು. ಆದರೆ ಇದೀಗ ಚಿತ್ರತಂಡ ಚಿತ್ರದ ಹೊಸ ಪೋಸ್ಟರ್ ಒಂದನ್ನು ಬಿಡುಗಡೆ ಮಾಡಿದೆ.

ಇಂದು ( ಜನವರಿ 1 ) ಹೊಸ ವರ್ಷದ ಪ್ರಯುಕ್ತ ಪೆಪೆ ಚಿತ್ರತಂಡ ಹೊಸ ವರ್ಷಕ್ಕೆ ಶುಭಾಶಯ ಕೋರಿ ಪೋಸ್ಟರ್ ಒಂದನ್ನು ಬಿಡುಗಡೆಗೊಳಿಸಿದೆ. ಈ ಪೋಸ್ಟರ್‌ನಲ್ಲಿ ವಿನಯ್ ರಾಜ್‌ಕುಮಾರ್ ಸಿಕ್ಕಾಪಟ್ಟೆ ರಗಡ್ ಲುಕ್‌ನಲ್ಲಿ ಕಾಣಿಸಿಕೊಂಡಿದ್ದು ನಿರೀಕ್ಷೆ ಹಾಗೂ ಕುತೂಹಲ ಮೂಡಿಸಿದೆ. ಇನ್ನು ಈ ಚಿತ್ರಕ್ಕೆ ಶ್ರೀಲೇಶ್ ಎಸ್ ನಾಯರ್ ನಿರ್ದೇಶನವಿದ್ದು, ಪೂರ್ಣಚಂದ್ರ ತೇಜಸ್ವಿ ಸಂಗೀತ ನಿರ್ದೇಶನ ಮಾಡಿದ್ದಾರೆ ಹಾಗೂ ಉದಯ ಶಂಕರ್ ಎಸ್ ಮತ್ತು ಬಿ ಎಮ್ ಶ್ರೀರಾಮ್ ಬಂಡವಾಳ ಹೂಡಿದ್ದಾರೆ.