ಡಾ. ವಿಷ್ಣುವರ್ಧನ್ 13ನೇ ವರ್ಷದ ಪುಣ್ಯಸ್ಮರಣೆ: ಸಾಹಸ ಸಿಂಹನನ್ನು ಸ್ಮರಿಸುತ್ತಿರುವ ಅಭಿಮಾನಿಗಳು

ದಾದಾನ ನೆನೆದ ಗಣ್ಯರು, ಅಭಿಮಾನಿಗಳು

ಕರುನಾಡಿನ ಮನೆಮನಗಳಲ್ಲಿ ಸಾಹಸಸಿಂಹ ವಿಷ್ಣುವರ್ಧನ್ ಕಲೆ ಸದಾ ಜೀವಂತವಾಗಿರುತ್ತದೆ. ಕನ್ನಡನಾಡಿನ ಮೇಲಿನ ದಾದಾ ಪ್ರೀತಿ, ಕನ್ನಡ ಭಾಷಾಭಿಮಾನ ಹಾಗೂ ಅಭಿಮಾನಿಗಳಿಗೆ ಅವರು ನೀಡುತ್ತಿದ್ದ ಗೌರವ ಎಲ್ಲರಿಗೂ ಪ್ರೇರಣೆ. ಡಾ. ವಿಷ್ಣುವರ್ಧನ್ ಪುಣ್ಯಸ್ಮರಣೆ ಹಿನ್ನೆಲೆಯಲ್ಲಿ ಗಣ್ಯರು, ಅಭಿಮಾನಿಗಳು ಸೋಶಿಯಲ್ ಮೀಡಿಯಾ ಪೋಸ್ಟ್‌ ಮೂಲಕ ನೆನೆಯುತ್ತಿದ್ದಾರೆ, ನಮನ ಸಲ್ಲಿಸುತ್ತಿದ್ದಾರೆ. 'ಮತ್ತೆ ಹುಟ್ಟಿ ಬನ್ನಿ ದಾದಾ' ಎನ್ನುತ್ತಿದ್ದಾರೆ.

ಅಭಿಮಾನಿಗಳ ಪಾದಯಾತ್ರೆ

ಅಭಿಮಾನ್ ಸ್ಟುಡಿಯೋದಲ್ಲಿರುವ ವಿಷ್ಣುವರ್ಧನ್ ಸಮಾಧಿ ಬಳಿ ಅಭಿಮಾನಿಗಳು ಸಾಕಷ್ಟು ಕಾರ್ಯಕ್ರಮ ಹಮ್ಮಿಕೊಂಡಿದ್ದಾರೆ. ಮೈಸೂರಿನಿಂದ ಡಾ. ವಿಷ್ಣುಸೇನಾ ಸಮಿತಿಯ 50ಕ್ಕೂ ಹೆಚ್ಚು ಅಭಿಮಾನಿಗಳು ಪಾದಯಾತ್ರೆ ಮೂಲಕ ಸಮಾಧಿ ಸ್ಥಳಕ್ಕೆ ಆಗಮಿಸುತ್ತಿದ್ದಾರೆ. 10.30ರ ಸುಮಾರಿಗೆ ಸಮಾಧಿಗೆ ಪೂಜೆ ನಡೆಯಲಿದೆ. ಡಾ. ಶರಣು ಹುಲ್ಲೂರು ಬರೆದಿರುವ ಮೇರುನಟ ಕೃತಿ ಕೂಡ ಬಿಡುಗಡೆಯಾಗಲಿದೆ. ಇನ್ನು ಸಮಾಧಿಯ ಆವರಣದಲ್ಲಿ ರಕ್ತದಾನ, ಅನ್ನದಾನ ಆಯೋಜಿಸಲಾಗಿದೆ.

ಸ್ಮಾರಕ ಲೋಕಾರ್ಪಣೆಗೆ ವೇದಿಕೆ ಸಿದ್ಧ

ಮೈಸೂರಿನ ಹೊರ ವಲಯದ ಹೆಚ್. ಡಿ ಕೋಟೆ ರಸ್ತೆಯಲ್ಲಿರುವ ಹಾಲಾಳು ಗ್ರಾಮದಲ್ಲಿ 5 ಎಕರೆ ಜಾಗದಲ್ಲಿ ಡಾ. ವಿಷ್ಣುವರ್ಧನ್ ಸ್ಮಾರಕ ನಿರ್ಮಾಣವಾಗಿದೆ. ಸ್ಮಾರಕ ಸ್ಥಳದಲ್ಲೇ ಪುಣೆ ಫಿಲ್ಮ್ ಅಂಡ್ ಟೆಲಿವಿಷನ್ ಇನ್‌ಸ್ಟಿಟ್ಯೂಟ್‌ನ ಹೊಸ ಶಾಖೆ ಆರಂಭವಾಗಲಿದೆ. ದಾದಾ ಸಿನಿ ಪಯಣ ಪರಿಚಯಿಸುವ ಆಡಿಯೋ ಹಾಗೂ ವಿಡಿಯೋ ಗ್ಯಾಲರಿ ಸ್ಮಾರಕದಲ್ಲಿ ಇರಲಿದೆ. ಆಡಿಟೋರಿಯಂ, ಕ್ಯಾಂಟೀನ್ ಕೂಡ ಇರಲಿದೆ. 11 ಕೋಟಿ ವೆಚ್ಚದಲ್ಲಿ ಈ ಭವ್ಯ ಸ್ಮಾರಕ ತಲೆ ಎತ್ತಿದೆ. ಶೀಘ್ರದಲ್ಲೇ ಸರ್ಕಾರ ಸ್ಮಾರಕ ಉದ್ಘಾಟನೆ ಕಾರ್ಯಕ್ರಮ ನೆರವೇರಲಿದೆ.

ಕುಟುಂಬ ಸದಸ್ಯರ ಪೂಜೆ

ಅಭಿಮಾನಿಗಳು ವಿಷ್ಣುವರ್ಧನ್ ಸಮಾಧಿಗೆ ಪೂಜೆ ಸಲ್ಲಿಸಿದರೆ ಕುಟುಂಬ ಸದಸ್ಯರು ಮೈಸೂರಿನಲ್ಲಿ ಸ್ಮಾಕರದ ಬಳಿ ಪೂಜೆ ಸಲ್ಲಿಸಲಿದ್ದಾರೆ. ವಿಷ್ಣುವರ್ಧನ್ ಪತ್ನಿ ಭಾರತಿ ವಿಷ್ಣುವರ್ಧನ್, ಮಗಳು ಕೀರ್ತಿ, ಅಳಿಯ ಅನಿರುದ್ಧ್ ಮೈಸೂರಿಗೆ ಹೊರಟಿದ್ದು, ಸ್ಮಾರಕದ ಬಳಿ ದಾದಾ ಭಾವಚಿತ್ರಕ್ಕೆ ಪೂಜೆ ಸಲ್ಲಿಸುವುದಾಗಿ ಫಿಲ್ಮಿಬೀಟ್‌ಗೆ ಮಾಹಿತಿ ನೀಡಿದ್ದಾರೆ. ಕಳೆದ ಕೆಲ ವರ್ಷಗಳಿಂದ ಕುಟುಂಬ ಸದಸ್ಯರು ಅಲ್ಲಿನ ಅಭಿಮಾನಿಗಳ ಜೊತೆ ಅಲ್ಲೇ ಪೂಜೆ ಸಲ್ಲಿಸುತ್ತಾ ಬರ್ತಿದ್ದಾರೆ.